ఇద్దరు హీరోలూ దెయ్యాలుగానే కనిపిస్తున్నారు!

సాధారణంగా స్టార్‌ హీరోలు దెయ్యాలుగా కనిపించడం జరగదు. అది ఎంత హారర్‌ సినిమా అయినా.. వారు దెయ్యాల నుంచి అందరిని విముక్తి కలిగించే వారుగానో.. అందరికీ ధైర్యాన్ని ఇచ్చేవారిలాగానో కనిపిస్తారు కానీ.. వారే దెయ్యాలుగా కనిపించడం మాత్రం కొంచెం అరుదు. అయితే 'ముని' వంటి సినిమాల్లో హీరోలే దెయ్యాలయిపోవడం.. హీరోలకు దెయ్యం పట్టడం జరుగుతోంది!

మరి ఇదే సమయంలో ఇద్దరు హీరోలు దెయ్యాలుగా వస్తుండటం విశేషం. వారే సూర్య, కార్తీలు. ఈ అన్నదమ్ములిద్దరి తదుపరి సినిమాల్లో వీరు దెయ్యాలుగా కనిపించనున్నారని తెలుస్తోంది. విక్రమ్‌ప్రభు దర్శకత్వంలో వస్తున్న సినిమాలో సూర్య, ఇంకా పేరు ఖరారుకానీ తన తదుపరి సినిమాలో కార్తీలు దెయ్యాలుగా కనిపించనున్నారని తెలుస్తోంది!

మరి ఇలా అన్నదమ్ములిద్దరూ ఒకే బాణీలో వస్తున్నారు. 'రాక్షసుడు' సినిమాలో సూర్య దాదాపు అరగంటసేపు దెయ్యంగా కనిపించనున్నాడట. కార్తీ దెయ్యం సినిమా గురించి పూర్తి వివరాలు రావాల్సి ఉంది. మరి వీరిలో ఎవరు బాగా భయపెడతారోచూడాలి. అలా భయపెట్టినవారే కదా విజేతలు!