రెచ్చిపోయింటే ‘కరాచీ’ ఖతమయ్యేది..

పహల్గాం ఉగ్రదాడికి భారత సైన్యం 'ఆపరేషన్‌ సిందూర్‌' పేరుతో ప్రతీకారం తీర్చుకుంది. ఈ ఆపరేషన్‌లో భాగంగా భారత నావికాదళం పాకిస్థాన్‌లోని కరాచీ పోర్టును దిగ్బంధించినట్లు అధికారిక వర్గాలు వెల్లడించాయి. ఈ దిగ్బంధానికి స్వదేశీ విమాన వాహక నౌక ఐఎన్‌ఎస్‌ విక్రాంత్, బ్రహ్మోస్‌ క్షిపణులతో కూడిన యుద్ధ నౌకలు, జలాంతర్గాములు కీలక పాత్ర పోషించాయి.

పహల్గాంలో జరిగిన ఉగ్రదాడి అనంతర పరిణామాల్లో, పాకిస్థాన్ ప్రతిస్పందనను ముందుగానే పసిగట్టిన భారత నావికాదళం తన సముద్ర సంసిద్ధతను గణనీయంగా పెంచింది. ఇందులో భాగంగానే పాక్‌పై త్రిముఖ ఒత్తిడి వ్యూహాన్ని అమలు చేసినట్లు నావికాదళ అధికారులు తెలిపారు. ఈ వ్యూహంలో భాగంగా కరాచీ పోర్టును లక్ష్యంగా చేసుకొని 36 ఫ్రంట్‌లైన్ నావికా దళాలను మోహరించారు. వీటిలో బ్రహ్మోస్ క్షిపణులతో కూడిన ఏడు డిస్ట్రాయర్లు, మీడియం-రేంజ్ సర్ఫేస్-టు-ఎయిర్ క్షిపణులు (MRSAM), వరుణాస్త్ర హెవీవెయిట్ టార్పెడోలు ఉన్నాయి. కొత్తగా ప్రవేశపెట్టిన ఐఎన్‌ఎస్‌ తుషిల్‌తో సహా ఏడు స్టెల్త్ గైడెడ్-క్షిపణి యుద్ధనౌకలను కూడా ఈ మోహరింపులో ఉపయోగించారు.

ఐఎన్‌ఎస్‌ విక్రాంత్‌తో పాటు భారీ సంఖ్యలో యుద్ధ నౌకలు, బ్రహ్మోస్‌ క్షిపణులతో కూడిన జలాంతర్గాములను కరాచీ పోర్టు సమీపంలో మోహరించడంతో పాకిస్థాన్ నావికాదళం సమర్థవంతంగా ప్రతిస్పందించలేక కేవలం తమ నౌకాశ్రయాలకే పరిమితం కావాల్సి వచ్చిందని అధికారులు పేర్కొన్నారు. ఈ కారణంగా అంతర్జాతీయ వాణిజ్య నౌకలు సైతం కరాచీ వైపు తమ దారిని మళ్లించుకున్నాయి. ఆపరేషన్‌ సిందూర్‌ ద్వారా భారత నావికాదళం తన బలాన్ని ప్రదర్శించిందని, ఇది ఆపరేషన్ విజయవంతం కావడంలో కీలక పాత్ర పోషించిందని విశ్లేషకులు అభిప్రాయపడుతున్నారు.

పహల్గాం ఉగ్రదాడికి ప్రతిస్పందనగా భారత్ ఆపరేషన్‌ సిందూర్‌ను చేపట్టి పాక్‌లోని ఉగ్రస్థావరాలపై మెరుపు దాడులు నిర్వహించింది. మే 9 అర్ధరాత్రి, 10వ తేదీన పాకిస్థాన్‌లోని కీలక వాయుసేన స్థావరాలపై అత్యంత కచ్చితత్వంతో దాడులు చేసినట్లు భారత్ ప్రకటించింది. ఈ దాడుల్లో పూర్తి స్వదేశీ ఆయుధాలను ఉపయోగించి 11 వాయుసేన స్థావరాలను దెబ్బతీసినట్లు తెలిపింది. ముఖ్యంగా, రావల్పిండిలోని పాక్ న్యూక్లియర్‌ కమాండ్‌ కంట్రోల్‌కు సమీపంలో ఉన్న నూర్‌ఖాన్‌ ఎయిర్‌బేస్‌పైనా ఇండియన్‌ ఆర్మీ ప్రిసిషన్‌ స్ట్రైక్స్‌ చేయడం గమనార్హం. ఈ పరిణామాల నేపథ్యంలో పాకిస్థాన్ అమెరికా సహాయంతో భారత్‌తో కాల్పుల విరమణకు సంప్రదింపులు జరిపినట్లు సమాచారం.

-ప్రళయ భీకరంగా ఐఎన్‌ఎస్‌ విక్రాంత్‌

రూ.20వేల కోట్లతో నిర్మించిన ఐఎన్‌ఎస్‌ విక్రాంత్‌ను 2022 సెప్టెంబర్‌లో భారత నౌకాదళంలోకి ప్రవేశపెట్టారు. 262 మీటర్ల పొడవు, 62 మీటర్ల వెడల్పుతో భారత్‌లో నిర్మించిన అతిపెద్ద యుద్ధనౌకగా ఇది నిలిచింది. మిగ్‌-29కే యుద్ధ విమానాలు, వివిధ రకాల హెలికాప్టర్లతో సహా సుమారు 30 యుద్ధ విమానాలను ఇది మోసుకెళ్లగలదు. ఐఎన్‌ఎస్‌ విక్రాంత్ డిజైన్‌ను భారత నౌకాదళంలోని వార్‌షిప్‌ డిజైన్‌ బ్యూరో రూపొందించగా, కొచ్చిన్‌ షిప్‌ యార్డ్‌ దీని నిర్మాణాన్ని పూర్తి చేసింది. ఆత్మనిర్భర్ భారత్ స్ఫూర్తితో పూర్తిగా స్వదేశీ పరిజ్ఞానంతో నిర్మించిన ఈ విమాన వాహక నౌక, భారత నావికాదళ సామర్థ్యానికి ప్రతీకగా నిలుస్తుంది. ఆపరేషన్ సిందూర్‌లో దీని మోహరింపు భారత సైనిక శక్తిని ప్రపంచానికి చాటిచెప్పింది.