భార్యకు ద్రోహం చేశా.. NVIDIA ఉద్యోగులకు CEO జెన్సన్ హువాంగ్ క్షమాపణలు!

ప్రపంచంలోని ప్రముఖ టెక్నాలజీ సంస్థల్లో ఒకటైన NVIDIA CEO జెన్సన్ హువాంగ్ వ్యక్తిగత జీవితానికి సంబంధించిన వివాదంతో వార్తల్లో నిలిచారు. తన భార్యకు నమ్మకద్రోహం చేశానని ఆయన స్వయంగా అంగీకరిస్తూ కంపెనీ ఉద్యోగులకు పంపిన ఈమెయిల్‌లో క్షమాపణలు చెప్పారు.

“నేను నా భార్యకు నమ్మకద్రోహం చేశాను. నా చర్యల వల్ల ఆమెతో పాటు మా పిల్లలు కూడా బాధపడ్డారు. నేను చేసిన తప్పుకు ఎలాంటి సమర్థన లేదు. నన్ను క్షమించండి” అని ఆయన తన సందేశంలో పేర్కొన్నారు. తన కుటుంబం తనకు ఎంతో ప్రేమ, మద్దతు ఇచ్చిందని, వారి నమ్మకాన్ని కోల్పోయానని విచారం వ్యక్తం చేశారు. కాలక్రమేణా వారి విశ్వాసాన్ని తిరిగి పొందేందుకు ప్రయత్నిస్తానని చెప్పారు.

ఈ వివాదం వెనుక చైనా మహిళ ఆలిస్ హువాంగ్‌తో ఆయనకు సంబంధం ఉందంటూ అంతర్జాతీయ మీడియా కథనాలు వెలువడ్డాయి. ఆమె సింగపూర్‌కు చెందిన Megaspeed సంస్థలో పనిచేసిన మాజీ ఎగ్జిక్యూటివ్. అమెరికా నిఘా వర్గాలు ఆమె చైనా కోసం సమాచారం సేకరించి ఉండవచ్చని అనుమానిస్తున్నట్లు వార్తలు వచ్చాయి. అయితే ఈ ఆరోపణలు ఇంకా నిర్ధారణ కాలేదు. జెన్సన్ తన ఈమెయిల్‌లో ఆ మహిళ పేరును ప్రస్తావించలేదు.

ఈ వ్యవహారంపై NVIDIA బోర్డు స్వతంత్ర దర్యాప్తు ప్రారంభించింది. కంపెనీ రహస్యాలు లేదా అమెరికా జాతీయ భద్రతకు ముప్పు వాటిల్లినట్లు ప్రస్తుతం తమకు ఆధారాలు లేవని బోర్డు తెలిపింది. దర్యాప్తుకు పూర్తిగా సహకరిస్తానని జెన్సన్ హువాంగ్ వెల్లడించారు. ఆయన CEO బాధ్యతల్లో కొనసాగుతారని కంపెనీ స్పష్టం చేసింది.