ఆంధ్రప్రదేశ్లో బాలీవుడ్ స్టార్ ఫిలింసిటీ నిర్మాణం?
తాజాగా బాలీవుడ్ అగ్రనటుడు సంజయ్ దత్, ఏపీ ఐటీ & విద్యుత్ శాఖ మంత్రి నారా లోకేష్తో భేటీ కావడం ఇప్పుడు టాలీవుడ్తో పాటు రాజకీయ వర్గాల్లోనూ పెను సంచలనంగా మారింది.;
ఆంధ్రప్రదేశ్లో సినీ పరిశ్రమ అభివృద్ధి కోసం ప్రయత్నాలు మొదలయ్యాయనే తొలి సంకేతం అందింది. తాజాగా బాలీవుడ్ అగ్రనటుడు సంజయ్ దత్, ఏపీ ఐటీ & విద్యుత్ శాఖ మంత్రి నారా లోకేష్తో భేటీ కావడం ఇప్పుడు టాలీవుడ్తో పాటు రాజకీయ వర్గాల్లోనూ పెను సంచలనంగా మారింది. ఏపీని పెట్టుబడులకు కేరాఫ్ అడ్రస్గా మార్చాలన్న లక్ష్యంతో ఉన్న లోకేష్.. సంజయ్ దత్ను రాష్ట్రంలో సినీ రంగ అభివృద్ధికి భాగస్వామి కావాలని ఆహ్వానించారు. ముంబైలో జరిగిన ఈ భేటీ కేవలం మర్యాదపూర్వకమైనది మాత్రమే కాకుండా.. ఏపీలో ఒక భారీ అంతర్జాతీయ స్థాయి ఫిలింసిటీ నిర్మాణానికి పునాది వేసేలా కనిపిస్తోంది.
ఆంధ్రప్రదేశ్లో షూటింగ్ లొకేషన్ల పరంగా ఉన్న అపారమైన అవకాశాలను ఈ సందర్భంగా నారా లోకేష్ వివరించారు. రాష్ట్రంలోని సుదీర్ఘమైన సముద్ర తీరం, కోనసీమ అందాలు, రాయలసీమలోని చారిత్రక కట్టడాలను బాలీవుడ్ చిత్రాలకు వేదికగా మార్చుకోవాలని ఆయన సూచించారు. కేవలం టాలీవుడ్ చిత్రాలకే పరిమితం కాకుండా, ఉత్తరాది చిత్ర పరిశ్రమ (బాలీవుడ్) కూడా ఏపీ వైపు చూసేలా సంజయ్ దత్ ఒక బలమైన వారధిగా వ్యవహరించే అవకాశం ఉందని రాజకీయ విశ్లేషకులు భావిస్తున్నారు.
ఈ ప్రాజెక్టు కార్యరూపం దాల్చడానికి ప్రభుత్వం కీలకమైన భరోసాను ఇచ్చింది. చిత్ర పరిశ్రమ ఎదుర్కొనే అతిపెద్ద సమస్య అయిన అనుమతుల విషయంలో `సింగిల్ విండో క్లియరెన్స్` పద్ధతిని అమలు చేస్తామని లోకేష్ హామీ ఇచ్చారు. షూటింగ్లకు అవసరమైన భూమి, విద్యుత్, ఇతర మౌలిక సదుపాయాల కల్పనలో ప్రభుత్వం పూర్తి సానుకూలంగా ఉందని స్పష్టం చేశారు. ఈ చొరవ వల్ల షూటింగ్ సమయం, ఖర్చు గణనీయంగా తగ్గే అవకాశం ఉండటంతో సినీ నిర్మాతలు ఆసక్తి చూపుతున్నారు.
గతంలో చిరంజీవి, బాలకృష్ణ వంటి టాలీవుడ్ దిగ్గజాలు ఏపీలో స్టూడియోల నిర్మాణం గురించి చర్చించినా, అవి క్షేత్రస్థాయిలో ఆశించినంత వేగంగా ముందుకు సాగలేదు. టాలీవుడ్ పెద్దలు హైదరాబాద్ను వదిలి వచ్చేందుకు వెనుకాడుతున్న తరుణంలో.. ఒక బాలీవుడ్ స్టార్ స్వయంగా ముందుకు రావడం ప్రాధాన్యత సంతరించుకుంది. సంజయ్ దత్ రాకతో టాలీవుడ్ ప్రముఖుల్లో కూడా కదలిక వస్తుందని.. తద్వారా ఏపీలో సినీ హబ్ ఏర్పాటు ప్రక్రియ వేగవంతం అవుతుందని ప్రభుత్వం భావిస్తోంది.
ఫిలింసిటీ నిర్మాణానికి విశాఖపట్నం తీర ప్రాంతం లేదా రాజధాని అమరావతి పరిసరాలను ఎంపిక చేసే యోచనలో ఉన్నట్లు తెలుస్తోంది. ఈ ప్రతిష్టాత్మక ప్రాజెక్టు ద్వారా స్థానిక యువతకు భారీగా ఉపాధి లభించనుంది. కేవలం నటన మాత్రమే కాకుండా ఎడిటింగ్, గ్రాఫిక్స్, లైటింగ్, ఇతర సాంకేతిక విభాగాల్లో వేలాది మందికి అవకాశాలు దక్కుతాయి. ఇది రాష్ట్ర ఆర్థిక వ్యవస్థకు కూడా కొత్త ఊపిరి పోయనుంది.
ప్రస్తుతానికి ఈ చర్చలు ప్రాథమిక దశలోనే ఉన్నా కానీ, ప్రభుత్వం ప్రతిపాదించిన ఇన్సెంటివ్స్ విషయంలో సంజయ్ దత్ సంతృప్తిగా ఉన్నట్లు సమాచారం. త్వరలోనే ఈ ప్రాజెక్టుకు సంబంధించి అధికారికంగా ఒక అవగాహన ఒప్పందం (ఎంవోయు) కుదిరే అవకాశం ఉంది. ఒకవేళ ఈ ప్లాన్ వర్కవుట్ అయితే.. సంజయ్ దత్ పెట్టుబడులు ఆంధ్రప్రదేశ్ను దక్షిణాదిలోనే మరో కీలకమైన సినీ కేంద్రంగా మారుస్తాయనడంలో సందేహం లేదు. అయితే ఫిలింసిటీ నిర్మాణంలో సంజయ్ దత్ పాత్ర ఎంతవరకూ అనే దానిపై మరింత స్పష్ఠత రావాల్సి ఉంది. సంజయ్ దత్ ఇటీవల వరుసగా టాలీవుడ్ స్టార్ల సినిమాల్లో నటిస్తున్నారు. రామ్ తో డబుల్ ఇస్మార్ట్ లో నటించాడు. ఇటీవల ప్రభాస్ నటించిన రాజా సాబ్ లో సంజూ కీలక పాత్రను పోషించిన సంగతి తెలిసిందే.