ఇరాన్ పై యుద్ధంలో అమెరికా రోజు ఖర్చు ఎంతో తెలుసా.. షాక్ అవ్వాల్సిందే..

ఒక దేశంతో యుద్ధం చేయడం అంటే సాధారణమైన విషయం కాదు.. యుద్ధం అంటే ఎక్కువ ఖరీదైనది అని అమెరికా లెక్కలు చెబుతున్నాయి. ఇరాన్‌తో జరుగుతున్న ఈ ఘర్షణల్లో అగ్రరాజ్యం అమెరికా చేస్తున్న ఖర్చు చూస్తుంటే, అసలు యుద్ధం ఎవరి కోసం అన్న అనుమానం కలగక మానదు. ఫిబ్రవరి 28న ఇరాన్‌పై అమెరికా-ఇజ్రాయెల్ కలిసి ‘ఆపరేషన్ ఎపిక్ ఫ్యూరీ’ మొదలుపెట్టాయి. ఈ ఆపరేషన్ మొదలైన మొదటి 24 గంటల్లోనే అమెరికా అక్షరాలా 779 మిలియన్ డాలర్లు.. అంటే మన భారత కరెన్సీలో దాదాపు 7 వేల కోట్ల రూపాయలు ఖర్చు చేసింది. ఒక్క రోజులో ఏడు వేల కోట్లు అంటే, అది ఎంతటి భారీ మొత్తమో ఆలోచించండి!

ముందే మొదలైన ఖర్చుల వేట

యుద్ధం అధికారికంగా మొదలవ్వకముందే అమెరికా తన భారీ నౌకలను, యుద్ధ విమానాలను, వేల సంఖ్యలో సైనికులను పశ్చిమాసియాకు తరలించింది. ఈ మోహరింపు కోసమే మరో 5,700 కోట్లుకు పైగా ఖర్చు చేశారట. ఉదాహరణకు, అమెరికా దగ్గర 'యూఎస్‌ఎస్ గెరాల్డ్ ఆర్ ఫోర్డ్' అనే ఒక పెద్ద యుద్ధ విమాన వాహక నౌక ఉంది. అది సముద్రంలో ఉంటే చాలు, దాని నిర్వహణ కోసమే రోజుకు సుమారు 59 కోట్ల ఖర్చవుతుంది. అంటే యుద్ధం చేసినా చేయకపోయినా, ఈ ఆయుధాలను కాపాడుకోవడానికే కోట్ల రూపాయలు గాలిలో కలిసిపోతున్నాయి.

కేవలం డబ్బే కాదు.. ఆయుధాలూ గల్లంతే!

అమెరికాకు కేవలం నగదు రూపంలోనే కాకుండా, ఆయుధాల రూపంలో కూడా భారీ నష్టం జరుగుతోంది. తాజాగా కువైట్‌లో అమెరికాకు చెందిన మూడు అత్యాధునిక యుద్ధ విమానాలు కూలిపోయాయి. పొరపాటుగా కాల్పులు జరపడం వల్లే (ఫ్రెండ్లీ ఫైర్) అవి కూలాయని అమెరికా చెబుతున్నా, ఆ విమానాల విలువ వందల కోట్లని చెప్పవచ్చు.

అంతేకాదు, అమెరికా వద్ద క్షిపణులను అడ్డుకునే వ్యవస్థలు పరిమితంగానే ఉన్నాయి. ఇప్పటికే కొన్నింటిని ఉక్రెయిన్‌కు పంపారు, మరికొన్ని ఆసియా ప్రాంతంలో ఉన్నాయి. ఇప్పుడు ఇరాన్‌తో యుద్ధం నిరవధికంగా సాగితే, ఆయుధాల నిల్వలు తగ్గిపోయి అమెరికా రక్షణ వ్యవస్థకే ముప్పు వచ్చే ప్రమాదం ఉందని నిపుణులు హెచ్చరిస్తున్నారు. అంటే, అగ్రరాజ్యం తన దగ్గరున్న అమ్ములపొదిని ఖాళీ చేసుకుంటోందన్నమాట.

మొత్తం భారం?

ఒక అంచనా ప్రకారం.. రెండేళ్లుగా పశ్చిమాసియాలో జరుగుతున్న గొడవల వల్ల అమెరికాకు ఇప్పటి వరకు అయిన ఖర్చు దాదాపు 3.1 లక్షల కోట్ల పైమాటే. ఇజ్రాయెల్‌కు సాయం చేయడం, ఎమెన్, ఇరాన్ వంటి ప్రాంతాల్లో ఆపరేషన్లు నిర్వహించడం అమెరికా జేబుకు పెద్ద చిల్లు పెడుతున్నాయి. ప్రస్తుతం అమెరికా రక్షణ బడ్జెట్ 1.5 ట్రిలియన్ డాలర్ల (లక్షల కోట్లు)కు చేరినా, యుద్ధం సాగుతున్న కొద్దీ ఆ నిధులు కూడా సరిపోని పరిస్థితి వస్తుంది.

సామాన్యుడి పరిస్థితి ఏంటి?

అమెరికా అధ్యక్షుడు డొనాల్డ్ ట్రంప్ ఈ యుద్ధం మరో నాలుగు, ఐదు వారాలు సాగొచ్చు అని చెబుతున్నారు. కానీ, యుద్ధాలు ఎప్పుడు మొదలవుతాయో తెలుసు కానీ, ఎప్పుడు ముగుస్తాయో ఎవరూ ఊహించలేరు. ఒక పక్క అమెరికాలో ద్రవ్యోల్బణం పెరుగుతోంది, సామాన్యులు ధరల భారంతో ఇబ్బంది పడుతున్నారు. ఇలాంటి సమయంలో ప్రజా ధనాన్ని బాంబుల రూపంలో ఇరాన్ మీద కురిపించడం ఎంతవరకు సమంజసం అన్న చర్చ కూడా మొదలైంది.

యుద్ధం అంటే కేవలం గెలుపు ఓటములు కాదు, అది దేశాల ఆర్థిక భవిష్యత్తును పణంగా పెట్టడమే. ఒక్క రోజుకు 7 వేల కోట్ల ఖర్చు అంటే అది సామాన్య విషయం కాదు. ఈ డబ్బుతో ప్రపంచంలోని ఎన్నో సమస్యలను పరిష్కరించవచ్చు, కానీ విచారకరంగా అది వినాశనం కోసం ఖర్చవుతోంది. ఈ ఘర్షణలు ఎంత త్వరగా ముగిస్తే ప్రపంచ ఆర్థిక వ్యవస్థకు, ప్రజల ప్రశాంతతకు అంత మంచిది. లేదంటే, ఈ ‘ఖరీదైన యుద్ధం’ అమెరికా లాంటి అగ్రరాజ్యాన్ని కూడా ఆర్థిక మాంద్యంలోకి నెట్టేయడం ఖాయం.