ఐపీఎల్ లో SRH ఫ్లాప్ షోతో కథ ముగిసింది.. కావ్య పాప కల చెదిరింది..

సన్‌రైజర్స్ హైదరాబాద్ అభిమానుల ఆశలు మరోసారి ఆవిరయ్యాయి. పటిష్టమైన బ్యాటింగ్ లైనప్‌తో, అద్భుతమైన ఆరంభాలతో అదరగొడుతున్నామని సంతోషించేలోపే పరాజయాలు వెంటాడుతున్నాయి. ముఖ్యంగా నిన్న గుజరాత్ టైటాన్స్‌తో జరిగిన మ్యాచ్‌లో ఎదురైన ఘోర పరాజయం SRH ఓనర్ కావ్యా మారన్‌తో పాటు యావత్ ఎస్ఆర్‌హెచ్ అభిమానులను తీవ్ర నిరాశకు గురి చేసింది. ఈ ఓటమితో సన్‌రైజర్స్ హైదరాబాద్ ప్లేఆఫ్ రేసు నుంచి నిష్క్రమించే ప్రమాదంలో పడింది.

గుజరాత్ టైటాన్స్ ఈ మ్యాచ్‌లో ముందుగా బ్యాటింగ్ చేసి పరుగుల సునామీ సృష్టించింది. శుభ్‌మన్ గిల్ అద్భుతమైన 76 పరుగులు, జోస్ బట్లర్ మెరుపులతో టైటాన్స్ 224 పరుగుల భారీ స్కోరును సాధించింది. గిల్ రనౌట్ కావడం కొంత చర్చకు దారితీసినా, ఎస్ఆర్‌హెచ్ ముందు భారీ లక్ష్యం నిలిచింది. ఛేదనలో అభిషేక్ శర్మ 41 బంతుల్లో 74 పరుగులతో మెరిపించి ఆశలు రేకెత్తించాడు. ట్రావిస్ హెడ్ కూడా తనదైన శైలిలో దూకుడుగా ఆరంభించాడు. అయితే, వీరిద్దరూ ఔటైన తర్వాత ఎస్ఆర్‌హెచ్ బ్యాటింగ్ పట్టు కోల్పోయింది.

హెన్రిచ్ క్లాసెన్ కూడా నిలదొక్కుకోలేకపోవడంతో కావాల్సిన రన్‌రేట్ అమాంతం పెరిగిపోయింది. చివరి ఓవర్లలో ప్రసిద్ధ్ కృష్ణ కట్టుదిట్టమైన బౌలింగ్, రషీద్ ఖాన్ ఒత్తిడి పెంచే ప్రదర్శనతో ఎస్ఆర్‌హెచ్ బ్యాటింగ్‌ లైనప్ వెలవెలబోయింది. గుజరాత్ బౌలర్లు సమష్టిగా రాణించి ఎస్ఆర్‌హెచ్‌ను 186/6కు కట్టడి చేసి 38 పరుగుల తేడాతో ఘన విజయం సాధించారు.

ఈ సీజన్‌లో ఎస్ఆర్‌హెచ్ జట్టు పేలవ ప్రదర్శనకు అనేక కారణాలున్నప్పటికీ, వేలంలో భారీ ధరలకు కొనుగోలు చేసిన కొంతమంది ఆటగాళ్లు అంచనాలను అందుకోకపోవడం ప్రధాన లోపంగా కనిపిస్తోంది. ఐపీఎల్ 2025 సీజన్ కోసం సన్‌రైజర్స్ హైదరాబాద్ భారీ మొత్తాన్ని వెచ్చించి జట్టును నిర్మించుకుంది. కాగితంపై పటిష్టంగా కనిపించినా మైదానంలో మాత్రం ఆశించిన ఫలితాలు రాలేదు. ముఖ్యంగా ఇషాన్ కిషన్ , మొహమ్మద్ షమీల ప్రదర్శన తీవ్ర నిరాశపరిచింది.

ఇషాన్ కిషన్‌ను ₹11.25 కోట్లకు సన్‌రైజర్స్ హైదరాబాద్ కొనుగోలు చేసింది. మొదటి మ్యాచ్‌లో సెంచరీతో మెరిసినా, ఆ తర్వాత మ్యాచ్‌లలో అతని బ్యాట్ నుంచి పరుగులు రాలేదు. 20 పరుగులు చేయడానికి కూడా ఇబ్బంది పడుతూ జట్టుకు భారంగా మారాడు.

మరోవైపు మొహమ్మద్ షమీని ₹10 కోట్లకు కొనుగోలు చేయడం ఎస్ఆర్‌హెచ్‌కు దారుణమైన కొనుగోలుగా మారింది. గుజరాత్‌తో జరిగిన కీలక మ్యాచ్‌లో షమీ వేసిన మూడు ఓవర్లలో ఏకంగా 48 పరుగులు సమర్పించుకున్నాడు. ఈ సీజన్‌లో అతని ఎకానమీ రేటు 11.2కు పైగా ఉండటం అతని పేలవ ఫామ్‌కు నిదర్శనం. బంతితో అతను ఏమాత్రం ప్రభావం చూపలేక పూర్తిగా విఫలమయ్యాడు. గత సీజన్‌లో గుజరాత్ టైటాన్స్ తరఫున అద్భుతంగా రాణించిన షమీ, ఎస్ఆర్‌హెచ్‌లో చేరిన తర్వాత తన లయను కోల్పోయాడు.

ట్రావిస్ హెడ్, అభిషేక్ శర్మ, హెన్రిచ్ క్లాసెన్, పాట్ కమిన్స్ వంటి స్టార్ ఆటగాళ్లు జట్టులో ఉన్నప్పటికీ, కీలక సమయంలో రాణించడంలో విఫలమవడం, భారీ లక్ష్యాలను ఛేదించడంలో తడబడటం ఎస్ఆర్‌హెచ్‌ను వెనక్కి నెట్టింది. భారీ ధరలకు కొనుగోలు చేసిన ఇషాన్ కిషన్, మొహమ్మద్ షమీ వంటి ఆటగాళ్లు అంచనాలను అందుకోకపోవడం కావ్యా మారన్‌తో పాటు జట్టు యాజమాన్యానికి తీవ్ర ఆందోళన కలిగించే అంశం.

ఎస్ఆర్‌హెచ్ ప్లేఆఫ్ ఆశలు దాదాపుగా సన్నగిల్లుతున్న ఈ తరుణంలో, రాబోయే వేలంలో జట్టు కూర్పు విషయంలో మరింత వ్యూహాత్మకంగా వ్యవహరించాల్సిన అవసరం ఎంతైనా ఉంది. లేదంటే, ఇలాంటి నిరాశపరిచే ఫలితాలే పునరావృతమయ్యే అవకాశం ఉంది. గుజరాత్ టైటాన్స్ వంటి పటిష్టమైన జట్లు సమష్టి ప్రదర్శనతో ముందుకు సాగుతున్న వేళ, ఎస్ఆర్‌హెచ్ తమ లోపాలను సరిదిద్దుకొని మళ్ళీ బలంగా పుంజుకోవాలని అభిమానులు ఆశిస్తున్నారు.