స‌క్సెస్ పుల్ 'గోల' మ‌ళ్లీ మొద‌ల‌వుతుందా?

బాలీవుడ్ కామెడీ ప్రాంచైజీ 'గోల్ మాల్' ఎంత పెద్ద స‌క్సెస్ అయిందో చెప్పాల్సిన ప‌నిలేదు. అజ‌య్ దేవ‌గ‌న్ ప్ర‌ధాన పాత్ర‌లో రోహిత్ శెట్టి ద‌ర్శ‌క‌త్వంలో రూపొందిన ప్రాంచైజీ ఇది. 'గోల్ మాల్ ఫ‌న్ అన్ లిమిటెడ్', ' గోల్ మాల్ రిట‌ర్న్స్', 'గోల్ మాల్ 3', 'గోల్ మాల్ ఏగైన్' అన్ని చిత్రాలు కూడా బాక్సాఫీస్ వ‌ద్ద పోటా పోటీగా విజ‌యం సాధించాయి. చివ‌రిగా 'గోల్ మాల్ ఏగైన్' 2017లో రిలీజ్ అయింది.

ఆ త‌ర్వాత మ‌ళ్లీ ఆ సిరీస్ జోలికి ఈ ద్వ‌యం వెళ్ల‌లేదు. తాజాగా 'గోల్ మాల్ -5' ప్ర‌క‌ట‌న వ‌చ్చేసింది. అదే క్రేజీ కాంబినేష‌న్ లో ఈ సినిమా 2026 లో మొద‌ల‌వుతున్న‌ట్లు ప్ర‌క‌టించారు. ప్ర‌స్తుతం స్క్రిప్ట్ సిద్ద‌మవుతోంది. అ ప‌నుల‌న్నీ పూర్త‌వ్వ‌డానికి ఏడాది స‌మ‌యం తీసుకుంటున్నారు. ప్ర‌స్తుతం రోహిత్ శెట్టి, జాన్ అబ్ర‌హంతో క‌లిసి రాకేష్ మారియా బ‌యోపిక్ తెర‌కెక్కించే ప‌నిలో బిజీగా ఉన్నాడు.

ముంబైలో షూటింగ్ జ‌రుగుతోంది. ఈ సినిమా పూర్త‌యిన త‌ర్వాత రోహిత్ శెట్టి 'గోల్ మాల్ -5' ప‌నుల్లో బిజీ కానున్నాడు. వ‌చ్చే ఏడాది మొద‌లు పెట్టి 2027 ప్ర‌ధ‌మార్ధంలో రిలీజ్ చేయాల‌ని స‌న్నాహాలు చేస్తున్నారు. దీంతో గోల్ మాల్ అభిమానులకు ఈ న్యూస్ స్పెష‌ల్ ట్రీట్ లా మారింది. ఈ ప్రాంచైజీకి ప్ర‌త్యేకమైన అభిమానులున్నారు. గోల్ మాల్ కామెడీకి థియేట‌ర్లో ప‌డి ప‌డి న‌వ్విన ఆడియ‌న్స్ ఎంతో మంది.

అజ‌య్ దేవ‌గ‌ణ్ తో పాటు మ‌రికొన్ని పాత్ర‌ల‌ను రోహిత్ శెట్టి తీర్చిదిద్దిన తీరుతోనే ఇంత పెద్ద స‌క్సెస్ సాధ్య‌మైంది. అజ‌య్- రోహిత్ శెట్టి మ‌ధ్య మంచి అండ‌ర్ స్టాండింగ్ ఉంటుంది. ఇద్ద‌రి కాంబినేష‌న్ లో 'సింగం' ప్రాంచైజీ కూడా ఉన్న సంగ‌తి తెలిసిందే.