లోకేష్ కనగరాజ్ ఇక నుండి ప్రతి సినిమాలో అదే తీరు...!

ఇండస్ట్రీలో ఎంతో మంది దర్శకులు ఉంటారు. వందల మంది దర్శకుల్లో కొద్ది మంది మాత్రం చాలా విభిన్నంగా కనిపిస్తూ ఉంటారు. వారి స్టైల్‌ యూనిక్ గా ఉండటంతో సినిమాలు సక్సెస్ అయినా ప్లాప్‌ అయినా కూడా జనాలు వారి సినిమాల గురించి.. వారి గురించి మాట్లాడుకుంటూ ఉంటారు. కొన్ని సినిమాలు సక్సెస్ అయినా కూడా దర్శకుల గురించి పెద్ద చర్చ ఉండదు.

కాని ఇటీవల విడుదల అయ్యి మంచి విజయాన్ని సొంతం చేసుకున్న 'విక్రమ్‌' సినిమా యొక్క దర్శకుడి గురించి ప్రముఖంగా చర్చ జరుగుతోంది. లోకేష్ కనగరాజ్... ఈ పేరు పాన్ ఇండియా రేంజ్ లో మారుమ్రోగుతోంది. రాజమౌళి మరియు ప్రశాంత్ నీల్ ల రేంజ్ లో లోకేష్‌ కనగరాజ్ గురించి మాట్లాడుకోవడం మనం వింటూనే ఉన్నాం.

హాలీవుడ్‌ మార్క్‌ స్క్రీన్ ప్లే మరియు పాత్రల కంటిన్యూషన్ ను లోకేష్ కనగరాజ్ ఇండియన్‌ సినీ ప్రేక్షకులకు చూపిస్తూ తనదైన శైలిలో సక్సెస్ లను దక్కించుకుంటున్నాడు. విక్రమ్‌ సినిమాలో తన గత చిత్రం ఖైదీ యొక్క పాత్రను ఇన్వాల్వ్ చేయడం ద్వారా ప్రేక్షకులను సర్‌ ప్రైజ్ చేసిన లోకేష్‌ కనగరాజ్ ముందు ముందు తాను చేయబోతున్న ప్రతి సినిమాలో కూడా ఇలాగే ప్రేక్షకులను సర్‌ ప్రైజ్ చేయబోతున్నట్లుగా సమాచారం అందుతోంది.

లోకేష్ తదుపరి సినిమా ను తమిళ సూపర్ స్టార్‌ విజయ్‌ తో చేయబోతున్నట్లుగా వార్తలు వస్తున్నాయి. ఆ తర్వాత ఖైదీ 2 సినిమాను మొదలు పెట్టబోతున్నాడని తెలుస్తోంది. భవిష్యత్తులో విక్రమ్ సినిమాకు కూడా సీక్వెల్స్‌ ను తీయాలని భావిస్తున్నట్లుగా లోకేష్ కనగరాజ్‌ భావిస్తున్నాడు.

మొత్తానికి లోకేష్ ఇప్పటి వరకు చేసిన సినిమాలకు.. ఇక నుండి చేయబోతున్న ప్రతి సినిమాకు కూడా ఒకదానితో ఒకటి లింక్‌ ఉండేలా ప్లాన్‌ చేస్తున్నాడు. ఇలా కొన్ని హాలీవుడ్‌ సినిమాల్లో మాత్రమే చూస్తాం. తెలుగు లేదా ఇండియన్‌ సినిమా స్క్రీన్‌ పై ఇలాంటి కాన్సెప్ట్‌ తో సినిమాలు రాలేదు. తెలుగు లో కూడా లోకేష్ కనగరాజ్ సినిమాలు చేసేందుకు సిద్ధం అవుతున్నాడట.

లోకేష్‌ కనగరాజ్‌ తో టాలీవుడ్‌ ప్రముఖ స్టార్‌ హీరోలు చర్చలు జరుపుతున్నారని తెలుస్తోంది. విక్రమ్‌ సినిమా సూపర్ డూపర్ హిట్ అవ్వడంతో ఏడాదికి రెండు సినిమాలకు తగ్గకుండా లోకేష్ సినిమాలు చేయాలని ప్లాన్‌ చేస్తున్నాడట.