మంచు ఫ్యామిలీ మరోసారి దొరికేసింది!

మంచు ఫ్యామిలీకి సోషల్ మీడియాలో ఉన్న రెప్యుటేషన్ ఎలాంటిదన్నది అందరికీ తెలిసిందే. ఈ విషయంలో మంచు మోహన్ బాబు సైతం ఇటీవలే ఒక కార్యక్రమంలో ఓపెన్‌ గా మాట్లాడేశారు. తమ గురించి తమాషా చేస్తూ పెట్టిన వీడియోలవీ చూస్తుంటానని సరదాగానే మాట్లాడారు. మరోవైపు మంచు లక్ష్మి ఈ విషయమై ఒక సందర్భంలో చాలా సీరియస్‌ గా స్పందించింది. ఐతే మంచు కుటుంబ సభ్యులు స్పందన ఎలా ఉన్నప్పటికీ.. సోషల్ మీడియాలో మాత్రం వాళ్ల మీద మీమ్స్ ఆగట్లేదు. వాళ్లు ఎక్కడ దొరుకుతారా అని ఎదురు చూసే జనాలు.. ఏ చిన్న అవకాశం దొరికినా చెలరేగిపోతుంటారు. ఇటీవలే మోహన్ బాబు అలాగే దొరికేశారు.

కొన్ని రోజుల కిందట మోహన్ బాబు తన కూతురు లక్ష్మీ ప్రసన్నతో కలిసి ప్రముఖ పాత్రికేయుడు రాజ్‌దీప్ సర్దేశాయ్‌ తో ఇంగ్లిష్‌ లో ఇంటర్వ్యూ ఇచ్చారు. ఈ సందర్భంగా ఆయన అనేక విషయాలపై మాట్లాడారు. తన నటనలో ప్రత్యేకతను చాటిచెప్పడానికి ‘ఎం.ధర్మరాజు ఎంఏ’ సినిమాలోని ఒక సన్నివేశాన్ని ఉదాహరణగా చెప్పారు. అందులో తాను తన భార్యనే చంపమనే డైలాగ్ డైలాగ్ చెప్పి.. దాన్ని ఇంగ్లిష్‌ లోకి అనువదించి చెప్పడానికి ప్రయత్నించారు. ఈ క్రమంలో ఒక్క దెబ్బతో చంపేయాలి అనే మాటను ఇంగ్లిష్‌ లోకి అనువదిస్తూ.. ‘‘డోంట్ కిల్ సో మెనీ టైమ్స్ లైక్ దిస్.. ఫసక్’’ అన్నారు. అంతే ఈ ‘ఫసక్’ అనే మాట ట్రోలర్స్ పట్టుకున్నారు. దీని మీద ఇబ్బడి ముబ్బడిగా మీమ్స్ వచ్చేశాయి. అవి సోషల్ మీడియాలో జనాలకు మామూలు ఎంటర్ టైన్ మెంట్ ఇవ్వట్లేదు. యూట్యూబ్‌ లోకి వెళ్లి ‘ఫసక్’ అని కొడితే కుప్పలు కుప్పలుగా మీమ్ వీడియోస్ వస్తున్నాయి. పనిలో పనిగా మంచు విష్ణు.. మంచు లక్ష్మిలకు సంబంధించిన మీమ్స్ కూడా జోడిస్తూ ట్రోలర్స్ రెచ్చిపోతున్నారు.