AI (కృత్రిమ మేధస్సు) వల్ల ఆ ఏడాది నాటికి 10కోట్లకు పడిపోనున్న జనాభా

ఆర్టిఫిషియల్ ఇంటిలిజెన్స్ (AI) టెక్నాలజీ వేగంగా అభివృద్ధి చెందుతున్న కొద్దీ, దాని సానుకూల ప్రభావాలతో పాటు కొన్ని ఊహించని పరిణామాల గురించి కూడా నిపుణులు హెచ్చరిస్తున్నారు. AI మన జీవితాలను సులభతరం చేస్తుందని అనుకుంటున్నా అది మానవ జనాభాపై తీవ్ర ప్రభావం చూపుతుందని, రాబోయే కొన్ని శతాబ్దాల్లో ప్రపంచ జనాభాను గణనీయంగా తగ్గిస్తుందని కొందరు నిపుణులు అంచనా వేస్తున్నారు. ఇది వినడానికి ఆశ్చర్యంగా ఉన్నా, దీని వెనుక బలమైన వాదనలు ఉన్నాయి.

అమెరికాలోని టెక్ నిపుణులు (US Tech Experts) చేసిన అంచనాల ప్రకారం.. 2300 లేదా 2380 నాటికి ప్రపంచ జనాభా కేవలం 100 మిలియన్లకు (10 కోట్లు) తగ్గవచ్చని తెలుస్తోంది. ఇది ప్రస్తుత ప్రపంచ జనాభా (సుమారు 800 కోట్లు)తో పోలిస్తే చాలా పెద్ద తగ్గుదల. ఈ అంచనాలకు ప్రధాన కారణం ఏఐ వల్ల ఉద్యోగాల భర్తీ. కృత్రిమ మేధస్సు చాలా మానవ ఉద్యోగాలను భర్తీ చేస్తుందని, దీని ప్రభావం జనన రేటు (birth rate)పై తీవ్రంగా పడుతుందని నిపుణులు పేర్కొన్నారు.

"మనం చేసే చాలా పనులను కంప్యూటర్లు, రోబోలు చేయగలవు. దీని వల్ల నిరుద్యోగం విపరీతంగా పెరిగిపోతుంది. నిరుద్యోగం పెరిగినప్పుడు ప్రజలు పిల్లల్ని కనేందుకు ఇష్టపడరు" అని నిపుణులు విశ్లేషించారు. ఆర్థిక అభద్రత, భవిష్యత్తుపై అస్పష్టత జనన రేటు తగ్గుదలకు ప్రధాన కారణాలుగా నిలుస్తాయని వారు అభిప్రాయపడ్డారు.

నిపుణుల అంచనాలకు సపోర్టుగా ఇప్పటికే ప్రపంచవ్యాప్తంగా కొన్ని దేశాల్లో జనాభా తగ్గుదల (population decline) కనిపిస్తోందని వారు గుర్తు చేశారు. ఇటీవల యూరప్ (Europe), జపాన్ (Japan), చైనా (China), దక్షిణ కొరియా (South Korea) వంటి అభివృద్ధి చెందిన దేశాల్లో జనన రేటు భారీగా పడిపోవడం, జనాభా వృద్ది మందగించడం లేదా తగ్గడం స్పష్టంగా కనిపిస్తుంది. ఈ దేశాల్లో ఇప్పటికే వృద్ధుల సంఖ్య పెరిగి, యువత సంఖ్య తగ్గుతోంది. AI విస్తరణతో ఈ ట్రెండ్ మరింత వేగవంతం కావచ్చని నిపుణులు ఆందోళన వ్యక్తం చేస్తున్నారు

ఫ్యాక్టరీలు, సేవల రంగంలో AI, రోబోటిక్స్ విస్తరణతో తక్కువ నైపుణ్యం కలిగిన ఉద్యోగాలు భారీగా కోల్పోతారు. ఇది ఆర్థిక అభద్రతకు దారితీస్తుంది. దీంతో యువత వివాహాలు చేసుకోవడం, పిల్లల్ని కనడాన్ని ఆలస్యం చేయడం లేదా పూర్తిగా నిరాకరించడం వంటి సామాజిక మార్పులు ఇప్పటికే వేగవంతమవుతున్నాయి. AI వల్ల అవసరమయ్యే నైపుణ్యాలు మారతాయి. ప్రజలు కొత్త నైపుణ్యాలను నేర్చుకోవడానికి ఎక్కువ సమయం, డబ్బు ఖర్చు చేయాల్సి రావచ్చు, ఇది కూడా కుటుంబ ప్రణాళికలను ప్రభావితం చేస్తుంది.

AI వల్ల జనాభా తగ్గుదల అనేది ఒక సుదూర భవిష్యత్ అంచనాలా కనిపించినా, దాని వెనుక ఉన్న సామాజిక, ఆర్థిక కారణాలను పరిశీలిస్తే ఇది సాధ్యమయ్యే పరిణామంగానే కనిపిస్తుంది. ఉద్యోగ మార్కెట్‌లో AI తెచ్చే మార్పులు, ఆర్థిక స్థిరత్వం లేకపోవడం, ప్రజల జీవనశైలిలో మార్పులు జనన రేటును ప్రభావితం చేస్తాయి. ఈ పరిస్థితిని నివారించడానికి ప్రభుత్వాలు, పరిశోధకులు ఇప్పుడే తగిన చర్యలు తీసుకోవాలి.