ఇక మొబైల్ ఫోన్లకూ శాటిలైట్ సిగ్నల్.. ట్రాయ్ కీలక ప్రతిపాదనతో మారనున్న టెలికాం రంగం!

భారత్‌లో మొబైల్ నెట్‌వర్క్ సేవల్లో కీలక మార్పులకు రంగం సిద్ధమవుతోంది. మారుమూల ప్రాంతాల్లో సైతం మొబైల్ ఫోన్లకు నేరుగా శాటిలైట్ ద్వారా కనెక్టివిటీ అందించే దిశగా టెలికాం నియంత్రణ సంస్థ ట్రాయ్ (TRAI) కీలక ప్రతిపాదనలు చేసింది. ఈ విధానం అమల్లోకి వస్తే సంప్రదాయ మొబైల్ టవర్లపై ఆధారపడకుండా శాటిలైట్ సాయంతోనూ ఫోన్లకు కనెక్టివిటీ అందించే అవకాశం ఉంటుంది.

నవంబర్ 5న ట్రాయ్ విడుదల చేసిన సిఫార్సుల్లో శాటిలైట్ కమ్యూనికేషన్ నెట్‌వర్క్ ప్రొవైడర్లకు ప్రత్యేక అనుమతి విధానాన్ని ప్రతిపాదించింది. ఇందులో భాగంగా శాటిలైట్ సంస్థలు తమ నెట్‌వర్క్ సామర్థ్యాన్ని ఎయిర్‌టెల్, జియో, వొడాఫోన్ ఐడియా వంటి టెలికాం ఆపరేటర్లకు అందించవచ్చు. అయితే ఈ కొత్త అనుమతి కింద శాటిలైట్ సంస్థలు నేరుగా వినియోగదారులకు టెలికాం సేవలు అందించడానికి వీలుండదు.

ట్రాయ్ రెండు రకాల డైరెక్ట్ టు డివైస్ (D2D) కనెక్టివిటీ విధానాలను ప్రతిపాదించింది. మొదటిది శాటిలైట్ కోసం ప్రత్యేకంగా కేటాయించే L, S బ్యాండ్ల ద్వారా అనుకూలమైన స్మార్ట్‌ఫోన్లను ఉపగ్రహాలకు అనుసంధానించడం. రెండోది ఇప్పటికే టెలికాం సంస్థలకు కేటాయించిన మొబైల్ స్పెక్ట్రమ్‌ను శాటిలైట్ నెట్‌వర్క్‌తో ఉపయోగించడం.

ఈ ప్రతిపాదనతో స్టార్‌లింక్, అమెజాన్ లియో, యూటెల్‌శాట్ వన్‌వెబ్, టాటా నెల్కో వంటి సంస్థలకు కొత్త అవకాశాలు ఏర్పడవచ్చు. టెలికాం కంపెనీలు కూడా తమ నెట్‌వర్క్ పరిధిని విస్తరించుకోవచ్చు. ముఖ్యంగా కొండ ప్రాంతాలు, అడవులు, మారుమూల గ్రామాల్లో సిగ్నల్ సమస్యలకు ఇది పరిష్కారం చూపే అవకాశం ఉంది.

అయితే ట్రాయ్ సిఫార్సులు మాత్రమే విడుదల చేసింది. వాటిపై కేంద్ర ప్రభుత్వం తుది నిర్ణయం తీసుకోవాల్సి ఉంది. అంతేకాదు, శాటిలైట్ కనెక్టివిటీ కోసం అనుకూలమైన ఫోన్లు, అవసరమైన సాంకేతిక సదుపాయాలు కూడా అందుబాటులోకి రావాలి. ప్రభుత్వం ఆమోదిస్తే భారత టెలికాం రంగంలో ఇది మరో కీలక ముందడుగు కానుంది.