స్పృహ తప్పిన ఫైలెట్.. గాల్లోనే చక్కర్లు కొట్టిన విమానం.. భయానక పరిస్థితి!

గాల్లో ప్రయాణిస్తున్న విమానంలో ఒక్కసారిగా పైలట్ స్పృహ తప్పిపోతే ఎలా ఉంటుంది. ఊహించుకుంటేనే భయానకంగా ఉంది కదూ. సరిగ్గా అలాంటి ఘటనే గతేడాది లుఫ్తాన్సా విమానంలో జరిగింది. స్పెయిన్‌కు వెళ్తున్న ఈ విమానంలో కో-పైలట్ హఠాత్తుగా స్పృహ కోల్పోవడంతో ఏకంగా 10 నిమిషాల పాటు విమానం పైలట్ లేకుండానే గాల్లో చక్కర్లు కొట్టింది. ఆ తర్వాత ఏం జరిగిందో తెలుసుకుంటే షాక్ అవుతారు.

గతేడాది ఫిబ్రవరి 17న ఫ్రాంక్‌ఫర్ట్ నుంచి స్పెయిన్‌లోని సెవిల్లేకు లుఫ్తాన్సా ఎయిర్‌బస్ A321 విమానం బయలుదేరింది. విమానం గాల్లో ఉండగా కెప్టెన్ బాత్రూమ్‌కు వెళ్లారు. కాక్‌పిట్‌లో ఒంటరిగా ఉన్న కో-పైలట్ హఠాత్తుగా స్పృహ కోల్పోయాడు. ఈ విషయాన్ని స్పానిష్ ప్రమాద పరిశోధన సంస్థ CIAIAC నివేదిక ద్వారా వెల్లడించింది.

199 మంది ప్రయాణికులు, ఆరుగురు సిబ్బందితో ఉన్న ఆ విమానం ఏకంగా 10 నిమిషాల పాటు పైలట్ లేకుండానే విమానం గాల్లో ప్రయాణించింది. ఈ విషయాన్ని లుఫ్తాన్సా సంస్థ కూడా ధృవీకరించింది. తమ విమాన భద్రతా విభాగం కూడా దీనిపై దర్యాప్తు చేసిందని తెలిపింది. అయితే దర్యాప్తు ఫలితాలను మాత్రం వెల్లడించలేదు.

స్పృహ కోల్పోయిన కో-పైలట్ అనుకోకుండా ఫ్లైట్ కంట్రోల్స్ ఆపరేట్ చేసినప్పటికీ అదృష్టవశాత్తూ ఆటోపైలట్ వ్యవస్థ సక్రమంగా పనిచేయడంతో విమానం స్థిరంగా ప్రయాణించగలిగింది. ఈ సమయంలో కాక్‌పిట్‌లోని వాయిస్ రికార్డర్‌లో తీవ్రమైన ఆరోగ్య అత్యవసర పరిస్థితికి సంబంధించిన వింత శబ్దాలు రికార్డయ్యాయి.

కెప్టెన్ కాక్‌పిట్‌లోకి వెళ్లడానికి సాధారణ డోర్ ఓపెనింగ్ కోడ్‌ను ఐదుసార్లు ప్రయత్నించాడు. కానీ తలుపు తెరుచుకోలేదు. ఒక ఎయిర్ హోస్టెస్ కూడా లోపలున్న కో-పైలట్‌ను ఆన్‌బోర్డ్ టెలిఫోన్ ద్వారా సంప్రదించడానికి ప్రయత్నించింది. చివరికి, కెప్టెన్ ఎమర్జెన్సీ కోడ్‌ను ఉపయోగించి తలుపును తెరవడానికి ప్రయత్నించాడు. అయితే, తలుపు ఆటోమేటిక్‌గా తెరుచుకునే కొద్ది క్షణాల ముందు, అనారోగ్యంతో ఉన్నప్పటికీ కో-పైలట్ లోపలి నుంచి తలుపు తెరిచాడు.

ఆ తర్వాత పైలట్ వెంటనే అప్రమత్తమై మాడ్రిడ్‌లో అత్యవసరంగా విమానాన్ని ల్యాండ్ చేశాడు. స్పృహ కోల్పోయిన కో-పైలట్‌ను వెంటనే ఆసుపత్రికి తరలించారు. ఆటోపైలట్ వ్యవస్థ సకాలంలో స్పందించడం వల్లే పెను ప్రమాదం తప్పిందని అధికారులు తెలిపారు. ఈ ఘటనపై పూర్తిస్థాయి విచారణ కొనసాగుతోంది.