సిద్ధార్థ్ 'చిన్నా' ఎమోషనల్ థ్రిల్లర్.. ట్రైలర్ చూశారా?

టాలీవుడ్​లో ఒకప్పుడు స్టార్ హీరోగా క్రేజ్ తెచ్చుకున్న నటుడు సిద్ధార్థ్. బొమ్మరిల్లు, నువ్వొస్తానంటే నేనొద్దంటానా, కొంచెం ఇష్టం కొంచెం కష్టం, ఓటి వంటి ఫీల్ గుడ్ లవ్ స్టోరీస్​తో మంచి గుర్తింపు తెచ్చుకున్నారు. తాజాగా ఆయన నటించిన ఓ ఎమోషనల్ డ్రామా మూవీ రిలీజై మంచి ప్రశంసలను అందుకుంటోంది. దానికి సంబంధించిన తెలుగు ట్రైలర్ తాజాగా విడుదల అయింది.

వివరాళ్లోకి.. తెలుగులో పలు సూపర్ హిట్స్ చిత్రాలతో అప్పట్లో బోలెడంత అమ్మాయిల ఫ్యాన్ ఫాలోయింగ్ పెంచుకున్న హీరో సిద్ధార్థ్. లవర్ బాయ్​గా మంచి ఇమేజ్ సొంతం చేసుకున్న ఆయన.. గత కొంత కాలంగా సరైన హిట్ లేక సతమతమవుతున్నారు. ఆయన కెరీర్ సడెన్​గా డౌన్ అయింది. అయినా ఆయన సినిమాలు చేస్తూనే వస్తున్నారు. హిట్టు, ప్లాప్ లతో సంబంధం లేకుండా బ్యాక్ టూ బ్యాక్ చిత్రాలు చేస్తూ ఆడియెన్స్​ను అలరించేందుకు ప్రయత్నిస్తున్నారు.

ఈ క్రమంలోనే తాజాగా తమిళంలో చిత్త అనే సినిమా చేశారు సిద్ధార్థ్. సెప్టెంబర్ 28న రిలీజైన ఈ చిత్రం.. విమర్శకుల ప్రశంసలను ముద్దాడింది. మూవీలో ఫ్యామిలీ ఎమోషన్స్ చాలా బాగున్నాయని, ప్రతి తల్లిదండ్రులు తప్పక చూడాల్సిన సినిమా అని రివ్యూలు వస్తున్నాయి. ఇప్పుడీ చిత్రాన్ని తెలుగులో విడుదల చేయడానికి మేకర్స్ సన్నాహాలు చేస్తున్నారు. తెలుగులో చిన్నాగా రాబోతున్న ఈ చిత్రం అక్టోబర్ 6న రిలీజ్ కానుంది. ఈ సందర్భంగా తాజాగా తెలుగు ట్రైలర్​ను కూడా రిలీజ్ చేశారు మేకర్స్.

ఈ ప్రచార చిత్రం ఆద్యంతం భావోద్వేగంగా సాగింది. చిన్నాన్న, కూతురు మధ్య జరిగే ఎమోషనల్​ డ్రామాగా చూపించారు. స్కూలుకు వెళ్లే ఆ చిన్నారి తప్పిపోవడంతో చిన్నాన్న పడే బాధ, ఆవేదనను తెరపై అద్భుతంగా నటించి ఆకట్టుకున్నారు సిద్ధార్థ్. ఈ క్రమంలోనే చిన్నారి చంపడానికి కూడా వెనకాడని చిన్నానగా కనిపించారు. నటనలో మంచి ఎమోషన్స్​ను చూపించారు.

ఇకపోతే సినిమాలో మలయాళీ బ్యూటీ నిమిషా సజయన్ కథానాయికగా నటించగా.. బాలనటిగా సహస్ర నటించింది.ఈ చిత్రంతో సిద్ధార్థ్ నిర్మాతగా కూడా మారారు. చూడాలి మరి ఈ చిత్రం తెలుగులో ఎంత వరకు ఆకట్టుకుంటుందో.