ఏపీలో ఈసారి ఏ వేలికి సిరా చుక్క పెడతారంటే?

ఒకటి తర్వాత ఒకటి చొప్పున జరుగుతున్న ఎన్నికల నేపథ్యంలో ఏపీ రాజకీయాలు హాట్ హాట్ గా సాగుతున్నాయి. మొన్నామధ్యన పుర ఎన్నికలు పూర్తి కావటం.. అంతలోనే తిరుపతి ఉప ఎన్నిక వచ్చేయగా.. తాజాగా జెడ్పీటీసీ.. ఎంపీటీసీ ఎన్నికల హడావుడి మొదలైంది. ఈ నెల 8న దీనికి సంబంధించిన పోలింగ్ జరుగుతోంది. ఈ ఎన్నికల్ని ఏపీ విపక్ష పార్టీ అయిన తెలుగుదేశం బహిష్కరించటం తెలిసిందే.

తెలుగుదేశం బాటలోనే జనసేన కూడా నడుస్తూ.. ఈ ఎన్నికలకు దూరంగా ఉంటోంది. ఇదిలా ఉంటే.. ఇటీవల ముగిసిన మున్సిపోల్స్ ఎన్నికల సందర్భంగా ఓటు వేసిన వారికి వేసిన సిరా చుక్క చాలా మందికి పోలేదు. దీంతో.. పరిషత్ ఎన్నికల్లో ఏ వేలికి సిరా చుక్క గుర్తు పెడతారు? అన్నదిప్పుడు ప్రశ్నగా మారింది.

తాజాగా ఏపీ ఎన్నికల అధికారులు వెల్లడించిన సమాచారం ప్రకారం.. పరిషత్ ఎన్నికల్లో ఓటర్లకు ఏడమ చేతి చిటికెన వేలికి సిరా గుర్తు పెట్టనున్నారు. ఈ మధ్యనే ముగిసిన మున్సిపోల్స్ సందర్భంగా ఎడమ చేతి చూపుడు వేలిపై సిరా చుక్క వేశారు. సాధారణంగా ఈ చుక్క ఐదు నుంచి ఏడు రోజుల్లో చెరిగిపోతోంది. అయితే.. కొందరిలో మాత్రం గోరు పెరిగే వరకు కనిపించే అవకాశం ఉంది. దీన్ని పరిగణలోకి తీసుకొని చిటికెన వేలుపై సిరా చుక్క వేయాలని నిర్ణయించారు. మరి.. తిరుపతి ఎంపీ స్థానానికి జరిగే ఎన్నికకు ఏ వేలికి సిరా చుక్క వేస్తారన్న విషయాన్ని ఇంకా తేల్చలేదు.