మిస్ వరల్డ్‌లో భారత్ సత్తా: ఆరు కిరీటాలు - మన విజయ గాథ

ప్రపంచ సుందరి పోటీలు ప్రపంచవ్యాప్తంగా అత్యంత ప్రతిష్టాత్మకమైన అందాల వేదికల్లో ఒకటి. 160కి పైగా దేశాల నుండి సుందరీమణులు పాల్గొనే ఈ పోటీకి ప్రపంచవ్యాప్తంగా భారీ ఆదరణ ఉంటుంది. ఈ బ్యూటీ వరల్డ్‌లో భారత్ తనకంటూ ఒక ప్రత్యేకమైన స్థానాన్ని సంపాదించుకుంది.

మిస్ వరల్డ్ కిరీటాన్ని అత్యధిక సార్లు గెలుచుకున్న దేశాల్లో భారత్ ముందువరుసలో ఉంది. మొత్తం ఆరుసార్లు ఈ ప్రతిష్టాత్మక కిరీటాన్ని మన దేశం గెలుచుకుంది. అత్యధిక కిరీటాలు (6) గెలిచిన దేశాల జాబితాలో భారత్ వెనిజులాతో కలిసి ప్రథమ స్థానాన్ని పంచుకుంటుంది.

భారత సుందరీమణుల మిస్ వరల్డ్ ప్రస్థానం 1966లో ప్రారంభమైంది. ముంబైకి చెందిన రీటా ఫరియా మొట్టమొదటిసారిగా మిస్ వరల్డ్ కిరీటాన్ని దక్కించుకొని చరిత్ర సృష్టించింది. మిస్ వరల్డ్‌గా ఎంపికైన తొలి మెడికల్ డాక్టర్ కూడా ఆమె కావడం విశేషం. ఈ విజయానంతరం ఆమెకు సినిమా అవకాశాలు వచ్చినా, తన వైద్య వృత్తికే ఆమె ప్రాధాన్యమిచ్చారు.

రీటా ఫరియా తర్వాత, భారత దేశం మరో ఐదుగురు సుందరీమణులను ప్రపంచానికి మిస్ వరల్డ్‌లుగా అందించింది:

ఐశ్వర్య రాయ్ (1994)

డయానా హెడెన్ (1997)

యుక్తా ముఖి (1999)

ప్రియాంక చోప్రా (2000)

మానుషి చిల్లర్ (2017)

ముఖ్యంగా, 2000 సంవత్సరం భారత చరిత్రలో సువర్ణాక్షరాలతో లిఖించదగినది. ఆ ఏడాదిలో భారత్ అపూర్వమైన విజయాన్ని సాధించింది. ప్రియాంక చోప్రా మిస్ వరల్డ్‌గా, లారా దత్తా మిస్ యూనివర్స్‌గా, దియా మీర్జా మిస్ ఆసియా పసిఫిక్‌గా గెలుపొందారు. ఒకే సంవత్సరంలో మూడు ప్రధాన అంతర్జాతీయ బ్యూటీ పాజెంట్ టైటిళ్లను గెలిచిన ఏకైక దేశంగా భారత్ రికార్డు సృష్టించింది.

ఈ విజయాలు ప్రపంచ వేదికపై భారతీయ మహిళల అందం, మేధస్సు , ఆత్మవిశ్వాసాన్ని చాటి చెప్పాయి. మిస్ వరల్డ్ వంటి అంతర్జాతీయ పోటీలలో భారత్ సాధించిన విజయాలు దేశానికి ఎంతో గర్వకారణంగా నిలుస్తున్నాయి. భారతీయ సుందరీమణులు గ్లోబల్ బ్యూటీ వరల్డ్‌లో తమదైన ముద్ర వేసి, దేశ గౌరవాన్ని ఇనుమడింపజేశారు.