కొహ్లీ రెస్టారెంట్ లో ఆర్సీబీ క్రికెటర్స్... ఫ్యాన్స్ ఘాటు రియాక్షన్!

ఇండియన్ ప్రీమియర్ లీగ్ తాజా సీజన్ లో రాయల్ ఛాలెంజర్స్ బెంగళూరు జట్టు అత్యంత దారుణమైన ప్రదర్శన చేస్తోన్న సంగతి తెలిసిందే. ఇందులో భాగంగా ఈ సీజన్ లో ఇప్పటి వరకూ 8 మ్యాచ్ లు ఆడిన ఆర్సీబీ.. కేవలం పంజాబ్ తో ఆడిన రెండో మ్యాచ్ లో గెలవడం తప్ప మిగిలిన ఏడు మ్యాచ్ లలోనూ ఓటమి పాలైంది.

ఈ క్రమంలో తాజాగా ఈనెల 21 (ఆదివారం) జరిగిన తన చివరి మ్యాచ్ లోనూ కోల్ కతా నైట్ రైడర్స్ చేతిలో ఓటమి పాలైంది. దీంతో కేవలం రెండు పాయింట్లతో పట్టికలో చివరి స్థానానికి పరిమితమైంది. ఈ నేపథ్యంలో ఈ నెల 25 (గురువారం) సన్ రైజర్స్ హైదరాబాద్ తో ఉప్పల్ స్టేడియంలో తలపడనుంది. ఈ సమయంలో రాయల్ చాలెంజర్స్ జట్టు సభ్యులు కొహ్లీ రెస్టారెంట్ లో సందడి చేశారు.

అవును... కొహ్లీకి సంబంధించిన "వన్ 8 కమ్యూన్" రెస్టారెంట్‌ లో విరాట్, కర్ణ్ శర్మ, మహిపాల్ లోమ్రోర్, వైశాక్ విజయ్‌ కుమార్, అనుజ్ రావత్, సుయాష్ ప్రభుదేశాయ్‌ లతో సహా ఆర్సీ జట్టు సభ్యులు సందడి చేశారు. ఈ సమయలో దీనికి సంబంధించిన ఓ ఫోటో సోషల్ మీడియాలో వైరల్ అయ్యింది. ఇక ఈ ఫోటో కి రియాక్ట్ అవుతున్న ఆర్సీబీ ఫ్యాన్స్ & నెటిజన్లు నిప్పులు కక్కుతుండటం గమనార్హం!

ఇందులో భాగంగా... "మీ జట్టు 8 మ్యాచ్‌ లలో 7 ఓడిపోయినప్పుడు.. ఇదంతా చేయడంలో సిగ్గనిపించడం లేదా!" అని ఒకరంటే... "వన్ 8 = 8 మ్యాచ్‌ లలో ఒక విజయం - పాయింట్ల పట్టికలో తన బ్రాండ్‌ ను ప్రమోట్ చేస్తున్న కోహ్లీ" అని మరొకరు కామెంట్ చేశారు. ఇవి మచ్చుకు కొన్ని ఉదాహరణలు మాత్రమే... ఈ ఫోటో కింద ఆర్సీబీ ఫ్యాన్స్ తో పాటు క్రికెట్ ఫ్యాన్స్ కూడా ఫైర్ అవుతున్నారు.

కాగా... ఈ సీజన్ లో ఆడిన 8 మ్యాచ్ లలోనూ 63.17 యావరేజ్ తో 379 పరుగులు చేశాడు కొహ్లీ. ఇందులో రెండు ఆఫ్ సెంచరీలు, ఒక సెంచరీ (113*) ఉన్నాయి. ఇలా 150 స్ట్రైక్ రేట్ తో తదైన పెర్ఫార్మెన్స్ ఇస్తున్నా... మరోవైపు ఫినిషర్ దినేష్ కార్తీక్ 251 పరుగులు (రెండు అర్ధ సెంచరీలు) సహకరిస్తున్నా... టీం పెర్ఫార్మెన్స్ లో ఉన్న భారీ లోపాలతో ఆర్సీబీ పాయింట్ల పట్టికలో అట్టడుగున నిలిచింది.