3 ఏళ్ల నిరీక్షణకు తెర..ఢిల్లీ క్యాపిటల్స్‌లో కేఎల్ రాహుల్ విశ్వరూపం

ఢిల్లీ క్యాపిటల్స్‌లోకి వచ్చిన తర్వాత స్టార్ బ్యాట్స్‌మెన్ కేఎల్ రాహుల్ తన ఆటతీరుతో అందరినీ ఆశ్చర్యపరుస్తున్నాడు. గతంలో కూడా నిలకడగా పరుగులు చేసినప్పటికీ, ఇప్పుడు తన పాత దూకుడు శైలిని మళ్లీ చూపిస్తున్నాడు. దీనికి తగ్గట్టుగానే అతనికి అద్భుతమైన ఫలితం కూడా లభించింది. గుజరాత్ టైటాన్స్‌తో జరిగిన మ్యాచ్‌లో రాహుల్ మెరుపు శతకం సాధించాడు. ఢిల్లీలోని అరుణ్ జైట్లీ స్టేడియంలో జరిగిన ఈ సీజన్‌లోని 60వ మ్యాచ్‌లో రాహుల్ కేవలం 60 బంతుల్లోనే ఈ సెంచరీని పూర్తి చేశాడు. దీంతో పాటు రాహుల్ ఐపీఎల్‌లో 3 సంవత్సరాల తర్వాత సెంచరీ సాధించినట్లయింది.

ఆదివారం మే 18న ఢిల్లీలోని అరుణ్ జైట్లీ స్టేడియంలో జరిగిన మ్యాచ్‌లో కేఎల్ రాహుల్ క్లాసిక్ బ్యాటింగ్‌ను అభిమానులు ఆస్వాదించారు. మరోసారి అతని బ్యాటింగ్ స్థానంలో మార్పు చేసినప్పటికీ, అది అతని ఆటపై ఏమాత్రం ప్రభావం చూపలేదు. అతని జట్టులోని ఇతర బ్యాట్స్‌మెన్‌లు చిన్న ఇన్నింగ్స్‌లు మాత్రమే ఆడగలిగినప్పటికీ రాహుల్ మాత్రం మొదటి బంతి నుండి చివరి బంతి వరకు క్రీజులో నిలబడి అద్భుతమైన శతకం సాధించాడు.

ఐపీఎల్ 2025లో ఇదే తొలి సెంచరీ

తొలుత బ్యాటింగ్ చేసిన ఢిల్లీ జట్టుకు ఓపెనర్‌గా బరిలోకి దిగిన రాహుల్, నెమ్మదిగా ఇన్నింగ్స్‌ను ప్రారంభించినప్పటికీ ఆ తర్వాత వేగం పెంచాడు. ఈ బ్యాట్స్‌మెన్ 35 బంతుల్లో అర్థ సెంచరీ పూర్తి చేశాడు. ఆ తర్వాత కూడా అతని బ్యాట్ ఆగలేదు. ఇన్నింగ్స్ 19వ ఓవర్‌లో రాహుల్ తన సెంచరీని పూర్తి చేశాడు. రాహుల్ తన 60వ బంతికి ఫోర్ కొట్టి తన ఐపీఎల్ కెరీర్‌లో 5వ శతకాన్ని నమోదు చేశాడు. ఈ క్రమంలో అతను 12 ఫోర్లు, 4 సిక్సర్లు కొట్టాడు. రాహుల్ సెంచరీలో ప్రత్యేక విషయం ఏమిటంటే.. ఐపీఎల్ 2025లో సెంచరీ సాధించిన తొలి కుడిచేతి వాటం బ్యాట్స్‌మెన్ అతనే. అంతకుముందు ఈ సీజన్‌లో నమోదైన 4 సెంచరీలు ఎడమచేతి వాటం బ్యాట్స్‌మెన్‌లు సాధించినవే.

3 ఏళ్ల తర్వాత సెంచరీ

రాహుల్ 65 బంతుల్లో 112 పరుగుల అజేయ ఇన్నింగ్స్ ఆడాడు. ఇందులో 14 ఫోర్లు, 4 సిక్సర్లు ఉన్నాయి. ఈ సెంచరీతో రాహుల్ 3 ఏళ్ల నిరీక్షణకు తెరదించాడు. అంతకుముందు ఈ కుడిచేతి వాటం బ్యాట్స్‌మెన్ ఐపీఎల్ 2022 సీజన్‌లో లక్నో సూపర్ జెయింట్స్ కెప్టెన్‌గా రెండు సెంచరీలు సాధించాడు. మొత్తంగా రాహుల్ ఐపీఎల్ కెరీర్‌లో ఇది 5వ శతకం. విశేషమేమిటంటే, శుభ్‌మన్ గిల్ జట్టుపై సెంచరీ చేయడం ద్వారా రాహుల్ ఐపీఎల్‌లో అత్యధిక సెంచరీలు సాధించిన ఆటగాళ్ల జాబితాలో గిల్ (4)ను అధిగమించాడు. రాహుల్ ఇప్పుడు ఈ జాబితాలో నాలుగో స్థానానికి చేరుకున్నాడు. రాహుల్ కంటే ముందు విరాట్ కోహ్లీ (8), జోస్ బట్లర్ (7), క్రిస్ గేల్ (6) ఉన్నారు.