పీఆర్పీ చీఫ్.. ఎవరీ సాయిరెడ్డి.. ఈ విషయాలు తెలుసా?!
| మాజీ రాజ్యసభ సభ్యుడు, వైసీపీ కీలక నేత విజయసాయిరెడ్డి తాజాగా ‘పరివర్తన రాజనీతి పార్టీ’ని ప్రకటించారు. నెల్లూరు జిల్లా తాళ్లపూడిలో జన్మించిన ఆయన వృత్తిరీత్యా చార్టర్డ్ అకౌంటెంట్. వైసీపీ జాతీయ ప్రధాన కార్యదర్శిగా, రెండుసార్లు రాజ్యసభ సభ్యుడిగా పనిచేశారు. జగన్ అక్రమాస్తుల కేసులో A-2గా అరెస్టై సుమారు 15 నెలలు జైల్లో ఉన్నారు. బీజేపీ అగ్రనేతలతోనూ ఆయనకు సత్సంబంధాలు ఉన్నాయని కథనం పేర్కొంది.
పరివర్తన్ రాజనీతి పార్టీ(పీఆర్పీ).. పేరుతో కొత్త పార్టీని ప్రారంభించిన వేణుంబాకం విజయసాయిరెడ్డి ఎవరు ? అంటే.. వైసీపీ మాజీనాయకుడు, రాజ్యసభమాజీ సభ్యుడు, ఆడిటర్.. అని మాత్రమే మెజారిటీ ప్రజలకు తెలుసు. కానీ,ఆయన వెనుక అసలు విషయాలు చాలానే ఉన్నాయి. ఆయన ఎక్కడివారు.. ఎలాంటి వారు? కేంద్రంలోని రాజకీయ పక్షాలతో ఉన్న అనుబంధం ఏంటి? అనేది ఆసక్తికర విషయం. మరి ఆ విషయాలు చూద్దామా..
వేణుంబాక విజయసాయి రెడ్డి ఏపీకి చెందిన ప్రముఖ రాజకీయ నాయకుడు, మాజీ రాజ్యసభ సభ్యుడు. వృత్తిరీత్యా చార్టర్డ్ అకౌంటెంట్. ఆయన వైఎస్సార్ కాంగ్రెస్ పార్టీ లో కీలక నేతగా పనిచేసి, ఆ తర్వాత రాజకీయాల నుండి విరామం తీసుకున్నారు. తాజాగా బుధవారం విజయవాడలో 'పరివర్తన రాజనీతి పార్టీ' పేరుతో కొత్త రాజకీయ పార్టీని ప్రకటించారు. విజయసాయి రెడ్డి 1957 జూలై 1న ఆంధ్రప్రదేశ్లోని శ్రీ పొట్టి శ్రీరాములు నెల్లూరు జిల్లా, తాళ్లపూడి గ్రామంలో ఒక వ్యవసాయ కుటుంబంలో జన్మించారు.
ఆయన తండ్రి పేరు వేణుంబాక సుందరరామి రెడ్డి. సాయిరెడ్డి 1986లో సునంద రెడ్డిని వివాహం చేసుకున్నారు. వీరికి నేహా రెడ్డి అనే కుమార్తె ఉంది. ఆమె అరబిందో ఫార్మా డైరెక్టర్ శరత్ చంద్ర రెడ్డి సోదరుడు రోహిత్ రెడ్డిని వివాహం చేసుకున్నారు. ఇక, బీకామ్ పూర్తి చేసిన సాయిరెడ్డి తర్వాత చెన్నైలో చార్టర్డ్ అకౌంటెన్సీ చదివారు. 1986లో ఇన్స్టిట్యూట్ ఆఫ్ చార్టర్డ్ అకౌంటెంట్స్ ఆఫ్ ఇండియా నుండి పట్టా పొందాక, చెన్నై, హైదరాబాద్, బెంగళూరు నగరాల్లో తన సొంత ఆడిట్ సంస్థ M/s. V S Reddy SP & Associates స్థాపించారు.
