జ్యోతి మల్హోత్రా దేశద్రోహం.. ఏడాది క్రితమే నెటిజన్ అనుమానం!
ముఖ్యంగా, గతంలో భారత్ నుంచి బహిష్కరించబడిన ఒక పాక్ హైకమిషన్ ఉద్యోగితో ఆమె దిగిన ఫొటోలు బయటపడటం ఈ కేసులో కీలకంగా మారింది.
By: Tupaki Desk | 19 May 2025 1:06 PM
పాకిస్తాన్‌కు సున్నితమైన సమాచారం చేరవేస్తున్నారనే తీవ్రమైన ఆరోపణలపై ఇటీవల అరెస్టైన యూట్యూబర్, ఇన్ఫ్లుయెన్సర్ జ్యోతి మల్హోత్రా కేసులో సంచలన విషయాలు ఒక్కొక్కటిగా వెలుగులోకి వస్తున్నాయి. ఆమె కార్యకలాపాలపై కొందరు నెటిజన్లు ఏడాది క్రితమే అనుమానం వ్యక్తం చేశారని ఇప్పుడు స్పష్టమవుతోంది. ముఖ్యంగా, గతంలో భారత్ నుంచి బహిష్కరించబడిన ఒక పాక్ హైకమిషన్ ఉద్యోగితో ఆమె దిగిన ఫొటోలు బయటపడటం ఈ కేసులో కీలకంగా మారింది.
-ఏడాది క్రితమే నెటిజన్ అనుమానం:
జ్యోతి మల్హోత్రాపై దేశద్రోహం ఆరోపణలు రాకముందే, ఆమె కార్యకలాపాలపై అప్పట్లోనే కొందరికి సందేహాలు కలిగాయి. కపిల్ జైన్ అనే ఒక నెటిజన్ గత ఏడాది మే 10న చేసిన ఒక ట్వీట్ ఇప్పుడు సోషల్ మీడియాలో వైరల్‌గా మారింది. ఆ ట్వీట్‌లో ఆయన, "ఈ మహిళపై NIA కన్నేసి ఉంచాలి. ముందు పాక్ ఎంబసీ ఈవెంట్ కు వెళ్లింది. అనంతరం ఏకంగా పాకేకే వెళ్లి వచ్చింది. ఇప్పుడు కశ్మీర్ కు వెళ్తుంది. అన్నింటికీ ఏదో లింక్ ఉంది" అని స్పష్టంగా పేర్కొన్నాడు. ఏడాది క్రితమే జ్యోతి మల్హోత్రా కదలికలపై కపిల్ జైన్ వ్యక్తం చేసిన ఈ అనుమానాలు ఇప్పుడు ఆమె అరెస్ట్ నేపథ్యంలో నిజమయ్యాయని పలువురు వ్యాఖ్యానిస్తున్నారు.
- బహిష్కృత పాక్ ఉద్యోగితో ఫొటోలు - మరో కీలక ఆధారం:
జ్యోతి మల్హోత్రా పాక్ వర్గాలతో కలిసి పనిచేసిందనడానికి మరో బలమైన ఆధారం కూడా బయటపడింది. గతంలో పహల్గామ్ ఉగ్రదాడి జరిగిన తర్వాత ఢిల్లీలోని పాక్ హైకమిషన్ కార్యాలయానికి ఒక వ్యక్తి కేక్ తీసుకొచ్చిన ఘటన అప్పట్లో సంచలనం సృష్టించింది. పాక్ ఐఎస్ఐతో కలిసి పనిచేస్తున్నట్లు ఆరోపణలు ఎదుర్కొన్న ఆ వ్యక్తిని భారత్ 'పర్సోనా నాన్-గ్రేటా' (అవాంఛిత వ్యక్తి) కింద బహిష్కరించింది. ఆశ్చర్యకరంగా జ్యోతి మల్హోత్రా అదే వ్యక్తితో కలిసి దిగిన ఫొటోలు ఇప్పుడు వైరల్ అవుతున్నాయి. పాకిస్తాన్ వర్గాలతో ఆమెకు ఉన్న సంబంధాలకు, ముఖ్యంగా భారత్ బహిష్కరించిన వ్యక్తితో ఫొటోలు బయటపడటంతో జ్యోతి మల్హోత్రా కచ్చితంగా పాక్ ఏజెంట్లకు సహకరించిందని ఈ ఆధారాలు నిరూపిస్తున్నాయని నెటిజన్లు, విశ్లేషకులు భావిస్తున్నారు.
మొత్తంగా జ్యోతి మల్హోత్రాపై వచ్చిన దేశద్రోహం ఆరోపణల తీవ్రత, ఏడాది క్రితమే ఒక నెటిజన్ ఆమెపై వ్యక్తం చేసిన అనుమానం, మరియు బహిష్కరించబడిన పాక్ హైకమిషన్ ఉద్యోగితో ఆమె ఫొటోలు వంటి ఆధారాలు ఈ కేసులో కీలక మలుపు తిప్పాయి. దర్యాప్తు సంస్థలు ఈ కోణంలోనూ లోతుగా విచారణ జరుపుతున్నాయి.