మీ నిర్ణయంలో లోపాలు బోలెడు.. కోచ్ పై స్టార్ క్రికెటర్ భార్య

ఇండియన్ ప్రీమియర్ లీగ్ (ఐపీఎల్)లో అత్యంత విజయవంతమైన జట్టు.. క్రికెటర్లను స్టార్లను చేసే జట్టు.. నిదానంగా మొదలుపెట్టి టైటిల్ కొట్టేంత సత్తా ఉన్న జట్టు.. ప్రణాళిక ప్రకారం డబ్బును ఖర్చుపెడుతూ ఆటగాళ్లను తీసుకునే జట్టు ఏదంటే.. వీటన్నిటికీ సమాధానం ముంబై ఇండియన్స్. సచిన్ టెండూల్కర్, రోహిత్ శర్మ, సూర్యకుమార్ యాదవ్, హార్దిక్ పాండ్యా వీరంతా ముంబై ఇండియన్స్ కు ఆడినవారే. విదేశీ క్రికెటర్లలోనూ పొలార్డ్, పాంటింగ్, మలింగ వంటివారు ముంబైకి ప్రాతినిధ్యం వహించారు. జట్టు కూర్పును చక్కగా బేరీజు వేస్తుంది ముంబై యాజమాన్యం. అవసరమైతే కొన్ని కఠిన నిర్ణయాలూ తీసుకుంటుంది.

రోహిత్ కాదు హార్దిక్

ఐదుసార్లు ఐపీఎల్ టైటిల్ విజేత అయిన ముంబై గత రెండు సీజన్ల నుంచి గాడితప్పింది. ఆటగాళ్లు ఫామ్ లో లేకపోవడం, వయసు పైబడడం, కొందరు జట్టుకు దూరం కావడంతో లయ తప్పింది. దీంతో ఘోరమైన ప్రదర్శన చేస్తోంది. మరీ ముఖ్యంగా హార్దిక్ పాండ్యా వంటి ఆల్ రౌండర్ గుజరాత్ టైటాన్స్ కు తరలిపోవడంతో ముంబై డీలాపడింది. సూర్య కుమార్ ఉన్నప్పటికీ అతడు జట్టును ఎన్ని మ్యాచ్ ల్లో అన్ని గెలిపించగలడు? దీంతోనే వచ్చే సీజన్ కు సంబంధించి ముంబై ఇండియన్స్ కఠిన నిర్ణయం తీసుకుంది. టీమిండియా కెప్టెన్ రోహిత్ శర్మను తప్పించి హార్దిక్ కు బాధ్యతలు అప్పగించింది.

టీమిండియా కెప్టెన్ నే తప్పిస్తారా?

రోహిత్ వంటి దిగ్గజాన్ని తప్పించడం వెనుక కారణాలు ఏమైనా.. టీమిండియా కెప్టెన్ ను ఓ ఫ్రాంచైజీ యాజమాన్యం తప్పిండం అంటే మామూలు విషయం కాదు. వాస్తవానికి టీమిండియాను రెండేళ్లుగా రోహిత్ చక్కగా నడిపిస్తున్నాడు. కానీ, ముంబై కెప్టెన్ గా మాత్రం విఫలమవుతున్నాడు. రెండు సీజన్లుగా ప్రదర్శన పడిపోవడంతో జట్టు యాజమాన్యం రోహిత్ బదులుగా హార్దిక్ ను కెప్టెన్ గా తీసుకుంది. అయితే, ఈ నిర్ణయంపై తీవ్ర విమర్శలు వచ్చాయి. వీటిని ముంబై ఇండియన్స్ కోచ్ మార్క్ బుచర్ సమర్థించాడు. ఓ పాడ్‌ కాస్ట్‌ ఇంటర్వ్యూలో అతడు మాట్లాడుతూ భవిష్యత్ ప్రణాళికల్లో భాగంగానే ఈ నిర్ణయం తీసుకున్నట్లు ప్రకటించాడు. ఇందులో వ్యక్తిగత నిర్ణయాలు లేవని పేర్కొన్నాడు. రెండు సీజన్లలో రోహిత్‌ బ్యాట్‌ తో రాణించలేకపోయాడు. అందుకే అతడిపై బాధ్యతలను తగ్గించాలనుకున్నాం. లీగ్‌ టోర్నీలో కెప్టెన్‌ కు ఆట కాకుండా చాలా బాధ్యతలుంటాయి. ఫొటో షూట్స్‌, ప్రకటనలను కూడా చూసుకోవాలి" అని వెల్లడించాడు.

బుచర్ కు గట్టి కౌంటర్..

రోహిత్ కు ముంబైకు మారక పరిచయమైంది రితికా సజ్ దేహ. మొదట్లో మేనేజర్ గా వ్యవహరించిన ఆమెను రోహిత్ ఇష్టపడ్డాడు. ఇద్దరూ వివాహం చేసుకున్నారు. ఇప్పుడు తన భర్తను ముంబై కెప్టెన్సీని తప్పించడంపై బుచర్ చేసిన వ్యాఖ్యలను రితిక తప్పుబట్టారు."మీ నిర్ణయంలో’ చాలా తప్పులున్నాయి" అంటూ గట్టి కౌంటర్ ఇచ్చింది. ఇదిప్పుడు సోషల్ మీడియాలో వైరల్ గా మారింది.