అభిషేక్ నాయర్ కు ఎందుకు రోహిత్ ధన్యవాదాలు తెలిపాడు?
ఈ మ్యాచ్ తర్వాత రోహిత్ శర్మ సోషల్ మీడియాలో ఒక పోస్ట్‌ను షేర్ చేస్తూ తన ఫామ్ పునరుద్ధరణలో కీలక పాత్ర పోషించిన అభిషేక్ నాయర్‌కు ప్రత్యేకంగా ధన్యవాదాలు తెలియజేశాడు.
By: Tupaki Desk | 22 April 2025 10:24 AM IST
ఐపీఎల్‌లో ముంబై ఇండియన్స్ మాజీ కెప్టెన్ రోహిత్ శర్మ పేలవ బ్యాటింగ్ ప్రదర్శనపై పలు విమర్శలు వెల్లువెత్తాయి. అతను మంచి ప్రారంభాలను పొందుతున్నప్పటికీ వాటిని పెద్ద స్కోర్లుగా మలచడంలో ఇబ్బంది పడ్డాడు. అభిమానులు, విశ్లేషకులు రోహిత్ నుండి భారీ ఇన్నింగ్స్ కోసం ఆసక్తిగా ఎదురుచూశారు.
చెన్నై సూపర్ కింగ్స్‌తో జరిగిన ఉత్కంఠభరితమైన మ్యాచ్‌లో ఈ నిరీక్షణకు తెరపడింది. రోహిత్ శర్మ తన పూర్వపు ఫామ్‌ను గుర్తుచేస్తూ అద్భుతంగా బ్యాటింగ్ చేశాడు. అతను 76 పరుగులు చేసి జట్టుకు ఆశాజనకమైన స్కోరును అందించడంలో కీలక పాత్ర పోషించాడు. టీమ్ ఇండియా కెప్టెన్ నుండి చాలా కాలం తర్వాత వచ్చిన అత్యుత్తమ ఐపీఎల్ ఇన్నింగ్స్‌లలో ఇది ఒకటి.
ఈ మ్యాచ్ తర్వాత రోహిత్ శర్మ సోషల్ మీడియాలో ఒక పోస్ట్‌ను షేర్ చేస్తూ తన ఫామ్ పునరుద్ధరణలో కీలక పాత్ర పోషించిన అభిషేక్ నాయర్‌కు ప్రత్యేకంగా ధన్యవాదాలు తెలియజేశాడు. అభిషేక్ ప్రతిభావంతులైన ఫిట్‌నెస్ , బ్యాటింగ్ కోచ్ అని, అతని మద్దతుకు కృతజ్ఞుడనని రోహిత్ పేర్కొన్నాడు.
- అభిషేక్ నాయర్ ఎవరు?
అభిషేక్ నాయర్ భారత క్రికెట్ సర్కిల్స్‌లో సుపరిచితమైన పేరు. అతను గతంలో గౌతమ్ గంభీర్ నేతృత్వంలోని కోచింగ్ టీమ్‌లో భాగంగా భారత జట్టుకు ఫిట్‌నెస్ , బ్యాటింగ్ కోచ్‌గా పనిచేశాడు. కోచింగ్ సెటప్‌లో అతను ఒక ముఖ్యమైన సభ్యుడు. రోహిత్ శర్మ, కేఎల్ రాహుల్, శ్రేయాస్ అయ్యర్ వంటి సీనియర్ ఆటగాళ్లతో అతనికి మంచి అనుబంధం ఉంది. ఆటగాళ్లు అతని కోచింగ్ పట్ల ఎంతో గౌరవం , నమ్మకాన్ని కలిగి ఉన్నారు.
- బీసీసీఐ నుండి నిష్క్రమణ.. రోహిత్‌తో కొనసాగిన సహకారం
ఆశ్చర్యకరంగా గత వారం బీసీసీఐ అభిషేక్ నాయర్‌ను కోచింగ్ విభాగం నుండి తొలగించినట్లు ప్రకటించింది. ఈ నిర్ణయం చాలా మందికి షాక్‌గా అనిపించింది, ముఖ్యంగా అతను జట్టులో గౌరవనీయమైన కోచ్‌లలో ఒకరిగా ఉన్నాడు. అయితే బీసీసీఐతో అతని ఒప్పందం ముగిసిన తర్వాత అభిషేక్ కోల్‌కతా నైట్ రైడర్స్ (కెకెఆర్) జట్టులో చేరాడు.
అయితే బీసీసీఐ అతన్ని తొలగించినప్పటికీ, అభిషేక్ నాయర్ , రోహిత్ శర్మల మధ్య అనుబంధం కొనసాగింది. చెన్నై సూపర్ కింగ్స్‌తో జరిగిన కీలక మ్యాచ్‌కు ముందు ముంబై ఇండియన్స్ శిబిరంలో అభిషేక్ నాయర్ రోహిత్‌తో కలిసి పనిచేయడం కనిపించింది. రోహిత్ తన ఫామ్‌లోకి తిరిగి రావడానికి ఈ కోచింగ్ సెషన్స్ ఎంతగానో ఉపయోగపడిందని భావిస్తున్నాడు, అందుకే అతను మ్యాచ్ తర్వాత సోషల్ మీడియా ద్వారా అభిషేక్‌కు తన కృతజ్ఞతలు తెలియజేశాడు.
ఒకవైపు బీసీసీఐ అత్యంత ప్రతిభావంతులైన, గౌరవనీయమైన కోచ్‌ను జట్టు నుండి తప్పించడం, మరోవైపు కీలక సమయంలో రోహిత్ శర్మ అతని నుండి కోచింగ్ తీసుకొని ఫామ్‌లోకి రావడం.. బహిరంగంగా అతనికి ధన్యవాదాలు తెలపడం ఈ మొత్తం వ్యవహారానికి ప్రాధాన్యతను సంతరించింది. రోహిత్ బ్యాటింగ్‌లో మెరుగుదల వెనుక అభిషేక్ నాయర్ కృషి ఉందని ఈ పరిణామం స్పష్టం చేస్తోంది. బీసీసీఐ తీసుకున్న నిర్ణయం పట్ల పరోక్షంగా రోహిత్ తన చర్య ద్వారా ఒక సందేశాన్ని పంపినట్లు కూడా ఇది అనిపించవచ్చు.