టైం వేస్ట్ చేసుకోకు ‘పవన్’!?

ప్రముఖ నటుడు ప్రకాశ్‌ రాజ్‌ ఆంధ్రప్రదేశ్‌ డిప్యూటీ సీఎం పవన్‌ కల్యాణ్‌ను ఉద్దేశించి చేసిన వ్యాఖ్యలు ప్రస్తుతం రాజకీయ వర్గాల్లో చర్చనీయాంశంగా మారాయి. తాజాగా ఓ ఇంటర్వ్యూలో ప్రకాశ్‌ రాజ్‌ జాతీయ అవార్డులతో పాటు రాజకీయాలపై తన అభిప్రాయాలను వెల్లడించారు. ఈ క్రమంలో పవన్‌ కల్యాణ్‌ రాజకీయ ప్రస్థానం, ప్రస్తుత కార్యాచరణపై ఆయన చేసిన వ్యాఖ్యలు ప్రాధాన్యత సంతరించుకున్నాయి.

ప్రకాశ్‌ రాజ్‌ తొలుత పవన్‌ కల్యాణ్‌ రాజకీయాల్లోకి వచ్చిన తొలినాళ్లలో ప్రజల సమస్యల గురించి మాట్లాడిన విషయాన్ని గుర్తు చేశారు. అయితే, ప్రస్తుతం అధికారంలో ఉన్నప్పటికీ ఆ సమస్యలపై పెద్దగా దృష్టి సారించడం లేదనే భావనను ఆయన వ్యక్తం చేయడం గమనార్హం. "ఇదేం సినిమా కాదు.. సమయం ఎందుకు వృథా చేస్తున్నారు?" అంటూ ఆయన చేసిన వ్యాఖ్యలు పవన్‌ కల్యాణ్ రాజకీయ శైలిని, ఆయన ప్రాధాన్యతలను ప్రశ్నించే విధంగా ఉన్నాయి. అధికారంలో ఉండి ప్రజల సమస్యలను పరిష్కరించకుండా కాలయాపన చేస్తున్నారనే అర్థం వచ్చేలా ఆయన మాట్లాడటం పవన్ అభిమానులకు ఏమాత్రం నచ్చడం లేదు. ప్రకాష్ రాజ్ ను ట్రోల్ చేయడం ప్రారంభించారు.

ఇక తిరుపతి లడ్డూ వివాదంపై ప్రకాశ్‌ రాజ్‌ చేసిన వ్యాఖ్యలు కూడా చర్చనీయాంశమయ్యాయి. తాను సనాతన ధర్మానికి వ్యతిరేకిని కాదని స్పష్టం చేసిన ఆయన.. ఇది చాలా సున్నితమైన అంశమని అభిప్రాయపడ్డారు. భక్తుల మనోభావాలకు సంబంధించిన విషయం కాబట్టి, ఇలాంటి విషయాల్లో మాట్లాడేటప్పుడు సరైన ఆధారాలతో జాగ్రత్తగా ఉండాలని సూచించారు. ఒకవేళ లడ్డూ తయారీలో నిజంగానే కల్తీ జరిగి ఉంటే, అందుకు బాధ్యులైన వారిని వెంటనే శిక్షించాలని ఆయన డిమాండ్ చేయడం సమంజసంగా కనిపిస్తోంది. ఈ వ్యాఖ్యల ద్వారా ప్రకాశ్‌ రాజ్‌ ఒకవైపు తన అభిప్రాయాన్ని స్పష్టంగా తెలియజేస్తూనే, మరోవైపు వివాదాన్ని మరింత రాజేయకుండా జాగ్రత్త పడినట్లు కనిపిస్తోంది.

కాగా ప్రకాశ్‌ రాజ్‌ ఇలాంటి వ్యాఖ్యలు చేయడం ఇదే మొదటిసారి కాదు. గతంలోనూ లడ్డూ వివాదం విషయంలో ఆయన సోషల్ మీడియా వేదికగా పవన్‌ను ఉద్దేశించి పోస్టులు పెట్టారు. ఆ సమయంలో పవన్‌ కల్యాణ్ కూడా స్పందిస్తూ ప్రకాశ్‌ రాజ్‌ తనకు మిత్రుడే అయినప్పటికీ ఆ విధంగా కామెంట్ చేయాల్సిన అవసరం లేదని అన్నారు. ఈ ఘటనల నేపథ్యంలో చూస్తే .. పవన్‌ కల్యాణ్ - ప్రకాశ్‌ రాజ్‌ మధ్య కొంతకాలంగా రాజకీయపరమైన అభిప్రాయ భేదాలు ఉన్నట్లు స్పష్టమవుతోంది.

మొత్తంగా చూస్తే ప్రకాశ్‌ రాజ్‌ చేసిన తాజా వ్యాఖ్యలు పవన్‌ కల్యాణ్ రాజకీయ జీవితంలోని లోటుపాట్లను ఎత్తిచూపిస్తోంది. అధికారంలో ఉన్న వ్యక్తిగా ప్రజల సమస్యలపై మరింత దృష్టి సారించాలనే సందేశాన్ని ప్రకాశ్‌ రాజ్‌ తన వ్యాఖ్యల ద్వారా పరోక్షంగా అందించినట్లు కనిపిస్తోంది. అయితే, ఈ వ్యాఖ్యలపై పవన్‌ కల్యాణ్ ఎలా స్పందిస్తారో చూడాలి. రానున్న రోజుల్లో ఈ ఇద్దరి మధ్య మాటల యుద్ధం కొనసాగుతుందా లేక ఇక్కడితో ముగుస్తుందా అనేది వేచి చూడాలి. ఏది ఏమైనప్పటికీ, ప్రకాశ్‌ రాజ్‌ వ్యాఖ్యలు ఆంధ్రప్రదేశ్ రాజకీయాల్లో ఒక కొత్త చర్చకు తెరలేపాయి అనడంలో సందేహం లేదు.