అమెరికాలో రెచ్చిపోయిన టెక్సాస్ గవర్నర్ అభ్యర్థి.. భారతీయ సంస్కృతిని హేళన చేస్తూ కెల్లీ స్మిత్ వివాదాస్పద పోస్ట్!

అమెరికాలో ప్రవాస భారతీయులను లక్ష్యంగా చేసుకుని జరుగుతున్న విద్వేష ప్రచారం మరోసారి కలకలం రేపుతోంది. ముఖ్యంగా టెక్సాస్ రాష్ట్రంలో భారతీయుల సంఖ్య.. వారి ఆర్థిక ఎదుగుదలపై అసహనం పెంచుకున్న కొందరు స్థానిక నాయకులు, విద్వేషపూరిత వ్యాఖ్యలతో సమాజంలో చీలిక తెచ్చే ప్రయత్నం చేస్తున్నారు. తాజాగా టెక్సాస్ గవర్నర్ పదవికి పోటీ చేస్తానని ప్రకటించుకున్న కెల్లీ స్మిత్ అనే మహిళ, భారతీయ సంస్కృతిని, సంప్రదాయాలను కించపరుస్తూ చేసిన సోషల్ మీడియా పోస్టులు అమెరికాలోని భారతీయ సమాజంలో తీవ్ర ఆగ్రహావేశాలను రగిలిస్తున్నాయి.

ఏఐ ఫోటోతో హేళన.. సంస్కృతిపై దాడి

కెల్లీ స్మిత్ తన సోషల్ మీడియా ఖాతాలో ఏఐ సహాయంతో రూపొందించిన ఒక వికృతమైన ఫోటోను పంచుకున్నారు. ఆ ఫోటోలో ఆమె భారతీయ సంప్రదాయ దుస్తులను ధరించి.. వెనుక ఒక దేవాలయాన్ని పోలిన నేపథ్యాన్ని ఉంచారు. కేవలం ఫోటోతో ఆగకుండా భారతీయుల అస్తిత్వాన్ని వెక్కిరిస్తూ ఆమె రాసిన వ్యాఖ్యలు అత్యంత వివాదాస్పదంగా మారాయి. "నేను కూడా భారతీయురాలిగా మారిపోవాలని నిర్ణయించుకున్నాను. ఎందుకంటే భారతీయులే అసలైన అమెరికన్లు అని చెప్పుకుంటున్నారు కదా!" అంటూ ఆమె వ్యంగ్యాస్త్రాలు సంధించారు. తన పేరును ఉద్దేశపూర్వకంగా తప్పుగా రాస్తూ భారతీయ పేర్లను హేళన చేశారు.

ధార్మిక విశ్వాసాలను కించపరిచేలా వ్యాఖ్యలు

భారతీయులు అత్యంత పవిత్రంగా భావించే దేవాలయాలను, వారి ఆహార నియమాలను కెల్లీ స్మిత్ తన పోస్టులో అసభ్యకరంగా ప్రస్తావించారు. "నేను టెంపుల్‌కు బూట్లు వేసుకుని వెళ్తాను, అక్కడ కూర్చుని హాంబర్గర్లు తింటాను. ఎందుకంటే నా టెక్సన్ సంస్కృతిని నేను వదులుకోలేను. మీరందరూ కూడా నాలాగే ఇండియన్లుగా మారిపోండి.. టెంపుల్స్‌లో స్టేక్స్ గ్రిల్ చేయండి" అంటూ ఆమె చేసిన వ్యాఖ్యలు హిందూ సమాజం యొక్క ధార్మిక భావాలను తీవ్రంగా గాయపరిచాయి. గోమాంసం భక్షించడాన్ని ప్రోత్సహిస్తూ ఆలయ పవిత్రతను దెబ్బతీసేలా ఆమె మాట్లాడటంపై సర్వత్రా విమర్శలు వ్యక్తమవుతున్నాయి.

క్షమాపణలు లేవు.. పైగా సమర్థన!

ఈ వ్యాఖ్యలపై నెటిజన్లు, భారతీయ సంఘాలు మండిపడటంతో కెల్లీ స్మిత్ వెనక్కి తగ్గకపోగా మరింత వివాదాస్పదంగా స్పందించారు. తన పోస్టును ఒక 'జోక్'గా కొట్టిపారేస్తూ టెక్సాస్‌లో భారతీయుల ఆధిపత్యం పెరిగిపోతోందంటూ తన అక్కసును వెళ్లగక్కారు. "టెక్సాస్‌లోని షాపింగ్ సెంటర్లు, వ్యాపార సంస్థలు అన్నీ భారతీయులతో నిండిపోతున్నాయి.. ఇది ఇండియా కాదు.. టెక్సాస్" అంటూ స్థానికతను అడ్డం పెట్టుకుని విద్వేషాన్ని నూరిపోసే ప్రయత్నం చేశారు.

రాజకీయ ఉనికి కోసమే ఈ పాకులాట?

కెల్లీ స్మిత్ ఈ ఏడాది నవంబర్‌లో జరగనున్న గవర్నర్ ఎన్నికల్లో "రైట్-ఇన్ కాండిడేట్" బ్యాలెట్ పేపర్‌పై పేరు ఉండని అభ్యర్థి గా పోటీ చేస్తున్నట్లు ప్రకటించుకున్నారు. ఆమెకు రాజకీయంగా పెద్దగా మద్దతు లేదని, ఎన్నికల నిధుల సేకరణలో కూడా ఆమె వెనుకబడి ఉన్నారని రాజకీయ విశ్లేషకులు చెబుతున్నారు. ఈ నేపథ్యంలో కేవలం ప్రచారం కోసమే ఆమె భారతీయులను లక్ష్యంగా చేసుకుని ఇలాంటి విద్వేషపూరిత వ్యాఖ్యలు చేస్తున్నట్లు స్పష్టమవుతోంది.

ఆందోళనలో భారతీయ సమాజం

టెక్సాస్‌లో ఇటీవలి కాలంలో భారతీయులపై దాడులు, విద్వేషపూరిత వ్యాఖ్యలు పెరగడం ఆందోళన కలిగిస్తోంది. భారతీయ వలసదారులు అమెరికా ఆర్థిక వ్యవస్థకు వెన్నెముకగా ఉంటూ టెక్సాస్ అభివృద్ధిలో కీలక పాత్ర పోషిస్తున్నారు. అయినప్పటికీ రాజకీయ ప్రయోజనాల కోసం కొందరు వ్యక్తులు ఇలాంటి ప్రచారానికి పాల్పడటం వల్ల ప్రవాస భారతీయుల భద్రతపై ప్రశ్నలు తలెత్తుతున్నాయి. అమెరికాలోని భారతీయ సంఘాలు ఈ విషయాన్ని స్థానిక అధికారుల దృష్టికి తీసుకెళ్తూ ఇలాంటి విద్వేషపూరిత ధోరణిని అరికట్టాలని డిమాండ్ చేస్తున్నాయి.

మొత్తానికి కెల్లీ స్మిత్ ఉదంతం అమెరికాలోని 'మెల్టింగ్ పాట్' సంస్కృతికి విఘాతం కలిగించేలా ఉంది. రాజకీయ లబ్ధి కోసం ఒక వర్గాన్ని లక్ష్యంగా చేసుకోవడం ప్రజాస్వామ్యానికే గొడ్డలిపెట్టు అని మేధావులు అభిప్రాయపడుతున్నారు.