ధోనీకి ఇది చివరి మ్యాచ్‌నా? అభిమానుల్లో ఉద్వేగం!

ప్రతి ఐపీఎల్ సీజన్ ముగింపు దశకు చేరుకుంటున్నప్పుడు, మళ్ళీ మళ్ళీ వినిపించే ఒకే ఒక్క వార్త.. మహేంద్ర సింగ్ ధోనీ రిటైర్మెంట్. ఈ సంవత్సరం కూడా ఇదే కథ కొనసాగుతోంది. ఈరోజు చెన్నై సూపర్ కింగ్స్ (CSK) వర్సెస్ గుజరాత్ టైటాన్స్ (GT) మధ్య జరిగే మ్యాచ్‌ వేళ ధోనీ కెరీర్‌కు సంబంధించి ఊహాగానాలు మరోసారి ఊపందుకున్నాయి.

అభిమానుల ఆందోళన

ఈ మ్యాచ్ చెన్నై సూపర్ కింగ్స్‌కి ఈ సీజన్‌లో చివరి మ్యాచ్ కావడంతో అభిమానుల్లో , క్రికెట్ ప్రపంచంలో ఇదే ధోనీ కెరీర్‌కు కూడా చివరి మ్యాచ్ అవుతుందా అనే ప్రశ్నపై తీవ్ర చర్చలు నడుస్తున్నాయి. ధోనీ ఇప్పటికే కొన్ని నెలలుగా ఇదే ప్రశ్నను ఎదుర్కొంటున్నాడు. ఇటీవలే ఒక ఇంటర్వ్యూలో ఆయన మాట్లాడుతూ “ఇది నా చివరి సీజన్ అవుతుందా అనే విషయంలో నాకు ఖచ్చితంగా తెలియదు. నేను కొన్ని నెలలు శిక్షణ తీసుకుని, నా శరీరం మరో సీజన్‌కు తగినదా కాదా అన్న విషయం అప్పుడు నిర్ణయిస్తాను” అని చెప్పారు.

ఈ మ్యాచ్‌కు ఉన్న ప్రత్యేకత

అయితే, ఈ మ్యాచ్‌కి ఉన్న ప్రత్యేకత ఏమిటంటే.. ఇది ఐపీఎల్ 2025లో చెన్నైకి చివరి మ్యాచ్ కావడంతో పాటు, ఇది ధోనికి గుడ్‌బై చెప్పే అవకాశం కూడా కావచ్చన్న భావనతో అభిమానుల మనసుల్లో ఒక ప్రత్యేక స్థానం ఏర్పడింది. ధోనీ కేవలం ఆటగాడిగా కాదు.. నాయకుడిగా, ఫినిషర్‌గా, ప్రేరణాత్మక శక్తిగా ఎన్నో విజయాలను చెన్నైకి అందించాడు. అతని శాంతమైన స్వభావం, మ్యాచ్‌లోని పరిస్థితులను అంచనా వేసే ప్రతిభ, ఆఖరి వరకు పోరాడే ధోరణి ఆయన్ను ప్రత్యేకంగా నిలిపాయి.

ఉద్వేగభరిత క్షణాలు

ఈరోజు మ్యాచ్‌లో ధోనీ చివరిసారి జట్టును ముందుండి నడిపిస్తాడా? లేక మరో సీజన్ కోసం తిరిగి వస్తాడా? అన్నది తెలియదు. కానీ ఒక విషయం మాత్రం స్పష్టంగా చెప్పొచ్చు. మైదానంలో ధోనీ ఉన్నంతవరకు, ప్రతి ఓవర్, ప్రతి బంతి, ప్రతి క్షణం అభిమానులకు ఒక భావోద్వేగ ప్రయాణమే.

ధోనీ భవిష్యత్తు ఏదైనా కావొచ్చు... కానీ క్రికెట్ అభిమానుల గుండెల్లో ధోనీ మాత్రం ఎప్పటికీ “తల”గానే నిలిచిపోతాడు. ఈ మ్యాచ్ ధోనీ కెరీర్‌లో ఒక మలుపు అవుతుందా, లేక ఇది కేవలం మరో పుకారు మాత్రమేనా? వేచి చూద్దాం.