సంక్షోభం దిశగా భారత ఐటీ రంగం?

దశాబ్దాలుగా భారత ఆర్థిక వ్యవస్థకు వెన్నెముకగా నిలిచిన ఐటీ రంగం ప్రస్తుతం ఒక అపరిచిత భయం నీడలో ఉంది. ప్రపంచ ఐటీ పటంలో అగ్రగామిగా వెలుగొందుతున్న టీసీఎస్ , ఇన్ఫోసిస్, విప్రో వంటి దిగ్గజ సంస్థల భవిష్యత్తుపై విశ్లేషకులు ఆందోళన వ్యక్తం చేస్తున్నారు. గత 30 ఏళ్లుగా ఈ కంపెనీలు అనుసరిస్తున్న వ్యాపార నమూనా ఇప్పుడు ఆర్టిఫిషియల్ ఇంటెలిజెన్స్ (ఏఐ) ధాటికి కుప్పకూలే ప్రమాదం ఉందనే హెచ్చరికలు వినిపిస్తున్నాయి.

'బాడీ షాపింగ్' యుగం ముగిసినట్లేనా?

భారత ఐటీ కంపెనీల విజయ రహస్యం ప్రధానంగా "ఆర్బిట్రేజ్" లేదా "బాడీ షాపింగ్" మోడల్‌పై ఆధారపడి ఉంది. అంటే అమెరికా, ఐరోపా వంటి దేశాల్లోని క్లయింట్లకు అవసరమైన కోడింగ్‌, టెస్టింగ్, సాఫ్ట్‌వేర్ మెయింటెనెన్స్ పనుల కోసం తక్కువ వేతనానికే వేల సంఖ్యలో భారతీయ ఇంజినీర్లను సరఫరా చేయడం. లక్షలాది మంది యువతకు ఉపాధి కల్పించిన ఈ పద్ధతి ఇప్పుడు ఏఐ వల్ల ముప్పును ఎదుర్కొంటోంది.

క్లాడ్, చాట్‌జిపిటి, గిట్‌హబ్ కోపైలట్ వంటి అధునాతన ఏఐ టూల్స్ ఇప్పుడు మనుషుల కంటే వేగంగా కచ్చితత్వంతో కోడింగ్ చేయగలవు. వందల మంది డెవలపర్లు నెలల తరబడి చేసే పనిని.. ఒక సీనియర్ ఇంజినీర్ ఏఐ సహాయంతో కొన్ని రోజుల్లోనే పూర్తి చేసే స్థాయికి సాంకేతికత చేరుకుంది. దీనివల్ల కంపెనీలకు "మానవ వనరుల" అవసరం క్రమంగా తగ్గుతోంది.

జీసీసీల ప్రభావం.. ఉద్యోగ కోతలకు సంకేతాలు

కేవలం భారతీయ ఐటీ కంపెనీలే కాకుండా భారత్‌లో తమ స్వంత కార్యాలయాలను ఏర్పాటు చేసుకున్న అంతర్జాతీయ సంస్థలు కూడా ఇప్పుడు పునరాలోచనలో పడ్డాయి. ఒకప్పుడు ఖర్చు తగ్గించుకోవడానికి వేల సంఖ్యలో ఉద్యోగులను నియమించుకున్న ఈ సంస్థలు, ఇప్పుడు ఏఐ ఆటోమేషన్ ద్వారా పనులు పూర్తి చేసుకుంటున్నాయి. దీనివల్ల కొత్తగా వచ్చే గ్రాడ్యుయేట్లకు ఎంట్రీ లెవల్ ఉద్యోగాలు దొరకడం గగనంగా మారుతోంది.

రాబోయే 4 నుండి 5 ఏళ్లలో ఈ ప్రభావం మరింత తీవ్రంగా ఉంటుందని మార్కెట్ నిపుణులు అంచనా వేస్తున్నారు. ఇప్పటికే ఐటీ దిగ్గజాల ఆదాయ వృద్ధి రేటు మందగించడం, బెంచ్‌పై ఉన్న ఉద్యోగుల సంఖ్య పెరగడం వంటివి రాబోయే తుఫానుకు సంకేతాలుగా కనిపిస్తున్నాయి.

ఐటీ రంగం ఎదుర్కొంటున్న ప్రధాన సవాళ్లు

ఏఐ వల్ల తక్కువ మందితోనే పనులు పూర్తవుతుండటంతో పాశ్చాత్య కంపెనీలు తమ ప్రాజెక్టులను భారత్‌కు అవుట్‌సోర్స్ చేయకుండా తమ సొంత దేశాల్లోనే చిన్న టీమ్‌లతో నిర్వహించుకోవాలని చూస్తున్నాయి. కేవలం కోడింగ్ తెలిసిన ఇంజినీర్ల కంటే ఏఐని నడిపించగలిగే "ఏఐ ఆర్కిటెక్ట్స్" అవసరం పెరిగింది. అయితే ఈ స్థాయి నైపుణ్యం మన ప్రస్తుత విద్యా వ్యవస్థలో లోపించింది.

ఐటీ కంపెనీలు ఇప్పటివరకు "గంటల ప్రాతిపదికన" ఆదాయం పొందేవి. ఏఐ పనులను వేగవంతం చేయడంతో గంటల సంఖ్య తగ్గి ఆదాయం కూడా పడిపోయే ప్రమాదం ఉంది.

విద్యా రంగంపై పడే ప్రభావం

ఈ మార్పుల వల్ల ఇంజినీరింగ్ విద్యపై ఉన్న క్రేజ్ తగ్గే అవకాశం ఉంది. ఇప్పటివరకు సురక్షితమైన కెరీర్‌గా భావించిన కంప్యూటర్ సైన్స్ (సీఎస్ఋ) విభాగంలో చదివే విద్యార్థులు ఇప్పుడు ప్రాంప్ట్ ఇంజినీరింగ్, మెషిన్ లెర్నింగ్ వంటి నైపుణ్యాలను సొంతంగా నేర్చుకోవాల్సిన పరిస్థితి ఏర్పడింది. కేవలం డిగ్రీ ఉంటే సరిపోదని, మారుతున్న టెక్నాలజీకి అనుగుణంగా ప్రతి ఆరు నెలలకు ఒకసారి అప్‌డేట్ అవ్వాల్సిందేనని నిపుణులు హెచ్చరిస్తున్నారు.

భారత ఐటీ రంగం చరమాంకానికి చేరుకుందని చెప్పలేం కానీ అది రూపాంతరం చెందాల్సిన సమయం ఆసన్నమైంది. పాత పద్ధతులను వదిలి, ఏఐ-ఫస్ట్ వ్యూహాలను అవలంబించే కంపెనీలు మాత్రమే ఈ విప్లవంలో మనుగడ సాగించగలవు. లేదంటే దశాబ్దాల పాటు నిర్మించుకున్న సామ్రాజ్యాలు పేకమేడల్లా కూలిపోయే ప్రమాదం పొంచి ఉంది.