ప్రభాస్‌కు మళ్లీ ఆ పాత స్పీడ్ సాధ్యమేనా!

ప్రభాస్‌తో ఓ సినిమా త్వరగా పూర్తి చేయాలనుకున్నా అది అంత ఈజీగా జరిగే పరిస్థితి కనిపించడం లేదు. భారీ బడ్జెట్, గ్రాఫిక్స్, యాక్షన్ ఎపిసోడ్స్‌తో షూటింగ్ అనుకున్నదానికంటే ఎక్కువ సమయం పడుతోంది. ఈ ఏడాది జనవరిలోనే 'రాజాసాబ్' విడుదలైంది. కానీ ఆ సినిమా కూడా మొదట అనుకున్న సమయానికి పూర్తికాలేదు. ఇప్పుడు ప్రభాస్ కాస్త తక్కువ సమయంలో పూర్తి చేయగలిగే మరో సినిమా చేయాలని భావిస్తున్నట్లు ప్రచారం వినిపిస్తోంది.

ఈ నేపథ్యంలో 'డార్లింగ్' దర్శకుడు కరుణాకరన్ పేరు వినిపిస్తోంది. ప్రభాస్ కోసం కథ సిద్ధం చేస్తున్నారని, త్వరలో వినిపించబోతున్నారని ప్రచారం జరుగుతోంది. కథ నచ్చితే ఈ కాంబినేషన్ కోసం ఇద్దరు నిర్మాతలు ప్రయత్నిస్తున్నట్లు సమాచారం. అయితే ఇప్పటివరకు ప్రభాస్ కథ వినలేదు. సినిమా ఖరారు కాలేదు. అయినా ఈ వార్తతో ఒకప్పటి 'డార్లింగ్' తరహాలో ప్రభాస్‌ను మళ్లీ చూసే అవకాశం ఉంటుందనే ఆశ కలుగుతోంది.

'డార్లింగ్'లో ప్రభాస్ కామెడీ, ప్రేమ సన్నివేశాలు ఇప్పటికీ గుర్తుంటాయి. భారీ యాక్షన్ లేకుండానే మంచి వినోదాన్ని అందించారు కరుణాకరన్. కానీ ఆ సినిమా తర్వాత దర్శకుడి ట్రాక్ రికార్డు బాగోలేదు. 'ఎందుకంటే ప్రేమంట', 'చిన్నదాన నీ కోసం', 'తేజ్ ఐ లవ్ యూ' ఆశించిన విజయాలు ఇవ్వలేదు. 2018 తర్వాత ఆయన దర్శకత్వంలో మరో తెలుగు సినిమా విడుదల కాలేదు. అందుకే పాత కాంబినేషన్ మీద నమ్మకంతోనే ముందుకెళ్లడం అంత సులభం కాదు.

ప్రభాస్‌తో కాస్త త్వరగా సినిమా పూర్తవుతుందని ఆశించిన సందర్భాలు గతంలోనూ ఉన్నాయి. 'రాధేశ్యామ్' షూటింగ్ ఏళ్ల తరబడి సాగింది. కరోనా కారణంగా కూడా ఆలస్యమైంది. మారుతి దర్శకత్వంలో వచ్చిన 'రాజాసాబ్'లో వినోదానికి ప్రాధాన్యం ఇచ్చినా భారీ క్లైమాక్స్, గ్రాఫిక్స్ కోసం ఎక్కువ సమయం పట్టింది. చివరకు రెండు సినిమాలూ నిరాశపరిచాయి. ప్రభాస్ స్థాయికి తగ్గ భారీ హంగులు జోడించే ప్రయత్నంలో షూటింగ్ కూడా పెరిగిపోతే త్వరగా సినిమా పూర్తి చేయాలనే ప్లాన్ పనిచేయదు.

పైగా ఇప్పుడు ప్రభాస్ డేట్స్ దొరకడం అంత ఈజీ కాదు. సందీప్ రెడ్డి వంగా 'స్పిరిట్', హను రాఘవపూడి 'ఫౌజీ' పనులు ఉన్నాయి. 'కల్కి 2' కోసం నాగ్ అశ్విన్ కూడా ప్రభాస్ డేట్స్ కోసం ఎదురుచూడాల్సి వచ్చింది. ఇప్పటికే ఒప్పుకున్న సినిమాల షెడ్యూల్స్ మారుతున్నాయి. ఇలాంటి సమయంలో మరో కొత్త ప్రాజెక్టుకు వరుసగా డేట్స్ కేటాయించడం కష్టమే. కథ నచ్చినా వెంటనే షూటింగ్ మొదలవుతుందని అనుకోలేం.

మరోవైపు అభిమానులు కూడా ప్రభాస్‌ను మళ్లీ సరదాగా కనిపించే పాత్రలో చూడాలని కోరుకుంటున్నారు. అలాంటి సినిమాకు వందల కోట్ల బడ్జెట్ అవసరం లేకపోవచ్చు. అయితే కరుణాకరన్ నుంచి కూడా 'డార్లింగ్' రోజుల నాటి వినోదాన్ని మించిన కథ రావాలి. గత సినిమాలతో పోలిస్తే ఇప్పుడు ప్రభాస్ మార్కెట్ ఎన్నో రెట్లు పెరిగింది. ఆ స్థాయికి తగ్గించాలని మళ్లీ భారీ సెట్లు, గ్రాఫిక్స్ జోడిస్తే పరిస్థితి మొదటికే వస్తుంది. తక్కువ సమయంలో పూర్తి చేయగలిగే కథను ఎంచుకోవడమే ఈ ప్రయత్నంలో కీలకం.