జెన్సన్ హువాంగ్‌కు మస్క్, బిల్ అక్‌మన్ మద్దతు.. వివాదంపై ఎన్విడియా బోర్డు దర్యాప్తు!

ఎన్విడియా సీఈఓ జెన్సన్ హువాంగ్ వ్యక్తిగత జీవితానికి సంబంధించిన వివాదం ఇప్పుడు అంతర్జాతీయ టెక్ వర్గాల్లో చర్చకు దారితీసింది. చైనా గూఢచర్య కార్యకలాపాలతో సంబంధం ఉందని అమెరికా నిఘా వర్గాలు అనుమానిస్తున్న అలైస్ హువాంగ్‌తో ఆయనకు సన్నిహిత సంబంధాలు ఉన్నాయన్న వార్తలు కలకలం రేపుతున్నాయి. ఈ నేపథ్యంలో హువాంగ్‌కు ప్రముఖ వ్యాపారవేత్తలు ఎలాన్ మస్క్, బిల్ అక్‌మన్ మద్దతు ప్రకటించడం ఆసక్తికరంగా మారింది.

బిల్ అక్‌మన్ స్పందిస్తూ.. జెన్సన్ గొప్ప వ్యక్తి అయినప్పటికీ మనుషులుగా తప్పులు చేయడం సహజమని పేర్కొన్నారు. తన తప్పును అంగీకరించి బాధ్యత తీసుకున్న ఆయనకు, కుటుంబానికి అందరూ అండగా ఉండాలని కోరారు. దీనిపై ఎలాన్ మస్క్ కూడా స్పందిస్తూ షాన్ మాగ్వైర్ అభిప్రాయంతో ఏకీభవిస్తున్నట్లు 'I agree' అని వ్యాఖ్యానించారు.

అయితే ఈ వ్యవహారం కేవలం వ్యక్తిగత వివాదానికే పరిమితం కాలేదు. సింగపూర్‌కు చెందిన మెగాస్పీడ్ సంస్థలో పనిచేసిన అలైస్ హువాంగ్ ద్వారా ఎన్విడియా సమాచారాన్ని చైనాకు చేరవేసే ప్రయత్నం జరిగిందా అనే అనుమానాలు తెరపైకి వచ్చాయి. ఈ సంస్థ ఎన్విడియా నుంచి సుమారు 4.8 బిలియన్ డాలర్ల విలువైన చిప్‌లను కొనుగోలు చేసినట్లు వార్తలు వచ్చాయి.

ఈ ఆరోపణల నేపథ్యంలో ఎన్విడియా బోర్డు స్వతంత్ర దర్యాప్తునకు ఆదేశించింది. అయితే కంపెనీ రహస్యాలు లేదా అమెరికా జాతీయ భద్రతకు సంబంధించిన సమాచారం లీక్ అయిందని భావించడానికి ప్రస్తుతం తమ వద్ద ఆధారాలు లేవని బోర్డు వెల్లడించింది.

మరోవైపు తన భార్య లోరీ, పిల్లలకు, సంస్థ ఉద్యోగులకు హువాంగ్ క్షమాపణలు చెప్పారు. తన భార్యకు నమ్మకద్రోహం చేశానని, దీనికి ఎలాంటి సమర్థన లేదని అంగీకరించారు. అయితే అలైస్ పేరును తన క్షమాపణ ప్రకటనలో ఆయన ప్రస్తావించలేదు.

వ్యక్తిగత తప్పిదం, అంతర్జాతీయ గూఢచర్య అనుమానాలు ఒకే వ్యవహారంలో కలవడంతో ఇప్పుడు ఎన్విడియా నాయకత్వం, సంస్థ భద్రతపై అందరి దృష్టి పడింది.