క్రిస్టోఫర్ నోలాన్ సరసన సందీప్ రెడ్డి వంగా!
సందీప్ రెడ్డి వంగా గొప్పతనం గురించి చెప్పాలంటే.. ఆయన మేకింగ్ స్టైల్ విలక్షణత గురించి ముచ్చటించాలి.;
ఐకాన్ స్టార్ అల్లు అర్జున్ హైదరాబాద్లోని అమీర్పేటలో ప్రతిష్టాత్మకంగా నిర్మించిన `ఏఏఏ సినిమాస్` (AAA సినిమాస్) మల్టీప్లెక్స్లో ఒక అద్భుతమైన దృశ్యం ఆవిష్కృతమైంది. ఈ మల్టీప్లెక్స్లో ఏర్పాటు చేసిన `వాల్ ఆఫ్ గ్రేట్స్` లో ప్రపంచ ప్రఖ్యాతి గాంచిన దర్శకుల చిత్రపటాల మధ్య టాలీవుడ్ సెన్సేషన్ సందీప్ రెడ్డి వంగా ఫోటో ప్రత్యక్షం కావడం ఇప్పుడు ఇండస్ట్రీలో చర్చనీయాంశంగా మారింది. అతడి ఫోటోకు ఒకవైపు భారతీయ దిగ్గజ దర్శకులు రాజ్కుమార్ హిరాణీ, సంజయ్ లీలా భన్సాలీ ఉంటే.. మరోవైపు హాలీవుడ్ లెజెండ్స్ క్రిస్టోఫర్ నోలన్, క్వింటిన్ టరాంటినో, మార్టిన్ స్కోర్సెస్ ఉండటం విశేషం. రాజమౌళి-ప్రశాంత్ నీల్- సుకుమార్ లకు పెద్ద పీట వేసిన అల్లు బృందం అదే వాల్ పై సందీప్ రెడ్డి వంగాకు పట్టంగట్టడం చూస్తుంటే, కేవలం మూడు సినిమాల కిడ్ అయిన అతడి క్రేజ్ ఏ రేంజులో ఉందో అర్థం చేసుకోవచ్చు.
ఈ దిగ్గజాల మధ్య సందీప్ రెడ్డి వంగా నిలవడం నిజంగా ఒక ప్రత్యేకమైన గౌరవం. కేవలం మూడు సినిమాలతోనే (అర్జున్ రెడ్డి, కబీర్ సింగ్, యానిమల్) ఆయన ప్రపంచ స్థాయి దర్శకుల సరసన చోటు సంపాదించుకోవడం సామాన్యమైన విషయం కాదు. తన సినిమాలతో బాక్సాఫీస్ వద్ద 800 కోట్ల క్లబ్కు చేరువవ్వడమే కాకుండా, తనకంటూ ఒక ప్రత్యేకమైన మార్క్ ను క్రియేట్ చేసుకున్నారు. ప్రస్తుతం భారతీయ టాప్ 10 దర్శకుల జాబితాలో సందీప్ పేరు కచ్చితంగా ఉంటుందనడంలో ఎలాంటి సందేహం లేదు.
సందీప్ రెడ్డి వంగా గొప్పతనం గురించి చెప్పాలంటే.. ఆయన మేకింగ్ స్టైల్ విలక్షణత గురించి ముచ్చటించాలి. కథలో ఎమోషన్స్ ఎంత తీవ్రంగా ఉంటాయో, క్యారెక్టరైజేషన్లు కూడా అంతే ఇంటెన్స్గా ఉంటాయి. ఆయన సినిమాల్లోని రా ఫీల్, డార్క్ ఇంటెన్సిటీ, పాత్రల మధ్య ఉండే బలమైన ఎమోషనల్ బ్లాక్స్ ప్రేక్షకులను ఒక కొత్త ప్రపంచంలోకి తీసుకెళ్తాయి. మూస పద్ధతిలో సాగే సినిమాలకు స్వస్తి పలికి, మనసులో ఉన్న భావాలను మొహమాటం లేకుండా వెండితెరపై ఆవిష్కరించడంలో ఆయన సిద్ధహస్తుడు.
దక్షిణ భారతదేశంలో రాజమౌళి, సుకుమార్, ప్రశాంత్ నీల్ వంటి అగ్ర దర్శకుల తర్వాత మళ్ళీ అంతటి క్రేజ్, బ్రాండ్ ఇమేజ్ సొంతం చేసుకున్న దర్శకుడు సందీప్ వంగానే. ఆయన సినిమా అంటే కేవలం వినోదం మాత్రమే కాదు.. వివాదాలు మోసుకొచ్చి.. దానికి ధీటుగా చర్చగా మారుతుంది. ప్రేక్షకుడి పల్స్ పట్టుకోవడంలో ఆయనకు ఉన్న నేర్పు, సంగీతాన్ని, నిశ్శబ్దాన్ని ఆయన ఉపయోగించుకునే విధానం సినిమా ప్రేమికులను మంత్రముగ్ధులను చేస్తాయి. అందుకే అల్లు అర్జున్ వంటి ఐకాన్ స్టార్ కూడా సందీప్ వంగా పనితీరుకు ముగ్ధుడై ఆయనకు అంతటి ప్రాధాన్యతనిస్తున్నారు. హాలీవుడ్ దిగ్గజ దర్శకులు క్రిస్టోఫర్ నోలాన్ సరసన సందీప్ వంగా ఫోటోని చూడటం కూడా అభిమానులను మంత్రముగ్ధం చేస్తోంది. అంతేకాదు.. మార్టిన్ స్కోర్సెస్, టారంటినో లాంటి హాలీవుడ్ దిగ్గజ దర్శకుల దార్శనిక మేకింగ్ శైలిని అనుసరించే వాడిగా సందీప్ వంగాకు ఈ గౌరవం దక్కిందని చెప్పాలి.
అల్లు అర్జున్ తో సందీప్ రెడ్డి వంగా సినిమా ఎప్పుడు ఉంటుందా? అని అభిమానులు వెయ్యి కళ్ళతో ఎదురుచూస్తున్నారు. వీరిద్దరి కాంబినేషన్లో ఒక భారీ ఇంటెన్స్ యాక్షన్ డ్రామా రాబోతోందని ఇప్పటికే అధికారిక ప్రకటన వచ్చిన సంగతి తెలిసిందే. రాజ్కుమార్ హిరాణీ, భన్సాలీ వంటి దిగ్గజాల పక్కన సందీప్ ఫోటోను చేర్చి అల్లు కుటుంబం ఆయనను గౌరవించిన తీరు చూస్తుంటే, బన్నీ-సందీప్ మూవీ ఒక గ్లోబల్ రేంజ్లో ఉండబోతుందని స్పష్టమవుతోంది.
ప్రస్తుతం అల్లు అర్జున్ `పుష్ప 2` పనుల్లో ఉండగా, సందీప్ వంగా ప్రభాస్తో `స్పిరిట్` సినిమా పనుల్లో బిజీగా ఉన్నారు. ఈ ప్రాజెక్టుల తర్వాత వీరిద్దరి కలయికలో వచ్చే సినిమా ఇండియన్ సినిమా దగ్గర సరికొత్త రికార్డులను సృష్టించడం ఖాయం. అల్లు సినిమాస్లోని ఆ `వాల్ ఆఫ్ గ్రేట్స్` కేవలం ఫోటోల ప్రదర్శన మాత్రమే కాదు.. సందీప్ రెడ్డి వంగా వంటి ప్రతిభావంతుడికి దక్కిన ఒక గొప్ప గుర్తింపు.