అమెరికాలో ట్రంప్ ట్రావెల్ బ్యాన్ అమలు.. ఎయిర్ పోర్టుల్లో ప్రయాణికులకు నరకం

అమెరికా అధ్యక్షుడు డొనాల్డ్ ట్రంప్ ఆఫ్రికా, మిడిల్ ఈస్ట్ సహా 12 దేశాల పౌరులపై విధించిన ప్రయాణ నిషేధం (ట్రావెల్ బ్యాన్) సోమవారం నుంచి అమల్లోకి వచ్చింది. ఈ నిషేధం కారణంగా అమెరికాలోని విమానాశ్రయాల్లో చాలా మంది ప్రయాణికులు తీవ్ర ఇబ్బందులు ఎదుర్కొంటున్నారు. నిషేధిత దేశాల నుంచే కాకుండా ఇతర దేశాల నుంచి వస్తున్న వారిని కూడా అమెరికా అధికారులు మరింత క్షుణ్ణంగా ప్రశ్నిస్తున్నారు.

ఈ పరిణామం అమెరికాకు ప్రయాణించాలనుకుంటున్న వారికి ఆందోళన కలిగిస్తోంది. ఇప్పటికే చెల్లుబాటయ్యే వీసాలు ఉన్న ప్రయాణికులు కూడా విమానాశ్రయాల్లో విస్తృతమైన తనిఖీలను ఎదుర్కొంటున్నారు.

-గ్వాటెమాలన్ దంపతుల అనుభవం:

ఈ సోమవారం గ్వాటెమాల పౌరులు విన్సెంటా అగ్యిలార్ , ఆమె భర్త మయామి అంతర్జాతీయ విమానాశ్రయానికి చేరుకున్నారు. వారికి గత వారం టూరిస్ట్ వీసాలు మంజూరయ్యాయి. అయితే విమానాశ్రయంలో అమెరికా అధికారులు వారిని మూడు వేర్వేరు ఇంటర్వ్యూలు చేశారు. ఈ అనుభవం తమను ఆందోళనకు గురిచేసిందని విన్సెంటా అగ్యిలార్ మీడియాకు తెలిపారు.

అధికారులు తమ ఉద్యోగం, పిల్లల సంఖ్య, చట్టపరమైన సమస్యలు తలెత్తితే ప్రయాణ ఖర్చులను ఎలా భరిస్తారు, అమెరికాలో ఎన్ని రోజులు ఉంటారు వంటి ప్రశ్నలు అడిగారని ఆమె వివరించారు. అగ్యిలార్ కుమారుడు 22 ఏళ్ల క్రితం గ్వాటెమాల నుంచి అమెరికాకు వలస వచ్చారు. అప్పటి నుండి అగ్యిలార్ దంపతులు అమెరికాకు రాలేదు, ఇప్పుడు తమ కుమారుడిని చూడడానికి వచ్చారు. తమ విమానం ల్యాండ్ అయిన తర్వాత గంటసేపటి వరకు తాము అక్కడే ఉన్నామని అగ్యిలార్ తెలిపారు.

గ్వాటెమాల ట్రంప్ కొత్తగా విధించిన నిషేధిత దేశాల జాబితాలో లేదు. అయినప్పటికీ, ఈ దంపతులు ఎదుర్కొన్న అనుభవం, నిషేధిత దేశాల నుంచే కాకుండా ఇతర దేశాల నుంచి వస్తున్న ప్రయాణికులను కూడా అధికారులు మరింత క్షుణ్ణంగా పరిశీలిస్తున్నారని స్పష్టం చేస్తుంది.

-నిషేధిత దేశాల జాబితా:

గత వారం ట్రంప్ విధించిన నిషేధిత దేశాల జాబితాలో ఆఫ్ఘానిస్థాన్, మయన్మార్, చాద్, ది రిపబ్లిక్ ఆఫ్ కాంగో, ఈక్వటోరియల్ గినియా, ఎరిట్రియా, హైతీ, ఇరాన్, లిబియా, సోమాలియా, సుడాన్, యెమెన్‌ ఉన్నాయి. వీటితో పాటు, బురుండి, క్యూబా, లావోస్, సియెర్రా లియోన్, టోగో, తుర్క్‌మెనిస్థాన్, వెనిజులా ప్రజలపై ఉన్న ఆంక్షలు పెరిగాయి.

అమెరికాలో అక్రమ వలసదారుల అరెస్టులతో లాస్‌ ఏంజెలెస్‌ నగరంలో ప్రజలు పెద్ద ఎత్తున నిరసనలు తెలుపుతున్న సమయంలోనే ఈ ట్రావెల్‌ బ్యాన్‌ కూడా అమల్లోకి రావడం గమనార్హం. ట్రంప్‌ మొదటిసారి అధ్యక్షుడిగా ఉన్న 2017లో విధించిన ట్రావెల్‌ బ్యాన్ సమయంలో విమానాశ్రయాల్లో తీవ్ర గందరగోళ పరిస్థితులు నెలకొన్నాయి. అయితే, ప్రస్తుతం అంతగా సమస్యలు లేకుండానే ఈ ట్రావెల్ బ్యాన్‌ అమలవుతున్నప్పటికీ, ప్రయాణికులు ఎదుర్కొంటున్న ఇబ్బందులు మాత్రం కొనసాగుతున్నాయి.