100 కి.మీ. లోపలికి చొచ్చుకెళ్లి మరీ కొట్టింది.. ఆపరేషన్ సింధూర్తో ఇద్దరు టాప్ లీడర్లు హతం!
భారత సాయుధ బలగాలు ఈ టెర్రరిస్ట్ క్యాంపులను గుర్తించి మరీ టార్గెట్ చేశాయి. ఈ క్యాంపులే భారత్పై అనేక దాడులకు కుట్రలు పన్నాయి.
By: Tupaki Desk | 7 May 2025 11:25 AM IST
పహల్గాంలో జరిగిన ఉగ్రదాడికి 15 రోజుల తర్వాత భారత్ తన ప్రతాపం చూపించింది. టెర్రరిస్టుల గుండెల్లోకి చొచ్చుకెళ్లి వారికి దిమ్మతిరిగే సమాధానం ఇచ్చింది. ఆపరేషన్ సింధూర్ పేరుతో భారత సైన్యం పాకిస్తాన్లోకి 100 కిలోమీటర్ల మేర చొచ్చుకెళ్లి లష్కర్-ఎ-తయిబా, జైషే మహమ్మద్, హిజ్బుల్ ముజాహిదీన్ వంటి భయంకరమైన టెర్రరిస్ట్ గ్రూపులకు చెందిన 9 స్థావరాలను నేలమట్టం చేసింది.
భారత సాయుధ బలగాలు ఈ టెర్రరిస్ట్ క్యాంపులను గుర్తించి మరీ టార్గెట్ చేశాయి. ఈ క్యాంపులే భారత్పై అనేక దాడులకు కుట్రలు పన్నాయి. ప్రస్తుత వార్తల ప్రకారం.. ఈ మెరుపు దాడిలో లష్కర్-ఎ-తయిబాకు చెందిన ఇద్దరు టాప్ కమాండర్లు హతమయ్యారు. ఈ ఇద్దరినీ లష్కర్ టెర్రరిస్ట్ కార్యకలాపాల మాస్టర్మైండ్లుగా భావిస్తున్నారు.
ఇద్దరు టాప్ టెర్రరిస్టులు ఖతం
హతమైన వారిలో మొదటి వాడు హఫీజ్ అబ్దుల్ మాలిక్. ఇతడు లష్కర్కు చెందిన ఒక పెద్ద ఆపరేషనల్ కమాండర్ అని తెలుస్తోంది. మురీద్కేలో ఉన్న లష్కర్ ముఖ్య కార్యాలయం ‘మర్కజ్ తయ్యబా’లో ఈ దాడి జరిగింది. ఇక రెండో వాడు ముద్దసిర్. ఇతడు లష్కర్ విదేశీ టెర్రరిస్టులతో కలిసి కుట్రలు పన్నడంలో కీలక సూత్రధారిగా ఉండేవాడు. ఈ ఇద్దరూ అక్కడికక్కడే చనిపోయారు.
ఆపరేషన్ సింధూర్ను గూఢచార సంస్థలు, సైన్యం ప్రత్యేక దళాలు కలిసి నిర్వహించాయి. ఈ చర్యను టెర్రరిజంపై భారత్ కఠినమైన విధానంగా చూడవచ్చు. అంతేకాదు, ఈ చర్య ద్వారా భారత్ అంతర్జాతీయ సమాజానికి ఒక స్పష్టమైన సందేశం పంపింది. పౌరుల భద్రతను కాపాడటంలో తాము ఏ మాత్రం రాజీపడబోమని తేల్చి చెప్పింది.
జైషే మహమ్మద్ హెడ్క్వార్టర్స్ కూడా ధ్వంసం
భారత్ టార్గెట్ చేసిన టెర్రరిస్ట్ స్థావరాల్లో జైషే మహమ్మద్ ముఖ్య కార్యాలయం కూడా ఉంది. దీనితో పాటు లష్కర్-ఎ-తయిబా, హిజ్బుల్ ముజాహిదీన్ క్యాంపులను కూడా నాశనం చేశారు. అతిపెద్ద దాడి బహవల్పూర్లో జరిగింది. ఇది అంతర్జాతీయ సరిహద్దు నుండి దాదాపు 100 కిలోమీటర్ల లోపల ఉంది. ఇక్కడే జైషే మహమ్మద్ హెడ్క్వార్టర్స్ ఉంది. ఇప్పుడు దాని పని అయిపోయింది.
అదేవిధంగా సాంబా సెక్టార్ సరిహద్దు నుండి 30 కిలోమీటర్ల లోపల మురీద్కే అనే ప్రాంతంలో లష్కర్-ఎ-తయిబా క్యాంపు ఉండేది. దానిని కూడా భూమిలో కలిపేశారు. 26/11 ముంబై టెర్రర్ దాడుల టెర్రరిస్టులు ఇక్కడి నుంచే వచ్చారు. ఇక్కడ 26/11 ముంబై దాడులకు సంబంధించిన లష్కర్-ఎ-తయిబా ట్రైనింగ్ సెంటర్ ఉండేది. అజ్మల్ కసబ్ ఇక్కడే శిక్షణ పొందాడు. ఈ స్థావరంలోనే ఆ టెర్రరిస్ట్ గ్రూప్ ముఖ్య కార్యాలయం కూడా ఉంది. డేవిడ్ హెడ్లీ, రాణా ఇక్కడికి వచ్చి వెళ్లారు. మొత్తానికి పహల్గామ్ దాడికి భారత్ గట్టిగా బదులిచ్చింది. టెర్రరిస్టుల స్థావరాలను ధ్వంసం చేసి, వారి టాప్ కమాండర్లను మట్టుబెట్టింది. ఈ ఆపరేషన్ టెర్రరిజంపై భారత్ దృఢ సంకల్పాన్ని చాటుతోంది.