జెన్సన్కు మస్క్ ఉద్యోగం ఇస్తారా? వివాదం మధ్య ఆసక్తికర ఆఫర్!
ఎన్విడియా సీఈఓ జెన్సన్ హువాంగ్ వివాహేతర సంబంధంపై వివాదం కొనసాగుతున్న వేళ ఎలాన్ మస్క్ స్పందన ఆసక్తికరంగా మారింది. జెన్సన్ను ఉద్యోగంలోకి తీసుకోవాలని ఓ ఎక్స్ అకౌంట్ మస్క్ను కోరగా.. అందుకు 'అది గౌరవంగా భావిస్తా' అంటూ బదులిచ్చారు. అయితే ఇది అధికారిక ఉద్యోగ ఆఫర్ కాదు. జెన్సన్ను ఎన్విడియా నుంచి తొలగించినట్లు కూడా ప్రకటన రాలేదు.
By: Tupaki Desk | 12 Nov 2026 11:19 AM ISTఎన్విడియా సీఈఓ జెన్సన్ హువాంగ్ వ్యక్తిగత జీవితం ఇప్పుడు టెక్ ప్రపంచంలో హాట్ టాపిక్గా మారింది. ఇప్పటికే వివాహేతర సంబంధం గురించి వచ్చిన వార్తలపై ఆయన తన భార్య, పిల్లలు, సంస్థ ఉద్యోగులకు క్షమాపణలు చెప్పారు. తాను భార్యకు నమ్మకద్రోహం చేశానని స్వయంగా అంగీకరించారు. ఈ విషయంలో ఎలాంటి సాకులు చెప్పలేనని, తన తప్పుకు పూర్తి బాధ్యత తీసుకుంటానని ఉద్యోగులకు రాసిన లేఖలో పేర్కొన్నారు.
ఇదిలా ఉండగా, ఆయనకు సంబంధించిన మరో సంబంధంపై కూడా వార్తలు రావడంతో వివాదం మరింత పెరిగింది. ముఖ్యంగా చైనా నిఘా వ్యవస్థతో సంబంధాలు ఉన్నాయని అమెరికా అధికారులు అనుమానిస్తున్న మహిళతో ఆయనకు సన్నిహిత సంబంధం ఉందంటూ కథనాలు వచ్చాయి. ఈ ఆరోపణలపై ఎన్విడియా బోర్డు స్వతంత్ర విచారణ ప్రారంభించింది. అయితే కంపెనీ రహస్యాలు లేదా జాతీయ భద్రతకు సంబంధించిన సమాచారం లీక్ అయినట్లు ఆధారాలు లేవని బోర్డు తెలిపింది.
ఈ పరిణామాల మధ్య ఎలాన్ మస్క్ పేరు తెరపైకి వచ్చింది. జెన్సన్ను ఉద్యోగంలోకి తీసుకోవాలంటూ ZeroHedge అనే ఎక్స్ అకౌంట్ మస్క్ను ట్యాగ్ చేసింది. దీనికి ఆయన 'That would be an honor' అంటూ సమాధానమిచ్చారు.
దీంతో జెన్సన్కు ఎన్విడియాలో సమస్యలు వస్తే మస్క్ దగ్గర ఉద్యోగం రెడీనా అంటూ సోషల్ మీడియాలో చర్చ మొదలైంది. మరోవైపు ఎన్విడియా బోర్డు ఆయన భవిష్యత్తుపై చర్చించవచ్చంటూ వార్తలు వచ్చాయి.
అయితే మస్క్ నుంచి వచ్చినది అధికారిక ఉద్యోగ ఆఫర్ కాదు. జెన్సన్ను తొలగించినట్లు కూడా ఎలాంటి ప్రకటన లేదు. కానీ టెక్ ప్రపంచంలో ఇంతటి కీలకమైన వ్యక్తికి మస్క్ ఇచ్చిన ఈ ఒక్క రిప్లై మాత్రం ఆసక్తికరంగా మారింది.
