కామెడీ మూవీ ట్రై చేయ‌బోతున్న విలక్షణ దర్శకుడు..?

తెలుగు తమిళ భాషల్లో వైవిధ్యమైన సినిమాలతో తనకంటూ ప్రత్యేకమైన గుర్తింపు తెచ్చుకున్న దర్శకుడు వి.ఐ. ఆనంద్. 'హృదయం ఎక్కడ ఉన్నది' అనే సినిమాతో దర్శకుడిగా పరిచయమైన ఆనంద్.. 'అప్పుచ్చి గ్రామమ్' అనే తమిళ్ సినిమా రూపొందించాడు. ఆ తర్వాత సందీప్ కిషన్ తో 'టైగర్' సినిమా తీసి అందరి దృష్టిలో పడ్డాడు. ఇక యువ హీరో నిఖిల్ సిద్ధార్థ్ తో 'ఎక్కడికి పోతావు చిన్నవాడా' సినిమా తెరకెక్కించి మంచి సక్సెస్ అందుకున్నాడు. సూపర్ నేచురల్ థ్రిల్లర్ గా వచ్చిన ఈ సినిమాతో వి ఐ ఆనంద్ కి క్రేజీ ఆఫర్స్ వచ్చి చేరాయి.

ఈ క్రమంలో విఐ ఆనంద్ దర్శకత్వంలో అల్లు శిరీష్ - సురభి హీరోహీరోయిన్లుగా 'ఒక్కక్షణం' అనే సినిమా వచ్చింది. పారలెల్ వరల్డ్ అనే డిఫరెంట్ కాన్సెప్ట్ తో వచ్చిన ఈ సినిమా హిట్ గా నిలిచింది. దీంతో మాస్ మహారాజ్ రవితేజ ను డైరెక్ట్ చేసే ఛాన్స్ కొట్టేసాడు ఆనంద్. పాయల్ రాజ్ పుత్ - నభా నటేష్ హీరోయిన్లుగా భారీ బడ్జెట్ తో తెరకెక్కించిన ఈ సైన్స్ ఫిక్షన్ యాక్షన్ ఫిలిం డిజాస్టర్ గా మిగిలిపోయింది. దర్శకుడు విఐ ఆనంద్ తో పాటు రవితేజ కెరీర్ కు కూడా 'డిస్కోరాజా' మైనస్ గా మారింది. ఈ నేపథ్యంలో ఇప్పటివరకు డిఫ‌రెంట్ కాన్సెప్ట్స్ తో సినిమాలు చేసిన విఐ ఆనంద్.. ఈసారి కాస్త గ్యాప్ తీసుకుని త‌న గ్రాఫ్ మారుస్తున్న‌ట్లుగా సమాచారం. ఓ అవుట్ అండ్ అవుట్ కామెడీ ఎంట‌ర్ టైన‌ర్ చేయడానికి ఆనంద్ సన్నాహాలు చేసుకుంటున్నారని తెలుస్తోంది. దీనికి సంబంధించిన వివరాలు త్వరలోనే వెల్లడికానున్నాయి.