బిల్లు కట్టలేదని రోగిని కొట్టి చంపిన ఆస్పత్రి సిబ్బంది!

ప్రైవేట్ హాస్పిటల్స్ ఆగడాలు రోజురోజుకి పెరిగిపోతున్నాయి. ప్రైవేటు ఆస్పత్రుల నిర్వాకానికి ప్రతిరోజూ ఏదో ఒక చోట ఎవరో ఒకరి ప్రాణం పోతుండటం మనం చూస్తూనే ఉంటాం. ప్రైవేటు నిర్లక్ష్యం, ఫీజుల భారంతో ప్రజలకు చుక్కలు చూపిస్తుంటాయి ప్రైవేటు యజమాన్యాలు. కానీ, ఓ ప్రైవేటు ఆస్పత్రి నిర్వాహకులు అత్యంత దారుణానికి పాల్పడ్డారు. రూ. 4వేల బిల్లు కోసం రోగిని అతి దారుణంగా కొట్టి చంపేశారు. ఈ దారుణమైన ఘటన ఉత్తరప్రదేశ్‌ లోని అలీగడ్‌ లో చోటుచేసుకుంది.

ఈ ఘటన పై పూర్తి వివరాలు చూస్తే ... కూలి పనులు చేసుకొనే సుల్తాన్‌ ఖాన్‌ ఇటీవల మూత్ర సమస్యతో ఓ ప్రైవేట్ హాస్పిటల్‌లో చేరాడు. వైద్య పరీక్షలకు రూ.3,700 వరకు ఖర్చవుతుందని వైద్యులు తెలిపారు. దీంతో డబ్బును సమకూర్చుకుని అల్ట్రాసౌండ్ టెస్టుకు చెల్లించాడు. అనంతరం ఇంటికి వెళ్లేందుకు సిద్ధమవుతున్న ఖాన్‌ను అదనంగా మరో రూ. 4 వేలు కట్టాలని కోరారు. తాను ఎందుకు చెల్లించాలని ప్రశ్నించగా.. అప్పటివరకు ఉపయోగించిన బెడ్‌కు ఛార్జీలు చెల్లించాలని తెలిపారు.

ఈ విషయం ముందే ఎందుకు చెప్పలేదని ఖాన్ ప్రశ్నించాడు. తమ వద్ద అంత డబ్బులేదని, వెళ్లిపోతామంటూ రోడ్డు మీదకు వచ్చారు. ఖాన్ ‌ను అడ్డుకోబోయిన ఆస్పత్రి సిబ్బందిపై బంధువులు తిరగబడ్డారు. దీంతో ఆస్పత్రిలోని ఉద్యోగులంతా ఖాన్‌ ను రోడ్డు మీదే చితకబాదారు. ఆ దెబ్బలకు ఖాన్ చనిపోయాడు. ఈ ఘటన సిబ్బంది పై దాడి చేశ రోగి సుల్తాన్‌ పై ఆస్పత్రి సిబ్బంది దాడిచేశారు. తీవ్ర గాయాలతో అతడు అక్కడికక్కడే మరణించాడు. ఈ గొడవ అంతా అక్కడే ఉన్న సీసీ కెమెరాల్లో రికార్డైంది. పోలీసులు ఈ వీడియో ఆధారంగా సిబ్బందిని అదుపులోకి తీసుకున్నారు. ఈ వీడియో ఇప్పుడు సోషల్ మీడియాలో వైరల్‌గా మారింది. ఆ ప్రైవేట్ హాస్పిటల్‌ పై ప్రభుత్వం కఠిన చర్యలు తీసుకోవాలని నెటిజన్స్ డిమాండ్ చేస్తున్నారు.