Begin typing your search above and press return to search.

ప్రపంచంలోనే అత్యంత శక్తివంతమైన పాస్‌పోర్ట్ సింగపూర్‌దే.. భారత్ స్థానం ఎంతంటే?

2026 హెన్లీ పాస్‌పోర్ట్ ఇండెక్స్‌లో సింగపూర్ ప్రపంచంలోనే అత్యంత శక్తివంతమైన పాస్‌పోర్ట్‌గా మొదటి స్థానంలో నిలిచింది. ఆ దేశ పాస్‌పోర్ట్‌తో 193 గమ్యస్థానాలకు వీసా లేకుండా వెళ్లవచ్చు. జపాన్, దక్షిణ కొరియా, యూఏఈ రెండో స్థానంలో ఉన్నాయి. భారత్ 84వ ర్యాంక్ సాధించినప్పటికీ, వీసా లేకుండా ప్రయాణించగల గమ్యస్థానాలు గతేడాది 57 నుంచి 55కు తగ్గాయి.

By:  Tupaki Desk   |   14 Nov 2026 10:53 AM IST
ప్రపంచంలోనే అత్యంత శక్తివంతమైన పాస్‌పోర్ట్ సింగపూర్‌దే.. భారత్ స్థానం ఎంతంటే?
X

విదేశాలకు వెళ్లాలంటే ముందుగా వీసా తీసుకోవడం తప్పనిసరి. అయితే కొన్ని దేశాల పాస్‌పోర్ట్ ఉన్నవారికి ఈ ఇబ్బంది ఉండదు. వీసా కోసం ముందుగానే దరఖాస్తు చేసుకోకుండానే ఎన్నో దేశాల్లో పర్యటించవచ్చు. ఈ విషయంలో ఏ దేశ పాస్‌పోర్ట్ ఎంత బలంగా ఉందో తెలిపే 2026 హెన్లీ పాస్‌పోర్ట్ ఇండెక్స్ తాజాగా ఆసక్తికరమైన వివరాలను వెల్లడించింది.

ఈ జాబితాలో సింగపూర్ మొదటి స్థానాన్ని దక్కించుకుంది. ఆ దేశ పాస్‌పోర్ట్ ఉన్నవారు ముందస్తు వీసా లేకుండా 193 గమ్యస్థానాలకు వెళ్లొచ్చు. జపాన్, దక్షిణ కొరియా, యూఏఈ దేశాలు 188 గమ్యస్థానాలతో రెండో స్థానంలో నిలిచాయి. స్వీడన్ 187 గమ్యస్థానాలతో మూడో స్థానాన్ని సాధించింది. అమెరికా 180 గమ్యస్థానాలతో పదో స్థానంలో ఉండగా.. ఇజ్రాయెల్ 167 గమ్యస్థానాలతో 17వ స్థానంలో ఉంది.

ఇక భారత పాస్‌పోర్ట్ విషయానికి వస్తే.. మన దేశం ఈ జాబితాలో 84వ స్థానంలో నిలిచింది. భారతీయులు ముందస్తు వీసా లేకుండా 55 గమ్యస్థానాలకు ప్రయాణించవచ్చు. అల్జీరియా, మౌరిటానియా కూడా ఇదే ర్యాంక్‌లో ఉన్నాయి. గతేడాది అక్టోబర్‌లో భారత్ 85వ స్థానంలో ఉండగా, ఈసారి ఒక స్థానం మెరుగుపడింది.

అయితే ఇక్కడ గమనించాల్సిన విషయం మరొకటి ఉంది. ర్యాంక్ పెరిగినప్పటికీ భారతీయులు ప్రయాణించగల గమ్యస్థానాల సంఖ్య మాత్రం తగ్గింది. 2025 అక్టోబర్‌లో 57గా ఉన్న ఈ సంఖ్య తాజా జాబితాలో 55కు చేరింది. అంటే ర్యాంకింగ్‌లో స్వల్ప పురోగతి కనిపించినా, ప్రయాణ అవకాశాల పరంగా మాత్రం తగ్గుదల నమోదైంది.

మరోవైపు ప్రపంచంలో పాస్‌పోర్టుల సామర్థ్యాన్ని అంచనా వేసేందుకు గ్లోబల్ పాస్‌పోర్ట్ ఇండెక్స్ కూడా ఉంది. అయితే ఇది హెన్లీ ఇండెక్స్‌కు భిన్నంగా పనిచేస్తుంది. ప్రయాణ స్వేచ్ఛతో పాటు పెట్టుబడి అవకాశాలు, జీవన ప్రమాణాలను కూడా పరిగణనలోకి తీసుకుంటుంది. అందుకే ఈ రెండు ఇండెక్స్‌లలో దేశాల ర్యాంకులు వేర్వేరుగా ఉంటాయి.