అమెరికా ఎన్నికల్లో పోప్ లియో XIV ఓటు.. చరిత్ర సృష్టించిన కాథలిక్ చర్చి అధిపతి!
అయితే పోప్ ఓటు ఎవరికి వేశారు అనే వివరాలను వాటికన్ వెల్లడించలేదు. ఆయన ఓటు పూర్తిగా వ్యక్తిగత నిర్ణయంగానే మిగిలింది.
By: Tupaki Desk | 31 Oct 2026 9:42 AM IST
ప్రపంచవ్యాప్తంగా కోట్లాది మంది అనుచరులు ఉన్న కాథలిక్ చర్చి అధిపతి పోప్ లియో XIV ఇప్పుడు ఒక ఆసక్తికరమైన కారణంతో వార్తల్లో నిలిచారు. అమెరికా 2026 మధ్యంతర ఎన్నికల్లో ఆయన ఓటు హక్కును వినియోగించుకున్నారు. దీంతో అమెరికా ఎన్నికల్లో ఓటు వేసిన తొలి పోప్‌గా ఆయన చరిత్ర సృష్టించారు.
చికాగోలో జన్మించిన పోప్ లియో XIV అసలు పేరు రాబర్ట్ ఫ్రాన్సిస్ ప్రీవోస్ట్. ప్రస్తుతం వాటికన్‌లో అత్యున్నత మతపరమైన బాధ్యతలు నిర్వహిస్తున్నప్పటికీ, ఆయన అమెరికా పౌరసత్వాన్ని కొనసాగిస్తున్నారు. ఈ నేపథ్యంలో తన సొంత రాష్ట్రం ఇల్లినాయిస్‌లో ఓటు వేసేందుకు మెయిల్-ఇన్ బ్యాలెట్‌ను ఉపయోగించారు. నవంబర్ 3న జరగనున్న మధ్యంతర ఎన్నికలకు సంబంధించి అక్టోబర్ 3న ఆయన బ్యాలెట్ కోసం దరఖాస్తు చేసుకున్నట్లు స్థానిక ఎన్నికల అధికారులు వెల్లడించారు.
వాటికన్ ప్రెస్ ఆఫీస్ కూడా ఈ విషయాన్ని అధికారికంగా ధృవీకరించింది. ప్రజాస్వామ్య ప్రక్రియలో పాల్గొనడం పౌరుల హక్కు మాత్రమే కాదు.. బాధ్యత కూడా అని పోప్ అభిప్రాయపడినట్లు తెలిపింది. గతంలో పెరూలో నివసించిన సమయంలోనూ అర్హత ఉన్నప్పుడు ఓటు వేసినట్లు వాటికన్ వెల్లడించింది.
ఈ వార్తకు మరో కోణం కూడా ఉంది. రాజకీయ అంశాలపై పోప్ గతంలో తన అభిప్రాయాలను బహిరంగంగానే వ్యక్తం చేశారు. ముఖ్యంగా వలస విధానాలు, అంతర్జాతీయ ఘర్షణలు, శాంతి వంటి అంశాలపై ఆయన చేసిన వ్యాఖ్యలు చర్చకు దారితీశాయి. అమెరికా అధ్యక్షుడు డొనాల్డ్ ట్రంప్‌తో కూడా కొన్ని అంశాల్లో ఆయన అభిప్రాయాలు భిన్నంగా ఉన్నాయి.
అయితే పోప్ ఓటు ఎవరికి వేశారు అనే వివరాలను వాటికన్ వెల్లడించలేదు. ఆయన ఓటు పూర్తిగా వ్యక్తిగత నిర్ణయంగానే మిగిలింది.
ఇటీవల ఊపిరితిత్తుల్లో క్యాన్సర్ కణితిని తొలగించేందుకు శస్త్రచికిత్స చేయించుకున్న పోప్ ప్రస్తుతం కోలుకుంటున్నారు. వైద్యుల ప్రకారం క్యాన్సర్ స్థానికంగానే ఉండటంతో తదుపరి చికిత్స అవసరం లేదని వెల్లడించారు.
మతపరమైన బాధ్యతలు నిర్వహిస్తూనే పౌరుడిగా తన ఓటు హక్కును వినియోగించుకోవడం ద్వారా పోప్ ప్రజాస్వామ్య భాగస్వామ్యంపై ఒక ప్రత్యేక సందేశాన్ని ఇచ్చారు.