ప్రభుదేవా ఇష్యూపై ఎంఎస్ రాజు ఓపెన్ అయ్యాడు.. అసలు స్టోరీ ఇదే!

తెలుగు సినిమా పరిశ్రమలో స్టార్ ప్రొడ్యూసర్‌గా, దర్శకుడిగా తనకంటూ ప్రత్యేక స్థానాన్ని సంపాదించుకున్న ప్రముఖ నిర్మాత ఎమ్మెస్ రాజు. ఎంతోమంది నటీనటులు, దర్శకులను ఇండస్ట్రీకి పరిచయం చేసిన ఆయన, ప్రముఖ కొరియోగ్రాఫర్ ప్రభుదేవాను 'నువ్వొస్తానంటే నేనొద్దంటానా' చిత్రంతో దర్శకుడిగా పరిచయం చేశారు. ఆ తర్వాత వీరిద్దరి కలయికలో వచ్చిన 'పౌర్ణమి' సమయంలో ఇద్దరి మధ్య విభేదాలు వచ్చాయని ప్రచారం జరిగింది. తాజాగా ఇచ్చిన ఓ ఇంటర్వ్యూలో ఎమ్మెస్ రాజు ఈ ఇష్యూపై స్పందిస్తూ అసలు విషయాన్ని బయటపెట్టారు..

పౌర్ణమి సమయం నాటి రూమర్లు:

'నువ్వొస్తానంటే నేనొద్దంటానా' బాక్సాఫీస్ వద్ద ఇండస్ట్రీ హిట్‌గా నిలవడంతో, ఎమ్మెస్ రాజు-ప్రభుదేవా కాంబినేషన్ పై భారీ అంచనాలు ఏర్పడ్డాయి. ఆ తర్వాతి ప్రాజెక్ట్ 'పౌర్ణమి' బాక్సాఫీస్ వద్ద ఆశించిన స్థాయిలో విజయం సాధించలేకపోయింది. ఇక ఆ సినిమా నిర్మాణ సమయంలోనే నిర్మాత ఎమ్మెస్ రాజుకు, దర్శకుడు ప్రభుదేవాకు మధ్య తీవ్ర విభేదాలు వచ్చాయంటూ అప్పట్లో టాలీవుడ్ వర్గాల్లో పెద్ద ఎత్తున వార్తలు చక్కర్లు కొట్టాయి.

ఎమ్మెస్ రాజు ఏమన్నారంటే?:

తాజాగా ఓ ఇంటర్వ్యూలో పాల్గొన్న ఎమ్మెస్ రాజుకు ఇదే ప్రశ్న ఎదురైంది. దానికి ఆయన స్పందిస్తూ.. "ప్రభుదేవాకు, నాకు మధ్య ఎలాంటి విభేదాలు లేవు. అసలు నాతో ఎవరూ గొడవ పెట్టుకోవాలని అనుకోరు. ఇక నేను షూటింగ్ స్పాట్‌కు వెళ్తే అక్కడ వాతావరణం అంతా ఎంతో ప్రశాంతంగా ఉంటుంది. ఒకవేళ నేను కాస్త గట్టిగా మాట్లాడినా నన్ను గౌరవించి ఎవరూ ఏమీ అనరు" అని స్పష్టం చేశారు.

ఇన్నేళ్ల ప్రయాణంలో గొడవలే లేవు:

తన సుదీర్ఘ సినీ ప్రయాణం గురించి చెప్తూ, "నా కెరీర్‌లో ఇప్పటివరకు ఏ దర్శకుడితో కానీ, హీరో, హీరోయిన్‌లతో లేదా ఏ ఇతర సాంకేతిక నిపుణుడితో కానీ గొడవ పడిన సందర్భం లేదు. ఇక నా సెట్స్‌పై ఎప్పుడూ ఆరోగ్యకరమైన, ప్రశాంతమైన వాతావరణమే ఉంటుంది. ప్రభుదేవాతో కూడా నా అనుబంధం ఎప్పుడూ బాగుంది" అని చెబుతూ గతంలో వచ్చిన రూమర్లకు పూర్తిగా చెక్ పెట్టారు.

‘అగధ’తో వస్తున్న ఎంఎస్ రాజు:

కేవలం నిర్మాతగానే కాకుండా ప్రస్తుతం దర్శకుడిగానూ వరుస సినిమాలు తీస్తూ బిజీగా ఉన్నారు ఎమ్మెస్ రాజు. ఆయన దర్శకత్వం వహించిన తాజా మిస్టికల్ డివైన్ థ్రిల్లర్ 'అగధ' సినిమా విడుదలకు సిద్ధమైంది. కామాక్షి భాస్కర్ల, శ్రవణ్ రెడ్డి ప్రధాన పాత్రల్లో నటిస్తున్న ఈ చిత్రం ఆగస్టు 14న ప్రపంచవ్యాప్తంగా థియేటర్లలోకి రాబోతోంది.

రూమర్లకు సరైన సమాధానం:

సినీ ఇండస్ట్రీలో ప్రాజెక్టులు ప్లాప్ అయినప్పుడు ఇలాంటి ప్రచారాలు రావడం సహజమే అయినా, ఎమ్మెస్ రాజు ఇచ్చిన స్పష్టతతో ప్రభుదేవాతో విభేదాల వార్తలకు ఫుల్ స్టాప్ పడింది. ఇక తన కొత్త సినిమా 'అగధ'తో దర్శకుడిగా ఆయన ఎలాంటి విజయాన్ని అందుకుంటారో చూడాలి.