పీకే, కేసీఆర్.. దోస్తీ కటీఫ్ అయిపోయిందా?

దేశంలోనే ఆయన పాపులర్ వ్యూహకర్త ప్రశాంత్ కిషోర్. ఇక దేశ రాజకీయాల్లో రాజకీయ చాణక్యుడు కేసీఆర్.. ఆ మధ్యలో ఇద్దరూ కలిసి పనిచేశారు. తెలంగాణ రాజకీయాల కోసమో.. లేక జాతీయ రాజకీయాల కోసమో కానీ.. ఈ ఇద్దరి కలయిక నిజంగానే ప్రత్యర్థులను భయపెట్టింది. ఎందుకంటే గతంలో ఇదే వ్యూహకర్త ప్రశాంత్ కిషోర్ 2014లో మోడీ ప్రధాని కావడానికి వ్యూహాలు రచించారు. ఆ తర్వాత కేజ్రీవాల్, మమత, స్టాలిన్, జగన్ సహా దేశంలో ఎంతో మందిని సీఎంలను చేశారు. కేసీఆర్ కూడా మూడోసారి తెలంగాణలో గెలుపు కోసం పీకేను ఆస్థాన వ్యూహకర్తగా నియమించుకున్నారు. ఐ-ప్యాక్‌కి చెందిన రాజకీయ వ్యూహకర్త ప్రశాంత్ కిషోర్ గత 12 నెలలుగా టీఆర్ఎస్ పార్టీలో పనిచేస్తున్నారు. అయితే తాజా మీడియా కథనాల ప్రకారం.. పీకే టీఆర్‌ఎస్‌తో తెగదెంపులు చేసుకున్నట్లు తెలుస్తోంది.

టీఆర్‌ఎస్ అధినేత కేసీఆర్‌కు జాతీయ రాజకీయ ఆకాంక్షలు ఉన్నాయి. అతను మొదట దాని కోసం ప్రశాంత్ కిషోర్‌ను ఎంచుకున్నాడు. ఏకంగా పీకే తన రాజకీయ పని తాను చేసుకుంటూ పోయాడు. కాంగ్రెస్‌లో చేరేందుకు ప్రయత్నించి సోనియా గాంధీని రెండు సార్లు కలిశారు. కానీ పికే మరియు గాంధీల మధ్య చర్చలు విఫలమయ్యాయి. ఈ తర్వాత పీకే తన సొంత రాజకీయ పార్టీని దేశవ్యాప్తంగా విస్తరించాలని ప్లాన్ చేశాడు. కార్యకలాపాలను ప్రారంభించడానికి తన సొంత రాష్ట్రమైన బీహార్‌లో రాజకీయాల్లోకి రావాలని అనుకున్నాడు. ఈ మేరకు రంగం కూడా సిద్ధం చేశారు.

అయితే బీహార్ లో బలంగా నితీష్ ఉండడంతో ప్రశాంత్ కిషోర్ ప్లాన్స్ ముందుకు సాగలేదు. బీహార్‌ సీఎం నితీశ్‌ కుమార్‌ నేతృత్వంలోని జనతాదళ్‌ బీజేపీతో పొత్తుకు మొగ్గుచూపింది. అయితే ఇప్పుడా పొత్తు విడిపోయింది. ఇప్పుడు నితీష్ కుమార్, ఆర్జేడీ లాలూ ప్రసాద్ యాదవ్‌తో కలిసి కాంగ్రెస్‌ను కూడా కలుపుకుని కొత్త ఫ్రంట్ తో ప్రభుత్వాన్ని ఏర్పాటు చేశారు. ప్రశాంత్ కిషోర్ కొత్త ఫ్రంట్ కోసం పనిచేస్తున్నారని.. దాని కోసం నితీష్ మరియు మమతా బెనర్జీ వంటి వారిని కలిశారని సమాచారం.

తనకు చాలా తక్కువ సమయం ఉన్నందున, జాతీయ స్థాయిలో టీఆర్‌ఎస్ కోసం పనిచేయలేనని ప్రశాంత్ కిషోర్ ఇప్పటికే కేసీఆర్‌ కు స్పష్టం చేసినట్టు తెలిసింది. అలాగే తెలంగాణ రాష్ట్రంలో సర్వేల రూపంలో తాను టీఆర్‌ఎస్‌కు పాక్షిక మద్దతు మాత్రమే అందిస్తానని, మిగిలిన వాటిని పార్టీ నిర్వహించాలని పీకే కూడా కేసీఆర్‌తో అన్నారు.

ప్రశాంత్ కిషోర్ ప్రతిపాదనతో కేసీఆర్ ఒప్పుకోకపోవడంతో పీకేని పూర్తిగా వదులుకోవాలని నిర్ణయించుకున్నారు. ఐపాక్ బృందం/సిబ్బంది హైదరాబాద్‌ను వదిలివెళ్లిపోయినట్టు తెలిసింది. కేసీఆర్ పీకేని సంప్రదించి దాదాపు మూడు నాలుగు నెలలైనట్టు తెలిసింది. ఈ వార్త తెలంగాణ రాజకీయాల్లో హాట్ హాట్ గా మారింది.

మరి పీకేను వదులుకున్న కేసీఆర్ ఏం చేయబోతున్నారు? టీఆర్‌ఎస్‌ మూడోసారి అధికారాన్ని నిలబెట్టుకోవాలని భావిస్తోంది. ఎన్నికలకు ఇంకా ఏడాది సమయం కూడా లేదు. బీజేపీ వల్ల టీఆర్‌ఎస్‌కు పెను ముప్పు పొంచి ఉన్నందున కేసీఆర్‌కు మున్ముందు చాలా కష్టతరంగా పరిస్థితులు కనిపిస్తున్నాయి. పాపులర్ వ్యూహకర్త వైదొలగడం కేసీఆర్ కు పెద్ద లోటేనా?




నోట్ : మీ ఫీడ్ బ్యాక్ మాకు ముఖ్యం. క్రింద కామెంట్ బాక్స్ లో కామెంట్ చేయండి. మా కంటెంట్ నచ్చినా చెప్పండి. నచ్చకపోయినా చెప్పండి. హుందాగా స్పందించండి. abuse వద్దు.