విరాట్ కోహ్లీ షాకింగ్ రివీలేషన్.. యువరాజ్ సింగ్ 'బ్లేమ్ గేమ్'ను బయటపెట్టిన కింగ్ కోహ్లీ

భారత క్రికెట్ చరిత్రలోనే కాకుండా ప్రపంచ క్రికెట్ రంగంలోనే తమకంటూ ప్రత్యేక ముద్ర వేసుకున్న ఇద్దరు దిగ్గజాలు విరాట్ కోహ్లీ, యువరాజ్ సింగ్. మైదానంలో పరుగుల వరద పారించినా సిక్సర్ల వర్షం కురిపించినా వీరిద్దరి తర్వాతే ఎవరైనా... అయితే వీరిద్దరి మధ్య కేవలం ప్రొఫెషనల్ బంధం మాత్రమే కాదు.. అంతకుమించిన బలమైన స్నేహ బంధం ఉందనే విషయం అందరికీ తెలిసిందే. తాజాగా కింగ్ కోహ్లీ ఒక ఇంటర్వ్యూలో యువీ పాజీ గురించి షేర్ చేసిన ఒక క్రేజీ అండ్ ఫన్నీ సీక్రెట్ ఇప్పుడు నెట్టింట తెగ హల్‌చల్ చేస్తోంది. యువరాజ్ సింగ్ ఆడే ‘బ్లేమ్ గేమ్’ గురించి కోహ్లీ నవ్వుతూ బయటపెట్టిన తీరు అభిమానులను విపరీతంగా ఆకట్టుకుంటోంది.

ఆసక్తికరమైన ‘ఫుడ్ స్టోరీ’.. యువీ పాజీ ఆర్డర్ లొల్లి

ఒకప్పుడు టీమిండియాలో సీనియర్, జూనియర్ అనే తేడా లేకుండా అందరూ కలిసిమెలిసి ఉండేవారు. ఆ రోజుల్లో యువరాజ్ సింగ్‌తో కలిసి రూమ్ షేర్ చేసుకున్నప్పటి జ్ఞాపకాలను విరాట్ కోహ్లీ తాజాగా ఒక కార్యక్రమంలో గుర్తు చేసుకున్నాడు. ముఖ్యంగా తిండి విషయంలో యువరాజ్ చేసే రచ్చను కోహ్లీ బయటపెట్టాడు. "మేము కలిసి ఆడుతున్న రోజులలో యువీ పాజీ నన్ను పిలిచి 'చీకూ, రోటీలు ఆర్డర్ చేయి' అని చెప్పేవాడు. నేను 'ఇంకేం ఆర్డర్ చేయాలి పాజీ?' అని అడిగితే 'నీకు నచ్చినది ఏదైనా ఆర్డర్ చేయి నేనేం చెప్పను' అనేవాడు" అని కోహ్లీ వివరించాడు.

సీన్ కట్ చేస్తే.. ‘బ్లేమ్ గేమ్’ స్టార్ట్

అసలు ట్విస్ట్ అక్కడే మొదలవుతుంది. యువీ పాజీ చెప్పినట్లే కోహ్లీ తనకు నచ్చిన దాల్ మఖ్నీ, పనీర్ వంటి కొన్ని నార్త్ ఇండియన్ వంటకాలను ఆర్డర్ చేసేవాడట. ఫుడ్ వచ్చాక ఇద్దరూ కలిసి ఎంతో ఇష్టంగా తినేవాళ్లు. అయితే తిన్న తర్వాతే యువరాజ్ తన అసలు స్వరూపాన్ని బయటపెట్టేవాడట..

కోహ్లీ మాట్లాడుతూ.. "భోజనం అంతా పూర్తయ్యాక యువీ పాజీ ప్లేట్ పక్కన పెట్టి 'ఈ దాల్ అసలు బాగోలేదు.. కూరలో అస్సలు రుచి లేదు, ఉప్పు లేదు' అంటూ ఫిర్యాదులు చేయడం మొదలుపెట్టేవాడు. ఆర్డర్ పెట్టమని చెప్పేది ఆయనే తనకు నచ్చింది తీసుకోమనేది ఆయనే.. కానీ చివరికి తిండి బాగోలేదనే తప్పు మాత్రం నా మీద వేసేవాడు. అది యువీ పాజీ స్టైల్ బ్లేమ్ గేమ్" అంటూ కోహ్లీ నవ్వుతూ ఆ జ్ఞాపకాలను పంచుకున్నాడు.

సోషల్ మీడియాలో వైరల్.. నెటిజన్ల ఫన్నీ కామెంట్లు

కోహ్లీ చెప్పిన ఈ సరదా సంఘటన సోషల్ మీడియాలో నిమిషాల్లో వైరల్‌గా మారింది. ఈ వీడియో చూసిన క్రికెట్ ఫ్యాన్స్, నెటిజన్లు పొట్టచెక్కలయ్యేలా నవ్వుకుంటున్నారు. "ప్రతీ ఫ్రెండ్స్ గ్యాంగ్‌లోనూ ఇలాంటి ఒక యువీ పాజీ ఉంటాడు" అని కొందరు కామెంట్ చేస్తుంటే.. "మైదానంలో ఎంత అగ్రెసివ్‌గా ఉండే కింగ్ కోహ్లీని కూడా యువరాజ్ సింగ్ ఆటపట్టించాడా!" అని మరికొందరు ఆశ్చర్యం వ్యక్తం చేస్తున్నారు. యువరాజ్ సింగ్ కేవలం మైదానంలోనే కాకుండా డ్రెస్సింగ్ రూమ్‌లో కూడా ఎంతో సరదాగా అల్లరిగా ఉంటూ అందరినీ నవ్వించేవాడని చెప్పడానికి ఈ సంఘటనే ఒక ఉదాహరణ.

దిగ్గజాల అరుదైన స్నేహ బంధం

భారత క్రికెట్‌కు 2007 టీ20 ప్రపంచకప్, 2011 వన్డే ప్రపంచకప్ అందించడంలో యువరాజ్ సింగ్ పోషించిన పాత్ర అసాధారణమైనది. క్యాన్సర్ లాంటి మహమ్మారిని జయించి మరీ మైదానంలోకి వచ్చి సింహంలా గర్జించిన పోరాట యోధుడు అతను. మరోవైపు విరాట్ కోహ్లీ రికార్డుల వేట సాగిస్తూ ఆధునిక క్రికెట్ ప్రపంచాన్ని శాసిస్తున్నాడు.

ఈ ఇద్దరు దిగ్గజాలు కెరీర్ ఆరంభం నుండి ఎంతో క్లోజ్‌గా ఉండేవారు. విరాట్ కోహ్లీని 'చీకూ' అని పిలిచే కొద్దిమంది ఆటగాళ్లలో యువరాజ్ ఒకడు. యువీ రిటైర్ అయినప్పటికీ వీరిద్దరి మధ్య ఉన్న బంధం, గౌరవం ఏమాత్రం తగ్గలేదని ఈ తాజా ఇంటర్వ్యూ నిరూపించింది. మైదానంలో సిక్సర్లతో విరుచుకుపడే యువీ పాజీలోని ఈ ఫన్నీ అండ్ ఇన్నోసెంట్ కోణాన్ని కోహ్లీ బయటపెట్టడం నిజంగా అభిమానులకు ఒక తీపి జ్ఞాపకమే..