గూగుల్ లో లేఆఫ్ లు.. ఏఐ ఎఫెక్ట్ యేనా?

ప్రపంచ టెక్నాలజీ రంగంలో తిరుగులేని శక్తిగా వెలుగొందుతున్న గూగుల్ సంస్థలో ఉద్యోగుల తొలగింపు ప్రక్రియ కొనసాగుతూనే ఉంది. 2023 నుంచి మొదలైన ఈ లేఆఫ్ ల పరంపర ఇప్పటికీ ఆగడం లేదు. తాజాగా మరోసారి వందల సంఖ్యలో ఉద్యోగులకు గూగుల్ ఉద్వాసన పలికింది. విశేషం ఏమిటంటే ఈసారి కేవలం సాధారణ ఉద్యోగులే కాకుండా డైరెక్టర్లు, మేనేజర్లు, వైస్ ప్రెసిడెంట్ స్థాయి ఉన్నతాధికారులు కూడా ఈ తొలగింపు జాబితాలో ఉండటం గమనార్హం. టెక్నాలజీ శరవేగంగా అభివృద్ధి చెందుతున్న ఈ తరుణంలో, గూగుల్ వంటి అగ్రగామి సంస్థ ఇలా పెద్ద సంఖ్యలో ఉద్యోగులను తొలగించడానికి ప్రధాన కారణం ఏమిటనే ప్రశ్న సర్వత్రా వినిపిస్తోంది. దీనికి సమాధానంగా చాలా మంది నిపుణులు ఆర్టిఫీషియల్ ఇంటెలిజెన్స్ (ఏఐ) రంగంలో వస్తున్న విప్లవాత్మక మార్పులనే ప్రధానంగా చూపుతున్నారు.

నిజానికి ఏఐ టెక్నాలజీ అందుబాటులోకి వస్తే భవిష్యత్తులో ఉద్యోగాల సంఖ్య గణనీయంగా తగ్గుతుందని మొదటి నుంచీ హెచ్చరికలు వస్తూనే ఉన్నాయి. చాలా సంస్థలు ఈ కొత్త టెక్నాలజీని అందిపుచ్చుకుంటూ తమ కార్యకలాపాలను మరింత సమర్థవంతంగా నిర్వహించుకోవడానికి ప్రయత్నిస్తున్నాయి. అంతేకాకుండా ఏఐని ఉపయోగించి కొత్త ఉత్పత్తులను, సేవలను అభివృద్ధి చేస్తూ కొత్త రంగాల్లోకి ప్రవేశిస్తున్నాయి. గూగుల్ కూడా అనేక కొత్త రంగాల్లో పెట్టుబడులు పెడుతున్నప్పటికీ, ఉద్యోగుల తొలగింపు ప్రక్రియను మాత్రం ఆపకపోవడం ఆందోళన కలిగిస్తోంది.

తాజాగా ఉద్యోగాలు కోల్పోయిన వారిలో ఆండ్రాయిడ్ ఆపరేటింగ్ సిస్టమ్, పిక్సెల్ ఫోన్స్, క్రోమ్ బ్రౌజర్ వంటి కీలకమైన విభాగాల ఉద్యోగులు ఉండటం గమనార్హం. గూగుల్ ఎంత మంది ఉద్యోగులను తొలగించిందనే అధికారిక సమాచారం ఇంకా వెలువడకపోయినప్పటికీ, విశ్వసనీయ వర్గాల సమాచారం ప్రకారం ఈ సంఖ్య భారీగానే ఉంటుందని తెలుస్తోంది.

గూగుల్ గతంలోనూ పలుమార్లు ఉద్యోగులకు పింక్ స్లిప్ లు జారీ చేసింది. 2023 జనవరిలో ఒకేసారి 12 వేల మంది ఉద్యోగులను తొలగించడం టెక్ ప్రపంచాన్ని షాక్ కి గురిచేసింది. ఆ తర్వాత గతేడాది డిసెంబర్ లో ఏకంగా 10 శాతం మంది ఉద్యోగులను ఇంటికి పంపింది. ఈ పరిణామం టెక్నాలజీ రంగంలో తీవ్ర కలకలం రేపింది. ఈ షాక్ నుంచి తేరుకోకముందే, ఈ ఏడాది ఫిబ్రవరిలో క్లౌడ్ ఆపరేషన్స్ , హెచ్ఆర్ విభాగాల్లో కూడా కొందరు ఉద్యోగులు తమ ఉద్యోగాలను కోల్పోయారు.

- ఉద్యోగుల తొలగింపునకు ప్రధాన కారణాలివీ..

ఆర్టిఫీషియల్ ఇంటెలిజెన్స్ టెక్నాలజీ అభివృద్ధి చెందడంతో, అనేక పనులు స్వయంచాలకంగా జరుగుతున్నాయి. దీనివల్ల కొన్ని రకాల ఉద్యోగాల అవసరం తగ్గింది. గూగుల్ కూడా తన కార్యకలాపాల్లో ఏఐ ని విస్తృతంగా ఉపయోగిస్తుండటంతో ఉద్యోగుల సంఖ్యను తగ్గించుకుంటున్నట్లు విశ్లేషకులు భావిస్తున్నారు. ప్రపంచ వ్యాప్తంగా ఆర్థిక మాంద్యం వస్తుందనే భయాలు నెలకొన్నాయి. ముఖ్యంగా అమెరికా ఆర్థిక వ్యవస్థ మందగించే అవకాశం ఉందని నిపుణులు హెచ్చరిస్తున్నారు. ఈ నేపథ్యంలో, గూగుల్ వంటి పెద్ద సంస్థలు ముందు జాగ్రత్త చర్యగా ఖర్చులను తగ్గించుకునేందుకు ఉద్యోగులను తొలగిస్తున్నాయి. గత కొంత కాలంగా గూగుల్ లాభాల్లో ఆశించిన స్థాయిలో వృద్ధి లేదు. దీనికి పోటీ పెరగడం, ప్రకటనల ఆదాయం తగ్గడం వంటి కారణాలు ఉండవచ్చు. లాభాలను పెంచుకోవడానికి కూడా ఉద్యోగుల తొలగింపు ఒక మార్గంగా భావిస్తున్నారు. కంపెనీ తన కార్యకలాపాల ఖర్చులను తగ్గించుకోవడానికి కూడా ఉద్యోగుల తొలగింపు ఒక సాధారణమైన చర్య. ఉద్యోగుల జీతాలు, ఇతర ఖర్చులు కంపెనీకి పెద్ద మొత్తంలో భారం కలిగిస్తాయి. వాటిని తగ్గించడం ద్వారా కంపెనీ ఆర్థికంగా బలపడవచ్చు.

మొత్తానికి గూగుల్ లో జరుగుతున్న ఈ వరుస ఉద్యోగుల తొలగింపు టెక్నాలజీ రంగంలో అనేక ప్రశ్నలను లేవనెత్తుతోంది. ముఖ్యంగా ఆర్టిఫీషియల్ ఇంటెలిజెన్స్ రాబోయే రోజుల్లో ఉద్యోగాల భవిష్యత్తును ఎలా మార్చబోతుందనే దానిపై చర్చలు జరుగుతున్నాయి. గూగుల్ వంటి అగ్రగామి సంస్థ తీసుకుంటున్న ఈ నిర్ణయాలు ఇతర టెక్ కంపెనీలపై కూడా ప్రభావం చూపే అవకాశం ఉంది. రానున్న రోజుల్లో ఈ పరిస్థితి ఎలా మారుతుందో వేచి చూడాలి.