విద్యార్థితో అనైతిక సంబంధం: టీచర్‌కు శిక్ష ఖాయం

అమెరికాలో మరో సంచలన ఘటన వెలుగులోకి వచ్చింది. విద్యార్థులకు మార్గదర్శకులుగా ఉండాల్సిన ఉపాధ్యాయులు, వారి నమ్మకాన్ని ద్రోహం చేసే ఘటనలు సమాజాన్ని కలవరపెడుతున్నాయి. తాజాగా ఓహియో రాష్ట్రంలో చోటుచేసుకున్న ఈ కేసు విద్యాసంస్థల భద్రతపై మరోసారి ప్రశ్నలు లేవనెత్తుతోంది.

ఓహియోలోని కొలంబస్ నగరంలో ఉన్న హోరైజన్ సైన్స్ అకాడమీ అనే పాఠశాలలో పనిచేసిన 28 ఏళ్ల టీచర్ జమెలా డబూబి, 15 ఏళ్ల మైనర్ విద్యార్థితో అనైతిక సంబంధం పెట్టుకున్నట్లు ఆరోపణలు వెల్లడి అయ్యాయి. ఈ ఘటన 2025 ఏప్రిల్‌లో ప్రారంభమై కొద్ది నెలల పాటు కొనసాగినట్లు దర్యాప్తులో బయటపడింది.

ఈ కేసు వెలుగులోకి రావడానికి కారణం విద్యార్థి కుటుంబ సభ్యుల అప్రమత్తత వల్లే.. ఒక రోజు ఆ బాలుడు, టీచర్‌తో కారులో అనుమానాస్పద పరిస్థితిలో కనిపించడంతో కుటుంబ సభ్యులు వెంటనే పోలీసులకు సమాచారం అందించారు. దీనిపై అధికారులు కేసు నమోదు చేసి విచారణ చేపట్టారు.

దర్యాప్తులో భాగంగా విద్యార్థి మొబైల్ ఫోన్‌ను పరిశీలించిన అధికారులు, టీచర్‌తో అతడు మార్పిడి చేసిన అనేక సందేశాలను గుర్తించారు. ఈ మెసేజీలు సాధారణ గురు-శిష్య సంబంధాన్ని మించిపోయి వ్యక్తిగత, అనుచిత సంబంధం ఉన్నట్లు స్పష్టంగా సూచించాయి. దీంతో అధికారులకు కేసు స్పష్టమైంది.

ఘటన వెలుగులోకి వచ్చిన వెంటనే జమెలా డబూబిని పాఠశాల నుంచి తొలగించారు. అనంతరం ఆమెపై ‘గ్రాస్ సెక్సువల్ ఇంపోజిషన్’ ,‘మైనర్‌తో అనుచిత ప్రవర్తన’ వంటి తీవ్రమైన అభియోగాలు నమోదు అయ్యాయి. కోర్టులో విచారణ అనంతరం, ఆమె ఈ అభియోగాలను అంగీకరించినట్లు అధికారులు తెలిపారు.

ప్రస్తుతం ఆమెకు శిక్ష విధించే ప్రక్రియ కొనసాగుతోంది. ఆమెకు జైలు శిక్ష పడే అవకాశముండగా అదనంగా పలు నిబంధనలు కూడా విధించే అవకాశముంది. వీటిలో కమ్యూనిటీ పర్యవేక్షణ, మానసిక కౌన్సెలింగ్, టీచింగ్ లైసెన్స్ రద్దు.. అలాగే సెక్స్ ఆఫెండర్‌గా రిజిస్ట్రేషన్ వంటి చర్యలు ఉన్నాయి.

ఈ ఘటన విద్యాసంస్థల్లో ఉపాధ్యాయులు పాటించాల్సిన నైతిక విలువలను మరోసారి గుర్తుచేస్తోంది. ఉపాధ్యాయులు విద్యార్థులకు మార్గనిర్దేశం చేయాల్సిన బాధ్యత కలిగి ఉంటారు. ఆ నమ్మకాన్ని దుర్వినియోగం చేస్తే అది కేవలం వ్యక్తిగత తప్పిదం కాకుండా సమాజానికి ముప్పుగా మారుతుంది.

అంతేకాకుండా ఇలాంటి సంఘటనలు ముందుగానే గుర్తించడానికి పాఠశాలలు మరింత జాగ్రత్తలు తీసుకోవాల్సిన అవసరం ఉంది. విద్యార్థుల ప్రవర్తనలో మార్పులు, అనుమానాస్పద కమ్యూనికేషన్ వంటి అంశాలను సమయానికి గుర్తించి చర్యలు తీసుకుంటే ఇలాంటి ఘటనలను నివారించవచ్చు.

ఈ కేసు ఒక హెచ్చరికగా నిలుస్తోంది. విద్యార్థుల భద్రతను కాపాడడం కేవలం కుటుంబాల బాధ్యత మాత్రమే కాకుండా, విద్యాసంస్థలు.. సమాజం మొత్తం బాధ్యతగా మారింది.