ఓరియంటల్ బ్యాంక్ ఆఫ్ కామర్స్ డైరెక్టర్గా, పలు జాతీయ బ్యాంకులు మరియు ప్రభుత్వ రంగ సంస్థలకు బోర్డు సభ్యుడిగా సాయిరెడ్డి పనిచేశారు. దివంగత ముఖ్యమంత్రి వై.ఎస్. రాజశేఖర రెడ్డి కుటుంబానికి ఆడిటర్గా, వై.ఎస్. జగన్ మోహన్ రెడ్డి వ్యాపార సంస్థలకు ఆర్థిక సలహాదారుడిగా వ్యవహరించారు. 2006లో రెండు పర్యాయాలు తిరుమల తిరుపతి దేవస్థానం బోర్డు సభ్యుడిగా కూడా సేవలందించారు. ఇక, వైఎస్సార్ కాంగ్రెస్ పార్టీ స్థాపన నుండి పార్టీ జాతీయ ప్రధాన కార్యదర్శిగా, పార్లమెంటరీ పార్టీ నేతగా అత్యంత కీలక బాధ్యతలు నిర్వర్తించారు. పార్టీ వర్గాల్లో వ్యూహకర్తగా గుర్తింపు పొందారు.
రాజ్యసభ సభ్యుడిగా 2016 జూన్లో మొదటిసారి, 2022 జూన్లో రెండోసారి ఆంధ్రప్రదేశ్ నుండి వైఎస్సార్సీపీ తరపున రాజ్యసభకు ఎన్నికయ్యారు. 2024 లోక్సభ ఎన్నికల్లో నెల్లూరు నియోజకవర్గం నుండి పోటీ చేసి ఓటమి పాలయ్యారు. 2025 జనవరి 25న తన రాజ్యసభ సభ్యత్వానికి, వైఎస్సార్సీపీకి రాజీనామా చేశారు. అనంతరం ప్రజా సమస్యలే అజెండాగా పరివర్తన రాజనీతి పార్టీని స్థాపించారు.
సాయిరెడ్డి జైలు జీవితం
వి. విజయసాయి రెడ్డి వైసీపీ అధినేత జగన్ అక్రమాస్తుల కేసులో రెండవ నిందితుడిగా(A-2) ఉన్నారు. హైదరాబాద్లోని చంచల్గూడ కేంద్ర కారాగారంలో జైలు జీవితం గడిపారు. ఈ కేసు విచారణ సమయంలో ఆయన మొత్తం దాదాపు 15 నెలల పాటు జైలులో ఉన్నారు. జగన్ సంస్థలకు ఆర్థిక సలహాదారుగా, ఆడిటర్గా పనిచేసిన విజయసాయి రెడ్డిని సీబీఐ అధికారులు 2012 జనవరి 2న అరెస్టు చేశారు. ఈ కేసులో అరెస్టు అయిన మొదటి వ్యక్తి ఆయనే. 2012 ఏప్రిల్లో కింది కోర్టు ఆయనకు బెయిల్ మంజూరు చేసినప్పటికీ, హైకోర్టు దాన్ని రద్దు చేయడంతో తిరిగి లొంగిపోయారు. ఆ తర్వాత మళ్లీ బెయిల్ లభించింది.
2013 మే నెలలో సుప్రీంకోర్టు సాయిరెడ్డి బెయిల్ను రద్దు చేసింది. కోర్టు ఆదేశాల మేరకు 2013 జూన్ 5న ఆయన సీబీఐ కోర్టులో లొంగిపోవడంతో తిరిగి చంచల్గూడ జైలుకు పంపారు. దాదాపు నాలుగు నెలల తర్వాత, 2013 అక్టోబర్ 8న సీబీఐ ప్రత్యేక కోర్టు ఆయనకు బెయిల్ మంజూరు చేయడంతో జైలు నుండి విడుదలయ్యారు. ప్రస్తుతం ఆయనపై కేసులు విచారణ దశలోనే ఉన్నాయి.
బీజేపీతో సాయిరెడ్డి సంబంధాలు
కేంద్రంలో అధికారంలో ఉన్న బీజేపీతో సాయిరెడ్డికి సత్సంబంధాలు ఉన్నాయని అంటారు. ప్రధాన మంత్రి నరేంద్ర మోడీ ``సాయిరెడ్డి జీ`` అని స్వయంగా పేరు పెట్టి పిలిచేంత చనువు కూడా ఉంది. రాజ్యసభ సభ్యుడిగా ఉన్నప్పుడు.. ప్రధానిని, హోం మంత్రిని కూడా ఆయన నేరుగా కలుసుకునేవారు. అంతేకాదు.. వైసీపీని జాతీయస్థాయిలో పరిచయం చేసింది.. జాతీయ పార్టీల నేతలకు పరిచయం చేసింది కూడా సాయిరెడ్డే అన్నది తెలిసిందే.