పట్టు వదలని నాని..

‘ది ప్యారడైజ్’కు రిలీజ్ రోజు నుంచే మిక్సిడ్ టాక్ వచ్చింది. ఈ విషయాన్ని నాని కూడా దాచిపెట్టలేదు. సినిమా అందరికీ ఒకేలా కనెక్ట్ కాలేదని ఆయన ఓపెన్‌గానే మాట్లాడారు. సాధారణంగా ఇలాంటి టాక్ వచ్చిన తర్వాత హీరోలు ప్రమోషన్స్ తగ్గించి నెక్స్ట్ పనుల్లోకి వెళ్లిపోతారు. కానీ నాని మాత్రం అలా చేయడం లేదు. సినిమా థియేటర్లలో ఉన్నంత వరకు తనవంతుగా ఎంత చేయాలో అంత చేయాలనే మూడ్‌లో కనిపిస్తున్నారు.

తెలంగాణలో ప్రమోషన్స్ చేసిన తర్వాత ఇప్పుడు ఆంధ్రప్రదేశ్‌లోనూ వరుసగా తిరుగుతున్నారు. విజయవాడలో కనకదుర్గమ్మ ఆలయాన్ని దర్శించుకోవడంతో పాటు, ఒంగోలులోని థియేటర్‌కు వెళ్లి ఆడియన్స్‌ను కలవనున్నారు. ఎయిర్‌పోర్ట్ నుంచి బయటకు వచ్చిన విజువల్స్ కూడా సోషల్ మీడియాలో వైరల్ అవుతున్నాయి. అంటే సినిమా మీద టాక్ ఎలా ఉన్నా, పబ్లిక్‌లో ‘ది ప్యారడైజ్’ పేరు తగ్గకుండా చూసే ప్రయత్నం మాత్రం నాని వైపు నుంచి గట్టిగానే జరుగుతోంది.

మొదటి వీకెండ్ వరకు కలెక్షన్స్ కూడా పూర్తిగా పడిపోలేదు. ఓపెనింగ్స్‌కు నాని మార్కెట్, భారీ ప్రమోషన్, శ్రీకాంత్ ఓదెల కాంబినేషన్ బాగా ఉపయోగపడ్డాయి. అయితే వీకెండ్ తర్వాతే అసలు లెక్క మొదలవుతుంది. మిక్సిడ్ టాక్ ఉన్న సినిమాలకు సోమవారం నుంచి డ్రాప్స్ ఎలా ఉంటాయన్నదే కీలకం. అందుకే ఇప్పుడు టీమ్ కూడా ప్రమోషన్స్‌ను ఆపకుండా మరోసారి ఆడియన్స్‌ను థియేటర్ల వైపు తిప్పే ప్రయత్నం చేస్తోంది.

దీనికి గాంధీ జయంతి కూడా కలిసి వస్తోంది. మధ్యలో హాలిడే ఉండటం, వెంటనే మరో వీకెండ్ రావడం ‘ది ప్యారడైజ్’కు రెండో ఛాన్స్‌లా మారొచ్చు. మొదటి వీకెండ్‌లో చూడని ఆడియన్స్‌ను ఈ గ్యాప్‌లో థియేటర్లకు రప్పించగలిగితే కలెక్షన్స్ ఇంకొన్ని రోజులు నిలబడే అవకాశం ఉంటుంది. అందుకే నాని ఈ టైమ్‌లోనే ఆంధ్రా టూర్ పెట్టుకోవడం కూడా ప్లాన్డ్ మూవ్‌లానే కనిపిస్తోంది.

అయితే ఇప్పటికీ డిస్ట్రిబ్యూటర్లు పూర్తి స్థాయిలో లాభాల్లోకి వచ్చేశారని చెప్పే పరిస్థితి లేదు. భారీ బిజినెస్‌తో వచ్చిన సినిమా కావడంతో కొన్ని ఏరియాల్లో ఇంకా రికవరీ జరగాల్సి ఉంది. మొదటి నాలుగు రోజులు వచ్చిన నంబర్స్ ఒక లెక్క అయితే, ఇక నుంచి వచ్చే ప్రతి రోజు కలెక్షన్ బయ్యర్లకు చాలా కీలకం. ముఖ్యంగా వీక్ డేస్‌లో డ్రాప్ కంట్రోల్ అయితేనే గాంధీ జయంతి, నెక్స్ట్ వీకెండ్ అడ్వాంటేజ్ నిజంగా ఉపయోగపడుతుంది.

నాని మాత్రం సినిమా నుంచి దూరంగా వెళ్లే మూడ్‌లో లేరు. మిక్సిడ్ టాక్‌ను ఒప్పుకున్నాక కూడా ప్రమోషన్ తగ్గించకుండా థియేటర్లకు వెళ్లడం, ఆడియన్స్‌ను కలవడం చూస్తుంటే ‘ది ప్యారడైజ్’ రన్‌ను ఇంకొన్ని రోజులు లాగాలనే ప్రయత్నం క్లియర్‌గా కనిపిస్తోంది. ఇప్పుడు ఆయన టూర్ ఎంతవరకు బూస్ట్ ఇస్తుందనేది చూడాలి.