10 ఏళ్లుగా ఆల్ఫాబెట్ కు నాయకత్వం.. బిలియనీర్ క్లబ్ లోకి సుందర్ పిచాయ్

గూగుల్ మాతృసంస్థ ఆల్ఫాబెట్‌కు సీఈవోగా పదేళ్ల పాటు నాయకత్వం వహించిన తర్వాత సుందర్ పిచాయ్ ఇప్పుడు బిలియనీర్ అయ్యారు. ఆయన నికర ఆస్తి $1.1 బిలియన్ (సుమారు ₹9,100 కోట్లు) దాటినట్లు బ్లూమ్‌బర్గ్ బిలియనీర్స్ ఇండెక్స్ ఇటీవల వెల్లడించింది.

- సుందర్ పిచాయ్ ప్రత్యేకత

సాధారణంగా టెక్ రంగంలో బిలియనీర్లుగా మారిన మార్క్ జుకర్‌బర్గ్ (ఫేస్‌బుక్ వ్యవస్థాపకుడు), జెన్సెన్ హువాంగ్ (ఎన్విడియా సీఈవో) వంటి వారు తమ కంపెనీలను స్థాపించి, వాటిలో వాటాల ద్వారా సంపదను కూడబెట్టుకున్నారు. కానీ సుందర్ పిచాయ్ విషయంలో ఇది భిన్నంగా ఉంది. ఆయన ఒక ప్రొఫెషనల్ సీఈవోగా ఈ అరుదైన మైలురాయిని చేరుకున్నారు. వ్యవస్థాపకుడిగా కాకుండా కేవలం ఒక నాయకుడిగా బిలియన్ డాలర్ల సంపదను సాధించడం చాలా అరుదు.

- సీఈవోగా పదేళ్లు.. ఆల్ఫాబెట్‌కు అద్భుతమైన ఎదుగుదల

2015లో గూగుల్ సీఈవోగా బాధ్యతలు స్వీకరించిన సుందర్ పిచాయ్, అదే ఏడాది ఆల్ఫాబెట్ సీఈవోగా కూడా నియమితులయ్యారు. ఆయన నాయకత్వంలో గడచిన పదేళ్లలో ఆల్ఫాబెట్ మార్కెట్ విలువలో $1 ట్రిలియన్ (దాదాపు ₹83 లక్షల కోట్లు) మేర పెరుగుదల సాధించింది. 2023 తర్వాత కంపెనీ షేర్లు ఏకంగా 120% వరకు లాభాలను అందించాయి. ప్రస్తుతం యూట్యూబ్, గూగుల్ క్లౌడ్ ద్వారా సంవత్సరానికి $110 బిలియన్ల ఆదాయం సమకూరుతోంది. పిచాయ్ సీఈవో అయిన 2015లో ఆల్ఫాబెట్ మొత్తం ఆదాయం కేవలం $75 బిలియన్లే కావడం గమనార్హం.

- తమిళనాడు నుంచి సిలికాన్ వ్యాలీ వరకు

చెన్నైలోని ఒక సాధారణ ఇంట్లో పెరిగిన సుందర్ పిచాయ్, 2004లో గూగుల్‌లో చేరారు. క్రోమ్ బ్రౌజర్, ఆండ్రాయిడ్ వంటి కీలక ప్రాజెక్టులను విజయవంతంగా నడిపి, కంపెనీలో కీలక స్థానానికి చేరుకున్నారు. ఆయన సంపదలో గణనీయమైన భాగం స్టాక్ ఆప్షన్ల ద్వారా కాకుండా నగదు బోనస్‌లు, వేతనాల రూపంలో ఉండటం విశేషం. ఆల్ఫాబెట్‌లో ఆయన వాటా కేవలం 0.02% మాత్రమే (దాదాపు $440 మిలియన్ల విలువైనది).

ఎలాన్ మస్క్ ప్రశంసలు

సుందర్ పిచాయ్ తన విజయాన్ని X లో పంచుకోగా, టెస్లా సీఈవో ఎలాన్ మస్క్ స్పందిస్తూ "10 ఏళ్ల సుదీర్ఘ ప్రయాణం ఎంతో ప్రభావవంతంగా ఉంది" అంటూ ప్రశంసించారు. సుందర్ పిచాయ్ సంపద కేవలం ఒక కంపెనీని స్థాపించిన వ్యక్తిగా కాకుండా, ఒక దశాబ్దకాలంగా స్థిరంగా, సమర్థవంతంగా నాయకత్వం వహించినందుకు సాధించిన విజయం. ఇది భారతీయులందరికీ గర్వకారణం.