జిరాఫీలా మెడలు… ఇదే అందమంటున్న ఆ తెగ మహిళలు.. ఇదెక్కడి విడ్డూరంరా నాయనా?

ఈ ప్రపంచంలో ఎన్నో దేశాలు, మరెన్నో వింత ఆచారాలు ఉన్నాయి. కొన్ని ఆచారాలు చూస్తే మనకు ఒళ్లు గగుర్పొడుస్తుంది. అలాంటి ఒక వింతైన, నమ్మలేని సంప్రదాయమే మయన్మార్, థాయ్‌లాండ్ సరిహద్దుల్లో ఉండే 'కాయన్' అనే గిరిజన తెగలో కనిపిస్తుంది. ఇక్కడి మహిళల మెడలు జిరాఫీలా చాలా పొడవుగా ఉంటాయి. అందుకే వీరిని ప్రపంచవ్యాప్తంగా 'జిరాఫీ మహిళలు' అని పిలుస్తారు. మనకు ఇది వింతగా అనిపించినా, ఆ తెగలో పొడవాటి మెడ ఉన్నవారినే గొప్ప అందగత్తెలుగా భావిస్తారు. ఆ విశేషాలేంటో చూద్దాం..

ఐదేళ్ల వయసు నుంచే భారీ రింగులు:

ఈ తెగకు చెందిన బాలికలకు కేవలం 5 సంవత్సరాల వయస్సు ఉన్నప్పుడే మెడ చుట్టూ ఇత్తడి రింగులను తొడగడం ప్రారంభిస్తారు. ఇది ఒకే ఒక్క రింగు కాదు, మెడ చుట్టూ చుట్టే కాయిల్ లాంటిది. వయస్సు పెరిగేకొద్దీ ఈ రింగుల సంఖ్యను, వాటి బరువును పెంచుకుంటూ పోతారు. అలా వీరు వృద్ధాప్యానికి వచ్చేసరికి వీరి మెడలో దాదాపు 15 నుంచి 20 కిలోల బరువైన ఇత్తడి రింగులు ఉంటాయంటే నమ్మగలరా?

మెడ అంత పొడవుగా ఎలా సాగుతుంది?:

నిజానికి ఈ ఇత్తడి రింగుల వల్ల మెడ లోపల ఉండే ఎముకలేవీ సాగవు. మరి మెడ ఎలా పొడవుగా కనిపిస్తుందంటే.. ఆ రింగుల యొక్క విపరీతమైన బరువు కారణంగా భుజాల దగ్గర ఉండే కాలర్ ఎముక కిందికి నెట్టబడుతుంది. ఇక అలాగే పక్కటెముకలు కూడా కుదించుకుపోతాయి. భుజాలు కిందికి నొక్కుకుపోవడం వల్ల మెడ భాగం మాత్రం పైకి సాగినట్లు, చాలా పొడవుగా వింతగా కనిపిస్తుంది.

పులుల దాడి నుంచి రక్షణ కోసమేనా?:

ఈ వింత ఆచారం వెనుక కొన్ని బలమైన నమ్మకాలు, కథలు ఉన్నాయి. పూర్వకాలంలో అడవుల్లో నివసించేటప్పుడు పులుల వంటి క్రూర మృగాలు నేరుగా మెడపై దాడి చేయకుండా రక్షణ కోసం ఈ ఇత్తడి వలయాలను వేసుకోవడం మొదలుపెట్టారని కొందరు చెబుతారు. అంతేకాదు, వీరి సాంస్కృతిక చిహ్నమైన 'డ్రాగన్'ను పోలి ఉండేలా కనిపించడం కోసం కూడా ఈ రింగులను ధరిస్తారట.

అందవిహీనం చేయాలనుకుంటే అందంగా మారింది:

మరో ఆసక్తికరమైన కథ ప్రకారం.. పూర్వకాలంలో వేరే తెగల శత్రువులు వచ్చి ఈ మహిళలను అపహరించుకుపోకుండా ఉండటానికి, వారిని అందవిహీనంగా మార్చాలనే ఉద్దేశంతో ఈ రింగులను వేసేవారట. ఇక కానీ కాలక్రమేణా అదే వారి సంస్కృతిగా మారిపోయింది. ఇప్పుడు ఆ తెగలో పొడవైన మెడ ఉండటమే ఒక గొప్ప సౌందర్యానికి గుర్తుగా మారిపోయింది.

పర్యాటకులను ఆకర్షిస్తూ జీవనోపాధి:

ఈ జిరాఫీ మహిళల వింత రూపాన్ని చూడటానికి ప్రపంచవ్యాప్తంగా వందలాది మంది పర్యాటకులు ఈ ప్రాంతానికి వస్తుంటారు. ఈ కాయన్ తెగ ప్రజలు కూడా పర్యాటకుల ద్వారా తమ సంప్రదాయాన్ని, వారు తయారు చేసే అందమైన చేతిపనులను ప్రదర్శిస్తూ ప్రస్తుతం జీవనోపాధి పొందుతున్నారు.

మారే కాలంతో పాటు ఈ నొప్పిని భరిస్తూ రింగులు వేసుకోవడం పట్ల కొందరు యువతులు ఆసక్తి చూపకపోయినా, మెజారిటీ మహిళలు మాత్రం తమ సంస్కృతిని కాపాడుకుంటున్నారు. ఏదేమైనా, తమ సంప్రదాయం కోసం మహిళలు చిన్నతనం నుండి అన్ని కిలోల బరువును మెడపై మోస్తూ జీవించడం నిజంగానే ఎవరినైనా ఆశ్చర్యంలో ముంచెత్తుతుంది.