మూడేళ్ల బాలికపై లైంగికదాడి కేసు దర్యాప్తుపై సుప్రీం ఆగ్రహం!

న్యాయం కాపాడాల్సిన పోలీసులే నేరాన్ని కప్పిపుచ్చే ప్రయత్నం చేయడం అంటే అది సమాజానికే మాయని మచ్చ. మూడేళ్ల పసికందుపై జరిగిన అఘాయిత్యం ఒక ఎత్తు అయితే, ఆ చిన్నారికి అండగా నిలవాల్సిన పోలీస్ వ్యవస్థ, గురుగ్రామ్ బాల సంక్షేమ కమిటీ (CWC) వ్యవహరించిన తీరు అంతకంటే దారుణంగా ఉంది. బాధితురాలికి న్యాయం చేయాల్సింది పోయి, ఆమె వాదన తప్పని నిరూపించేందుకు ఉన్నతాధికారుల నుంచి కింది స్థాయి సిబ్బంది వరకు ఏకమవ్వడం చూస్తుంటే వ్యవస్థ ఎంతలా కుళ్లిపోయిందో అర్థం అవుతోంది. ఈ వ్యవహారంపై సుప్రీంకోర్టు ఘాటు వ్యాఖ్యలు చేసింది.

మీరు సిగ్గుపడాలి

హరియాణాలో మూడేళ్ల బాలికపై జరిగిన లైంగికదాడి కేసులో రాష్ట్ర పోలీసుల నిర్లక్ష్యంపై సుప్రీంకోర్టు బుధవారం నిప్పులు చెరిగింది. ‘రాష్ట్ర యంత్రాంగం ఒక నేరంపై వ్యవహరించాల్సిన తీరు ఇదేనా?’ అని ప్రధాన న్యాయమూర్తి జస్టిస్ సూర్యకాంత్ నేతృత్వంలోని ధర్మాసనం నిలదీసింది. బాధితురాలైన బాలిక తనపై జరిగిన నేరం కన్నా, దర్యాప్తు పేరుతో పోలీసుల నుంచి దారుణమైన అనుభవాలను ఎదుర్కొందని కోర్టు ఆవేదన వ్యక్తం చేసింది. వ్యవస్థలోని లోపాలను ఎత్తిచూపుతూ అధికారులందరినీ కోర్టు తీవ్రంగా మందలించింది.

ముగ్గురు మహిళా ఐపీఎస్‌లతో సిట్

పోలీసులపై నమ్మకం కోల్పోయిన నేపథ్యంలో, ఈ నేరంపై నిష్పక్షపాతంగా విచారణ జరిపేందుకు సుప్రీంకోర్టు ప్రత్యేక దర్యాప్తు బృందాన్ని ఏర్పాటు చేసింది. ఇందులో విశేషం ఏంటంటే, ఈ బృందంలో ముగ్గురు మహిళా ఐపీఎస్ అధికారులను నియమించింది. ఒక చిన్నారిపై జరిగిన అమానుష ఘటనను మహిళా అధికారులు సున్నితంగా, బాధ్యతాయుతంగా విచారిస్తారనే ఉద్దేశంతో కోర్టు ఈ నిర్ణయం తీసుకుంది. ఇకపై ఈ కేసు దర్యాప్తు మొత్తం వీరి పర్యవేక్షణలోనే సాగనుంది.

పోక్సో (POCSO) కోర్టుకు బదిలీ.. మహిళా జడ్జి పర్యవేక్షణ!

ఈ కేసు విచారణలో ఎక్కడా రాజీ పడకూడదని భావించిన అత్యున్నత న్యాయస్థానం.., దీనిని మహిళా న్యాయమూర్తి నేతృత్వంలోని ప్రత్యేక పోక్సో కోర్టుకు అప్పగించాలని ఆదేశించింది. గురుగ్రామ్ జిల్లా సెషన్స్ కోర్టు జడ్జికి ఈ మేరకు స్పష్టమైన ఆదేశాలు జారీ చేసింది. బాధితురాలి తల్లిదండ్రుల బాధను నిరాధారమైనదిగా చిత్రీకరించేందుకు ప్రయత్నించిన పోలీస్ కమిషనర్ నుంచి సబ్ ఇన్‌స్పెక్టర్ వరకు ప్రతి ఒక్కరి పాత్రపై ఇప్పుడు సుప్రీంకోర్టు నిఘా ఉంచింది.

వ్యవస్థాగత వైఫల్యం

పోలీస్ యంత్రాంగం మొత్తం నిందితుడిని కాపాడేందుకే ప్రయత్నించిందని ధర్మాసనం అభిప్రాయపడింది. ఒక చిన్నారి ప్రాథమిక హక్కులను కాపాడడంలో విఫలమవ్వడమే కాకుండా, బాధితురాలినే దోషిగా నిలబెట్టే ప్రయత్నం చేయడం సిగ్గుచేటని పేర్కొంది. బాల సంక్షేమ కమిటీ కూడా తన బాధ్యతను విస్మరించి పోలీసులకు వత్తాసు పలకడంపై కోర్టు విస్మయం వ్యక్తం చేసింది. ఇలాంటి ధోరణి వల్ల సామాన్య ప్రజలకు న్యాయ వ్యవస్థపై నమ్మకం పోతుందని ధర్మాసనం హెచ్చరించింది.

సుప్రీంకోర్టు తీసుకున్న నిర్ణయం బాధితురాలి కుటుంబంలో కొత్త ఆశలు చిగురింపజేసింది. రాష్ట్ర పోలీసు వ్యవస్థ అంతా ఏకమైనా, న్యాయస్థానం తలుపు తడితే నిజం బయటకు వస్తుందని ఈ ఘటన నిరూపిస్తోంది. మహిళా ఐపీఎస్ అధికారుల నేతృత్వంలో జరిగే విచారణతో నిందితులకు కఠిన శిక్ష పడడమే కాకుండా, విధి నిర్వహణలో నిర్లక్ష్యం వహించిన అధికారులపై కూడా చర్యలు తీసుకోవాల్సిన అవసరం ఉంది. అప్పుడే ఇలాంటి పసిపిల్లలపై అఘాయిత్యాలు ఆగుతాయి.