ఆ డీల్స్ కు ఒప్పుకోకుండా 'జాతి రత్నాలు'ను కాపాడారుః నవీన్ పొలిశెట్టి

ఏజెంట్ సాయి శ్రీనివాస ఆత్రేయ సినిమాతో హీరోగా తెలుగు ప్రేక్షకులకు పరిచయం అయిన నవీన్‌ పొలిశెట్టి మొదటి సినిమాతోనే ట్యాలెంట్‌ ఉన్న కుర్రాడు అంటూ విమర్శకుల ప్రశంసలు దక్కించుకున్నాడు. ఈయన జాతి రత్నాలు సినిమాతో ఈ వారం ప్రేక్షకుల ముందుకు వచ్చేందుకు సిద్దం అయ్యాడు. ఈ సినిమా ప్రమోషన్‌ కార్యక్రమాల్లో నవీన్ పొలిశెట్టి జోష్‌ అతడు షో ల్లో చేస్తున్న సందడి చూసి భవిష్యత్తులో మంచి స్టార్‌ అవుతాడంటూ విశ్లేషకులు అభిప్రాయం వ్యక్తం చేస్తున్నారు. జాతి రత్నాలు ప్రీ రిలీజ్ వేడుక వరంగల్ లో భారీ ఎత్తున నిర్వహించారు. ఈ వేడుకలో విజయ్ దేవరకొండ ముఖ్య అతిథిగా హాజరయ్యారు.

ఈ సందర్బంగా నవీన్ పొలిశెట్టి మాట్లాడుతూ.. ఏజెంట్‌ సాయి శ్రీనివాస్ ఆత్రేయతో ఈ ప్రయాణం మొదలైంది. ఇప్పుడు జాతి రత్నాల వరకు వచ్చింది. ప్రభాస్‌ అన్న వల్ల డార్లింగ్ రత్నాలుగా.. విజయ్ దేవరకొండ వల్ల రౌడీ రత్నాలుగా ఈ సినిమా మారిపోయింది. ఎక్కడో యూట్యూబ్‌ వీడియోలు చేసుకుంటూ ఉండే వాళ్లం ఇలా మీముందుకు నాగీ.. స్వప్న.. ప్రియాంక గారు తీసుకు వచ్చారు. వారే ఈ సినిమాకు అసలైన రత్నాలు. హీరో అవ్వాలని వచ్చా కాని ఎవరిని కలవాలి ఎలా కలవాలి అనే విషయాలు తెలియవు. స్టూడియోల్లో ఎలా అప్రోచ్‌ అవ్వాలనే విషయం కూడా తెలియదు. అలాంటి సమయంలో ఓ ప్లాట్ ఫామ్‌ ఇచ్చి ఎంకరేజ్ చేసినందుకు కృతజ్ఞతలు.

పాన్ ఇండియా స్టార్‌ డం ఉన్న విజయ్ దేవరకొండను పదేళ్ల క్రితం థియేటర్ వర్క్ షాప్ లో కలిశాను. మళ్లీ ఇప్పుడు ఈ వేడుకకు ఆయన రావడం చాలా మెమోరబుల్‌ మూమెంట్‌. లాక్ డౌన్ సమయంలో ఈ సినిమాకు ఓటీటీ నుండి చాలా ఆఫర్లు వచ్చాయి. కాని ఆ డీల్స్ కు ఒప్పుకోకుండా జాతి రత్నాలను కాపాడుకుంటూ వచ్చారు. సినిమా తో థియేటర్లలోనే ప్రేక్షకులను ఎంటర్‌ టైన్‌ చేయాలని జాతి రత్నాలను భద్రంగా కాపాడుకుంటూ వచ్చారు. నవ్వు జీవితంలో చాలా ముఖ్యం. ఆ నవ్వును మీతో పంచుకునేందుకు ఈనెల 11న వస్తున్నాం అన్నాడు.