ఢిల్లీ షేక్ అయ్యేలా పవన్ 'సేన గళం'.. అసలు ఏంటిది.. ?

దేశ రాజధాని హస్తిన రాజకీయాల్లో ఇప్పుడు ఒక ప్రాంతీయ పార్టీ పేరు మారుమోగుతోంది. ఆంధ్రప్రదేశ్ రాజకీయాల్లో తనదైన ముద్ర వేసిన జనసేన అధినేత, డిప్యూటీ సీఎం పవన్ కల్యాణ్.. ఈసారి ఏకంగా ఢిల్లీ వేదికగా సరికొత్త పొలిటికల్ బాంబ్ పేల్చబోతున్నారు. సుమారు 150 మంది పార్టీ ముఖ్య నేతలతో కలిసి మూడు రోజుల పాటు ఆయన హస్తినలో చేయబోయే హడావుడి వెనుక ఒక బలమైన ఎజెండా ఉంది. ప్రాంతీయ పార్టీలు సాధారణంగా నిధుల కోసమో, రాష్ట్ర ప్రాజెక్టుల కోసమో ఢిల్లీ వెళ్లడం చూస్తుంటాం. కానీ, పవన్ కల్యాణ్ ఒక సరికొత్త పొలిటికల్ ఐడియాలజీని దేశానికి పరిచయం చేయడానికి వెళ్తుండటమే ఇక్కడ అసలు ట్విస్ట్.

పవన్ కల్యాణ్ సుదీర్ఘ ఆలోచనల నుంచి పుట్టిన సరికొత్త భావజాలమే ఈ 'సేన గళం'. ఇది కేవలం ఒక రాజకీయ విభాగం మాత్రమే కాదు.. దేశంలోని నూతన తరం యువత మనోభావాలకు అద్దం పట్టే ఒక వేదిక. ప్రస్తుతం ఉన్న యువత పాతకాలపు కుల, ప్రాంతీయ సమీకరణాల కంటే పారదర్శకతను, రాజ్యాంగ విలువలని ఎక్కువగా కోరుకుంటోంది. వారి ఆశయాలకు ఒక పొలిటికల్ షేప్ ఇస్తూ.. జనసేన కేవలం ఏపీకే పరిమితమైన ప్రాంతీయ శక్తే కాదు, దేశవ్యాప్త యువత ఆలోచనలను ప్రభావితం చేయగల జాతీయ స్థాయి సిద్ధాంతాలున్న పార్టీ అని చాటిచెప్పడమే ఈ 'సేన గళం' ముఖ్య ఉద్దేశం.

ఇటీవలి కాలంలో దేశవ్యాప్తంగా, ముఖ్యంగా తెలుగు రాష్ట్రాల్లో ఒక కొత్త వికృత ధోరణి కనిపిస్తోంది. ఎవరో వ్యక్తిగతంగా తప్పు చేస్తే.. దాన్ని ఒక సామాజిక వర్గానికి ఆపాదిస్తూ సోషల్ మీడియా వేదికగా కులాల మధ్య చిచ్చులు పెడుతున్నారు. ఇలాంటి చీప్ పాలిటిక్స్‌ను పవన్ కల్యాణ్ తీవ్రంగా వ్యతిరేకిస్తున్నారు. తప్పు చేసిన వాడిని శిక్షించాలి తప్ప, సమాజాన్ని విడదీయకూడదనే హెల్తీ మెసేజ్‌ను ఆయన బలంగా నమ్ముతున్నారు. ఈ సరికొత్త సామాజిక సామరస్య సందేశాన్ని నేషనల్ మీడియా ముఖంగా దేశవ్యాప్తంగా చర్చకు పెట్టడమే పవన్ కల్యాణ్ ప్రధాన లక్ష్యం.

ఈ ఢిల్లీ టూర్ వెనుక కేవలం ఐడియాలజీ మాత్రమే కాదు.. పక్కా పొలిటికల్ స్కెచ్ కూడా ఉంది. కేంద్రంలో ఎన్డీఏ ప్రభుత్వానికి అత్యంత నమ్మకమైన భాగస్వామిగా ఉన్న పవన్, ఒకేసారి 150 మంది క్యాడర్‌తో ఢిల్లీలో ల్యాండ్ అవ్వడం ద్వారా తన పొలిటికల్ స్ట్రెంత్‌ను బీజేపీ పెద్దలకు చూపించబోతున్నారు. ఏపీలో టీడీపీతో కలిసి సక్సెస్‌ఫుల్‌గా ప్రభుత్వం నడుపుతున్నప్పటికీ, జాతీయ స్థాయిలో జనసేనకు అంటూ ఒక ప్రత్యేక అస్తిత్వాన్ని, గుర్తింపును కాపాడుకునే వ్యూహం ఇందులో కనిపిస్తోంది. గత ఎన్నికల్లో సాధించిన 100 శాతం స్ట్రైక్ రేట్‌తో ఇప్పటికే పవన్ గ్రాఫ్ జాతీయ స్థాయిలో పీక్స్‌లో ఉంది. సనాతన ధర్మం, పర్యావరణం, గుడ్ గవర్నెన్స్ వంటి అంశాలపై ఆయన విజన్‌కు ఈ 'సేన గళం' పర్యటన ఒక లాంచ్ ప్యాడ్‌లా మారబోతోంది.