'కన్నడ' భయం: బెంగళూరును వీడనున్న కంపెనీ.. టెకీలకు కొత్త తలనొప్పి?
బెంగళూరు నగరం భారతదేశంలోని వివిధ ప్రాంతాల నుంచి, ముఖ్యంగా తెలుగు రాష్ట్రాలు, తమిళనాడు, కేరళ, ఉత్తర భారతదేశం నుంచి లక్షలాది మంది యువతకు ఉపాధి అవకాశాలను కల్పించింది.
By: Tupaki Desk | 23 May 2025 10:14 AM
ఒకప్పుడు భారతదేశపు సిలికాన్ వ్యాలీగా, ఐటీ హబ్‌గా వెలుగొందిన బెంగళూరు నగరం ప్రస్తుతం భాషాపరమైన వివాదాలతో అట్టుడుకుతోంది. స్థానికులైన కన్నడిగులు, ఇతర రాష్ట్రాల నుంచి వలస వచ్చిన వారితో భాషా విషయంలో ఘర్షణ పడుతుండటంతో, ఇది కంపెనీల కార్యకలాపాలపై తీవ్ర ప్రభావం చూపుతోంది. ఈ వివాదాలు రోజురోజుకు పెరుగుతుండడంతో ఈక్వల్ లైఫ్ అనే ఒక సంస్థ బెంగళూరును విడిచి పుణేకు మారాలని నిర్ణయించుకోవడం ఇప్పుడు పెద్ద చర్చకు దారితీసింది. ఇదే బాటలో మరిన్ని కంపెనీలు కూడా బెంగళూరును వీడే అవకాశం ఉందని సమాచారం.
బెంగళూరుకు కొత్త సవాల్
బెంగళూరు నగరం భారతదేశంలోని వివిధ ప్రాంతాల నుంచి, ముఖ్యంగా తెలుగు రాష్ట్రాలు, తమిళనాడు, కేరళ, ఉత్తర భారతదేశం నుంచి లక్షలాది మంది యువతకు ఉపాధి అవకాశాలను కల్పించింది. అయితే, ఇటీవల కాలంలో కన్నడ భాషను తప్పనిసరి చేయాలని డిమాండ్లు పెరుగుతున్నాయి. దీంతో భాషాపరమైన విభేదాలు హింసాత్మక ఘటనలకు కూడా దారితీయడం ఆందోళన కలిగిస్తోంది. ముఖ్యంగా వాణిజ్య సంస్థలు, దుకాణాలపై కన్నడ బోర్డులను తప్పనిసరి చేయడం, ఇతర భాషల వారితో కన్నడలోనే మాట్లాడాలని ఒత్తిడి చేయడం వంటి సంఘటనలు తరచుగా చోటు చేసుకుంటున్నాయి. ఈ పరిణామాలు బెంగళూరులో పనిచేస్తున్న ఉద్యోగులు, కంపెనీలకు ఆందోళన కలిగిస్తున్నాయి.
ఈక్వల్ లైఫ్ సంస్థ పుణేకు షిఫ్ట్
ఈ భాషా సంబంధిత గొడవలకు విసిగిపోయిన ఈక్వల్ లైఫ్ (Equal Life) అనే సంస్థ కీలక నిర్ణయం తీసుకుంది. ఆ సంస్థ అధినేత కౌశిక్ ముఖర్జీ ఈ మేరకు తన అధికారిక ఎక్స్ (గతంలో ట్విట్టర్) ఖాతాలో ఒక ట్వీట్ చేశారు. "వచ్చే 6 నెలల్లో మా ఆఫీస్‌ను బెంగళూరు నుంచి పుణేకు షిఫ్ట్ చేస్తాం. ఈ భాషాపరమైన గొడవల్లో మా సిబ్బందిని బాధితులు కానివ్వం" అని ఆయన స్పష్టంగా పేర్కొన్నారు.
కౌశిక్ ముఖర్జీ చేసిన ఈ ట్వీట్ బెంగళూరులో ఉన్న ఐటీ, స్టార్టప్ కంపెనీలలో తీవ్ర చర్చనీయాంశంగా మారింది. ఉద్యోగుల భద్రత, మానసిక ప్రశాంతతకు ప్రాధాన్యత ఇస్తూ, ఇలాంటి నిర్ణయం తీసుకుంది కంపెనీ.
మరిన్ని కంపెనీలు ఇదే బాట పట్టొచ్చా?
ఈక్వల్ లైఫ్ తీసుకున్న ఈ నిర్ణయం ఒక హెచ్చరిక సిగ్నల్ గా మారింది. బెంగళూరులో నెలకొన్న ప్రస్తుత పరిస్థితులు ఇలాగే కొనసాగితే, మరిన్ని కంపెనీలు కూడా ఇతర నగరాలకు తరలివెళ్లే అవకాశం ఉందని కార్పొరేట్ వర్గాలలో చర్చ జరుగుతోంది. హైదరాబాద్, పుణే, చెన్నై, నోయిడా వంటి నగరాలు ప్రత్యామ్నాయంగా నిలుస్తున్నాయి. ఈ నగరాలలో కూడా ఐటీ మౌలిక సదుపాయాలు మెరుగ్గా ఉన్నాయి.
కంపెనీలు ఇతర నగరాలకు తరలివెళ్తే, బెంగళూరు 'సిలికాన్ వ్యాలీ ఆఫ్ ఇండియా' అనే గుర్తింపుకు భంగం కలిగే అవకాశం ఉంది. అంతేకాకుండా, వేలాది మంది ఉద్యోగులు తమ ఉద్యోగాల కోసం ఇతర నగరాలకు మారాల్సి వస్తుంది. ఇది వారి కుటుంబాలపై, జీవనశైలిపై తీవ్ర ప్రభావం చూపుతుంది.
కర్ణాటక ప్రభుత్వం ఈ భాషా వివాదాలను పరిష్కరించడానికి బెంగళూరును శాంతియుతంగా, సురక్షితమైన వ్యాపార కేంద్రంగా కొనసాగించడానికి తక్షణ చర్యలు తీసుకోవాలని పారిశ్రామిక వర్గాలు కోరుతున్నాయి. లేదంటే, ఇది రాష్ట్ర ఆర్థిక వ్యవస్థకు, ఉపాధి అవకాశాలకు పెద్ద నష్టం కలిగిస్తుందని నిపుణులు హెచ్చరిస్తున్నారు.