బిల్ గేట్స్ కు ఏపీలో అపూర్వస్వాగతం.. సీఎం చంద్రబాబుతో కీలక చర్చలు

మైక్రోసాఫ్ట్ వ్యవస్థాపకుడు, గేట్స్ ఫౌండేషన్ చైర్మన్ బిల్ గేట్స్ ఆంధ్రప్రదేశ్ పర్యటనకు రాగా రాష్ట్ర ప్రభుత్వం ఆయనకు అత్యంత ఘన స్వాగతం పలికింది. సోమవారం ఉదయం ప్రత్యేక విమానంలో గన్నవరం విమానాశ్రయానికి చేరుకున్న బిల్ గేట్స్ , ఆయన ప్రతినిధి బృందాన్ని డిప్యూటీ సీఎం పవన్ కళ్యాణ్, మంత్రి నారా లోకేశ్, పలువురు మంత్రులు, ఉన్నతాధికారులు సాదరంగా ఆహ్వానించారు.

గన్నవరం ఎయిర్‌పోర్ట్‌లో ఆతిథ్యం

పొగమంచు కారణంగా బిల్ గేట్స్ ప్రయాణిస్తున్న విమానం కొద్ది సేపు గాల్లోనే చక్కర్లు కొట్టిన అనంతరం ఎయిర్ ట్రాఫిక్ కంట్రోల్ అనుమతి ఇచ్చిన తర్వాత సురక్షితంగా గన్నవరం విమానాశ్రయంలో ల్యాండ్ అయింది. విమానం దిగిన వెంటనే రాష్ట్ర ప్రభుత్వ ప్రతినిధులు ఆయనకు పుష్పగుచ్ఛాలతో స్వాగతం పలికి ఆతిథ్యం అందించారు.

సచివాలయంలో స్వాగతం.. ఉన్నతస్థాయి సమావేశాలు

గన్నవరం నుంచి బిల్ గేట్స్ బృందం నేరుగా వెలగపూడి సచివాలయానికి చేరుకుంది. అక్కడ ముఖ్యమంత్రి చంద్రబాబు నాయుడు, ఉప ముఖ్యమంత్రి పవన్ కళ్యాణ్, రాష్ట్ర కేబినెట్ మంత్రులు గేట్స్‌కు ఘన స్వాగతం పలికారు. అనంతరం సీఎం ఆధ్వర్యంలో ఉన్నత స్థాయి సమావేశం జరిగింది.

ఈ సమావేశంలో గేట్స్ ఫౌండేషన్ సహకారంతో రాష్ట్రంలో అమలు అవుతున్న పలు అభివృద్ధి కార్యక్రమాలపై విస్తృతంగా చర్చించారు. ముఖ్యంగా విద్య, వైద్యం, వ్యవసాయం రంగాల్లో భాగస్వామ్యాన్ని మరింత విస్తరించేందుకు ప్రణాళికలు సిద్ధం చేసినట్లు సమాచారం.

టెక్నాలజీ ఆధారిత పాలనపై ప్రదర్శన

సమావేశం అనంతరం బిల్ గేట్స్ బృందం ఆర్టీజీఎస్ కేంద్రాన్ని సందర్శించనుంది. రియల్ టైమ్ గవర్నెన్స్ వ్యవస్థ ద్వారా రాష్ట్రంలో అమలు అవుతున్న టెక్నాలజీ ఆధారిత పాలన విధానాలను సీఎం చంద్రబాబు నాయుడు సోదాహరణగా వివరించనున్నారు. ప్రభుత్వ సేవల్లో పారదర్శకత, వేగం పెంచడంలో టెక్నాలజీ పాత్రను గేట్స్ బృందం సమీక్షించనుంది.

స్వర్ణాంధ్ర విజన్ 2047పై చర్చ

ఈ సందర్భంగా "స్వర్ణాంధ్ర విజన్ 2047" లక్ష్యాలను సీఎం ప్రజంటేషన్ రూపంలో బిల్ గేట్స్‌కు వివరించనున్నారు. ప్రజారోగ్యం, వ్యవసాయం, విద్య, డిజిటల్ సేవలు వంటి కీలక రంగాల్లో రాష్ట్రం చేపడుతున్న సంస్కరణలను వివరించి గేట్స్ ఫౌండేషన్‌తో భాగస్వామ్యాన్ని మరింత బలోపేతం చేయాలని ప్రభుత్వం భావిస్తోంది.

మెడ్‌టెక్, సంజీవని ప్రాజెక్టులపై దృష్టి

ఏపీ ప్రభుత్వం అమలు చేస్తున్న మెడ్‌టెక్, డయాగ్నస్టిక్స్ సేవలు, సంజీవని వంటి ప్రాజెక్టులపై ప్రత్యేకంగా చర్చ జరిగింది. గేట్స్ ఫౌండేషన్ సహకారంతో నడుస్తున్న సంజీవని ప్రాజెక్ట్ రాష్ట్రంలో ఆరోగ్య సేవలను గ్రామీణ ప్రాంతాలకు చేరవేయడంలో కీలక పాత్ర పోషిస్తున్నట్లు అధికారులు వివరించారు.

వ్యవసాయ రంగంలో సాంకేతికత

ఉండవల్లి సమీపంలోని వ్యవసాయ క్షేత్రాన్ని కూడా బిల్ గేట్స్ బృందం సందర్శించనుంది. అక్కడ డ్రోన్లు, ఆర్టిఫిషియల్ ఇంటెలిజెన్స్ ఆధారిత వ్యవసాయ పద్ధతులను పరిశీలించి, ఉత్పాదకత పెంపుకు కొత్త సాంకేతిక పరిజ్ఞానాల వినియోగంపై చర్చించనున్నారు.

రాష్ట్ర అభివృద్ధికి కొత్త దిశ

మొత్తంగా బిల్ గేట్స్ పర్యటనతో ఆంధ్రప్రదేశ్‌లో అభివృద్ధి కార్యక్రమాలకు కొత్త ఊపు లభించే అవకాశం ఉందని అధికారులు భావిస్తున్నారు. ముఖ్యంగా ఆరోగ్యం, విద్య, వ్యవసాయం, టెక్నాలజీ రంగాల్లో గేట్స్ ఫౌండేషన్‌తో భాగస్వామ్యం మరింత బలోపేతం అయితే రాష్ట్ర అభివృద్ధికి ఇది కీలకంగా మారనుందని విశ్లేషకులు అభిప్రాయపడుతున్నారు.