అప్పుడు నన్ను తక్కువ అంచనా వేశారు… ఆదిత్యధర్ భావోద్వేగం

ఒకప్పుడు అక్షరాలు చదవడానికి ఇబ్బంది పడ్డ పిల్లాడు.. నేడు దేశం గర్వించే బ్లాక్ బస్టర్ సినిమాలకు దర్శకుడు! క్రికెట్ కల చెదిరినా, రాసుకున్న కథలు పరులపాలైనా కుంగిపోకుండా పోరాడిన ఆదిత్య ధర్ ప్రయాణం అసాధారణం. 'ఉరి', 'ధురంధర్' వంటి చిత్రాలతో బాలీవుడ్ బాక్సాఫీస్‌ను షేక్ చేస్తున్న ఈ సెన్సేషనల్ డైరెక్టర్ సక్సెస్ స్టోరీ, ఓటమి అంచున ఉన్న ప్రతి ఒక్కరికీ ఒక కొత్త పాఠం. కష్టాలను ఎదిరించి నిలిచిన ధీరుడి కథ ఇది!

అక్షర యుద్ధం నుండి వెండితెర దాకా:

ఆదిత్య ధర్ చిన్నతనం మిగతా పిల్లల్లా సాఫీగా సాగలేదు. ఆయనకు 'డిస్లెక్సియా' అనే సమస్య ఉండటంతో అక్షరాలను గుర్తించడం చాలా కష్టమయ్యేది. 12 ఏళ్ల వయసు వచ్చేదాకా కనీసం ఒక పేజీ కూడా సరిగ్గా చదవలేకపోయేవారు. చదువులో వెనుకబడటంతో అందరూ తక్కువ అంచనా వేశారు. కానీ, అదే సమయంలో తన తల్లి దగ్గరకు వచ్చే కళాకారులను చూస్తూ సంగీతం, నాటకాలపై ఆసక్తి పెంచుకున్నారు. చదవలేని లోటును వినడం ద్వారా భర్తీ చేసుకుని, భాషపై పట్టు సాధించారు. ఇక అలా తన బలహీనతనే బలమైన ఆయుధంగా మార్చుకుని దర్శకత్వం వైపు అడుగులు వేశారు.

క్రికెట్ కల చెదిరిన వేళ:

సినిమాలకంటే ముందు ఆదిత్యకు క్రికెట్ అంటే ప్రాణం. ఆఫ్‌ స్పిన్నర్‌గా రాణిస్తూ టీమ్ ఇండియాకు ఆడాలనే లక్ష్యంతో ఉండేవారు. 2001లో అండర్-19 జట్టుకు ఎంపికవుతానని ఆశించినా, చివరి నిమిషంలో రాజకీయాల వల్ల అవకాశం చేజారిపోయింది. ఇక ఆ ఓటమి తనను ఎంతో బాధించినా, అక్కడే ఆగిపోలేదు. "ఒక తలుపు మూసుకుంటే మరో తలుపు తెరుచుకుంటుంది" అన్నట్టుగా మళ్లీ తన క్రియేటివ్ రంగంపై దృష్టి పెట్టారు. ముంబయి వచ్చి అవకాశాల కోసం హోటల్ రిసెప్షనిస్టుగా, రేడియో జాకీగా కూడా పని చేస్తూ తన కలను వదలకుండా పోరాడారు.

పరులపాలైన కథ.. దక్కిన జాతీయ అవార్డు:

ముంబయిలో అసిస్టెంట్ డైరెక్టర్‌గా చేరిన కొత్తలో ఆదిత్యకు ఎన్నో కష్టాలు ఎదురయ్యాయి. ఒక భారీ సినిమాకు కథ అందించి, షూటింగ్ మొదలవుతుందన్న తరుణంలో మరో పెద్ద దర్శకుడు ఆ ప్రాజెక్ట్‌ను తన్నుకుపోయాడు. కనీసం పేరు కూడా ఇవ్వకుండా మోసం చేసినా ఆదిత్య నిరుత్సాహపడలేదు. చివరకు 2017లో ఎన్నో కష్టాల మధ్య 'ఉరి' సినిమా స్క్రిప్ట్ సిద్ధం చేసి నిర్మాతను ఒప్పించారు. ఇక 30 కోట్లతో తీసిన ఆ సినిమా 300 కోట్లు వసూలు చేయడమే కాకుండా, ఆయనకు ఉత్తమ దర్శకుడిగా జాతీయ అవార్డును తెచ్చిపెట్టింది. ఓటములే తనను ఇంతటి విజేతను చేశాయని ఆయన నమ్ముతారు.

ధురంధర్‌గా నిలిచిన ధీశాలి:

'ఉరి' విజయం తర్వాత విక్కీ కౌశల్‌తో మొదలుపెట్టిన 'అశ్వత్థామ' కరోనా వల్ల ఆగిపోయింది. అయినా చలించని ఆదిత్య, వెంటనే 'ధురంధర్' కథను సిద్ధం చేశారు. ఈ సినిమా ఎంతటి ప్రభావం చూపిందంటే, అగ్ర హీరోలంతా పోటీ పడి మరీ ఇందులో నటించారు. అక్షరాలు రాని స్థాయి నుండి అగ్ర దర్శకుడిగా ఎదిగిన ఆదిత్య ప్రయాణం యువతకు ఒక స్ఫూర్తిమంత్రం. లక్ష్యం కోసం శ్రమిస్తే, కాలం మనల్ని వెతుక్కుంటూ వస్తుందని ఆయన నిరూపించారు. ఓటమి అనేది ముగింపు కాదు, అది గొప్ప విజయానికి నాంది అని చాటి చెబుతూ తన ప్రయాణాన్ని కొనసాగిస్తున్నారు.