ఇండస్ట్రీల్లో ఏఐ కోసం బెజోస్ కొత్త ప్రయత్నం

టెక్ ప్రపంచంలో జెఫ్ బెజోస్ పేరు వింటేనే ఏదో ఒక సంచలనం గుర్తొస్తుంది. తాజాగా ఆయన ఆర్టిఫిషియల్ ఇంటెలిజెన్స్ రంగంలో రూ. 9 లక్షల కోట్ల భారీ పెట్టుబడితో ఒక మెగా ప్రాజెక్ట్‌కు తెరలేపారు. ఫ్యాక్టరీలు, వేర్‌హౌస్‌లలో మనుషుల అవసరం లేకుండా పూర్తిగా ఏఐతోనే పనులు కానిచ్చేలా ఆయన వేస్తున్న ప్లాన్ ఇప్పుడు హాట్ టాపిక్‌గా మారింది. ఈ టెక్నాలజీ వల్ల భవిష్యత్తులో ఉద్యోగాల పరిస్థితి ఏంటనే చర్చ మొదలైంది. ఆ వివరాలు చూద్దాం..

బెజోస్ మాస్టర్ ప్లాన్ ఇదే:

అమెజాన్ వ్యవస్థాపకుడు జెఫ్ బెజోస్ కేవలం ఇ-కామర్స్‌కే పరిమితం కాకుండా, ఇప్పుడు భారీ పరిశ్రమలను ఏఐ మయం చేయాలని చూస్తున్నారు. ఇక ఇందుకోసం ఆయన ఏకంగా 100 బిలియన్ డాలర్లు (సుమారు రూ. 9 లక్షల కోట్లు) సమీకరించే పనిలో పడ్డారు. వాల్‌స్ట్రీట్ జర్నల్ కథనం ప్రకారం.. ఇప్పటికే ఉన్న కొన్ని పెద్ద కంపెనీలను కొనుగోలు చేసి, వాటిలో మానవ వనరుల ఖర్చును తగ్గించి, రోబోలు మరియు ఏఐ సాఫ్ట్‌వేర్‌లతో ఉత్పత్తిని పెంచడమే బెజోస్ ప్రధాన లక్ష్యం.

ఏయే రంగాలపై బెజోస్ కన్ను?:

ఈ భారీ ప్రాజెక్ట్ కింద బెజోస్ ప్రధానంగా డిఫెన్స్, ఏరోస్పేస్, మరియు చిప్‌మేకింగ్ కంపెనీలను టార్గెట్ చేస్తున్నారు. ఈ రంగాల్లో వస్తువుల రూపకల్పన, తయారీలో అత్యంత ఖచ్చితత్వం అవసరం. గతంలో ఇంజనీర్లు, నిపుణులు గంటల తరబడి చేసే పనులను ఇప్పుడు ఏఐ యంత్రాలు నిమిషాల్లో పూర్తి చేస్తాయి. చిప్ తయారీ వంటి క్లిష్టమైన పనుల్లో ఏఐని వాడటం వల్ల తక్కువ ఖర్చుతో ఎక్కువ వేగంగా పని జరుగుతుందని ఆయన భావిస్తున్నారు.

వేర్‌హౌస్‌లలో రోబోల రాజ్యం:

అమెజాన్ గోదాముల్లో ఇప్పటికే రోబోల వినియోగం ఎక్కువగా ఉన్న సంగతి మనకు తెలిసిందే. అయితే ఇప్పుడు బెజోస్ దానిని మరో స్థాయికి తీసుకెళ్తున్నారు. ఇక ఫ్యాక్టరీల్లోని ప్రొడక్షన్ లైన్ల నుంచి గిడ్డంగుల్లో వస్తువుల ప్యాకింగ్ వరకు ఎక్కడా కార్మికుల అవసరం లేకుండా ఏఐ వ్యవస్థలను ప్రవేశపెట్టనున్నారు. దీనివల్ల కంపెనీలకు సిబ్బంది జీతాల ఖర్చు భారీగా తగ్గుతుంది. ఇక ప్రపంచవ్యాప్తంగా ఉన్న పెద్ద పెద్ద ఇన్వెస్టర్లతో బెజోస్ ఇప్పటికే ఈ విషయంపై చర్చలు జరుపుతున్నట్లు సమాచారం.

ఉద్యోగాలపై ఏఐ సెగ:

ఇప్పటివరకు ఏఐ వల్ల కేవలం సాఫ్ట్‌వేర్ ఇంజనీర్లు, రైటర్లు, రీసెర్చర్లు మాత్రమే ఉద్యోగాలు కోల్పోతారని అందరూ భయపడేవారు. కానీ బెజోస్ తాజా నిర్ణయంతో ఆ సెగ ఇప్పుడు ఫ్యాక్టరీ వర్కర్లు, మెకానిక్స్‌కు కూడా తగిలేలా ఉంది. వేర్‌హౌస్‌లు, ఉత్పత్తి కేంద్రాల్లో మనుషుల స్థానాన్ని యంత్రాలు ఆక్రమిస్తే లక్షలాది మంది ఉపాధిపై ప్రభావం పడే అవకాశం ఉంది. టెక్నాలజీ పెరుగుతున్న కొద్దీ మనిషి శ్రమ తగ్గిపోవడం మంచిదే అయినా, అది నిరుద్యోగానికి దారితీయకూడదని నిపుణులు హెచ్చరిస్తున్నారు.

జెఫ్ బెజోస్ ఆలోచనలు ఎప్పుడూ భవిష్యత్తును ముందుగానే ఊహిస్తాయి. ఇక ఏఐతో పరిశ్రమల రూపురేఖలు మార్చాలనే ఆయన ప్రయత్నం సక్సెస్ అయితే పారిశ్రామిక రంగంలో సరికొత్త విప్లవం రావడం ఖాయం.